ޓީސީގައި އޮތް ސްކޮޑަކީ މިހާތަނަށް ލިބުނު އެންމެ ހިތްހަމަޖެހޭ ސްކޮޑް: ޝާޒްލީ

ޓީސީ ސްޕޯޓްސް ކުލަބުގައި މިހާރު އޮތް ޒުވާން ސްކޮޑަކީ މިހާތަނަށް ކޯޗިންގ ކެރިއަރުގައި ލިބުނު އެންމެ ހިތްހަމަޖެހޭ ސްކޮޑް ކަމަށް އެ ޓީމުގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.

މި ސީޒަނަށް ޓީސީން ކުރިމަތިލާފައިވަނީ ޒުވާން ސްކޮޑަކާއެކުއެވެ. އެ ސްކޮޑާއެކުވެސް އެ ޓީމުން މި ސީޒަނުގައި މިހާތަނަށް މޮޅު ކުޅުމެއް ދައްކާފައިވާއިރު، އެ ޓީމު އޮތީ ތާވަލުގެ ހަވަނައިގައި ކުޅުނު ހަ މެޗުން ލިބުނު ހަ ޕޮއިންޓާއެކުއެވެ.

ދިރާގު ދިވެހި ޕްރިމިއާ ލީގުގައި ހުކުރު ދުވަހުގެ ހަވީރު ކުލަބު ގްރީން ސްޓްރީޓްސްއާ ދެކޮޅަށް ނުކުތުމުގެ ކުރިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޝާޒްލީ ބުނީ ޓީސީން މިހާރު ހޯދަމުން އަންނަ ނަތީޖާތަކުގެ ފަހަތުގައި ވަނީ ކުޅުންތެރިން ދައްކާ ކުޅުން ކަމަށާއި، އެހެންކަމުން މިހާރު ލީގުގެ ބޮޑެތި ކުލަބުތަކުން ޓީސީ ފަސޭހަކޮށް ނުލާނެ ކަމަށެވެ. އަދި ޓީސީގެ ކުޅުންތެރިންނަކީ އޭނާ ބުނާ ގޮތް ހަދައިގެން ކުޅޭ ކުޅުންތެރިންތަކެއް ކަމަށާއި، ޓީސީ އަކީ ޒުވާން ކުޅުންތެރިންތަކާއެކު ނުކުތް "އެނަޖެޓިކް" ޓީމެއް ކަމަށްވެސް ބުންޏެވެ.

ޝާޒްލީ އިތުރަށް ބުނީ ގްރީން ސްޓްރީޓްސްއާ ދެކޮޅަށް ކުޅެން އޮތް މެޗު ފަސޭހަ ނުވާނެ ކަމަށާއި، އެކަން އޭނާގެ ކުޅުންތެރިންނަށް ވިސްނާދީފައިވާނެ ކަމަށެވެ. އަދި ގްރީން ސްޓްރީޓްސް އަކީ ލީގަށް ވާދަކުރާ ޓީމެއް ކަމަށާއި، މިހާރު އެ ޓީމު އޮތީ ވަރަށް ރަނގަޅު ފޯމެއްގައި ކަމަށްވެސް ބުންޏެވެ. އެހެން ކަމުން ޓީސީން މި މެޗަށް ނުކުންނާނީ މާޒިޔާ އަދި ވެލެންސިއާ މެޗަށް ތައްޔާރުވި ވަރަށް ތައްޔާރުވެގެން ކަމަށްވެސް ޝާޒްލީ ވަނީ ބުނެފައެވެ.

ޓީސީއާ ދެކޮޅަށް ގްރީން ސްޓްރީޓްސް ނުކުންނައިރު، އެ ޓީމުންވެސް އަންނަނީ މި ފަހަކަށް އައިސް ލީގުގައި ރަނގަޅު ކުޅުމެއް ދައްކަމުންނެވެ. އެގޮތުން ކުޅުނު ހަ މެޗުން ލިބުނު އަށް ޕޮއިންޓާއެކު ގްރީން ސްޓްރީޓްސް އޮތީ ތާވަލުގެ ފަސްވަނައިގައެވެ.

ޓީސީ މެޗުގެ ކުރިން ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ މި މެޗަށް ނުކުންނައިރު އެ ޓީމަށް ފައިދާއެއް ނެތް ކަމަށާއި، މި މެޗު ވެގެންދާނީ އުނދަގޫ މެޗަކަށް ކަމަށެވެ. އަދި މެޗަށް ނުކުންނައިރު އޮތް އެންމެ ބޮޑު ހިތްހަމަޖެހުމަކީ ގްރީން ސްޓްރީޓްސްއިން މި ވަގުތު ރަނގަޅު ފޯމެއްގައި އޮތުން ކަމަށްވެސް ނިސްތާރު ބުންޏެވެ.

ދިރާގު ދިވެހި ޕްރިމިއާ ލީގުގައި ޓީސީ އާއި ގްރީން ސްޓްރީޓްސް ބައްދަލުކުރާ މެޗު ފަށާނީ ހުކުރު ދުވަހުގެ ހަވީރު 16:00 ގައެވެ.