އެކަނި ރިޔަލު ދޯންޏެއްގައި މަހަށް ނުކުމެ އުޅުނިކޮށް ގެއްލުނު މާފުށި މީހާ ފެނިފައިވާކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

އެމްއެންޑީއެފުން ބުނީ ކ. މާފުށި ޝޭޑީގްރޯވް، އުމުރުން 81 އަހަރުގެ އަޙްމަދު އާދަމް މަނިކު މަހަށް ގޮސް ޚަބަރެއް ނުވެގެން ހޯދަންފެށީ ބުރާސްފަތި ދުވަހުގެ ފަތިހު 05:30 އެހާކަންހާއިރުން ފެށިގެން ކަމަށެވެ.

އަޙްމަދު އާދަމް މަނިކު ފެނިފައިވަނީ އެމްއެންްޑީއެފުން ކުރި މަސައްކަތުން ބުރާސްފަތި ދުވަހުގެ ހަވީރު 18:26 އެހާކަންހާއިރު ރަންނާޅި ރިސޯޓު ކައިރިންނެވެ. އަދި މިހާރު ރިޔަލު ދޯންޏާއި އަޙްމަދު އާދަމް މަނިކު މާފުށްޓަށް ގެންދިޔުމުގެ މަސައްކަތް ކުރަމުން އަންނަ ކަމަށް އެމްއެންޑީއެފުން ބުނެއެވެ.

އެކަނި ކަނޑު ދަތުރު ނުކުރުމަށް އެމްއެންޑީއެފުން ތަކުރާރުކޮށް އަންނަނީ އިލްތިމާސް ކުރަމުންނެވެ. ނަމަވެސް މަހަށް ދިޔުމަށާއި، ފީނަން ދިޔުމަށް، އެކަނި ކަނޑު އުޅަނދުގައި ދަތުރުކުރާ މީހުން ގިނައެވެ.