ޔުނައިޓެޑުން ލީޑު ދެމެހެއްޓިއިރު، ސިޓީ ދެވަނައަށް

އިނގިރޭސި ޕްރިމިއާ ލީގުގައި ބުދަ ދުވަހުގެރޭ ފުލަމް ބަލިކޮށް ތާވަލުގެ އެއްވަނައިގައި މެންޗެސްޓާ ޔުނައިޓެޑުން ތިން ޕޮއިންޓުގެ ލީޑު ދަމަހައްޓައިފިއެވެ.

ރަށުން ބޭރުގައި ކުޅުނު މެޗުން ޔުނައިޓެޑް މޮޅުވީ ފަހަތުން އަރައި 2-1 ގެ ނަތީޖާއަކުންނެވެ. މި މެޗާއެކު ޔުނައިޓެޑުން ވަނީ ޕްރިމިއާ ލީގުގައި ރަށުން ބޭރުގައި މެޗަކުން ބަލިނުވެ 17 މެޗު ހަމަކޮށްފައެވެ.

ބުދަ ދުވަހުގެރޭ ކުޅުނު މެޗުގެ ވަރަށް ކުރީކޮޅު ފުލަމުން ވަނީ ލަނޑު ޖަހާ ލީޑު ނަގާފައެވެ. މެޗު ފަށައިގެން ފަސްވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޒުވާން ފޯވާޑް އަޑެމޯލާ ލުކްމަންއެވެ. އެކަމަކު ފުރަތަމަ ހާފުގައި ތަޖުރިބާކާރު ފޯވާޑް އެޑިންސަން ކަވާނީ ކާމިޔާބުކޮށްދިން ލަނޑުން ޔުނައިޓެޑުން ވަނީ މެޗުގައި ނަތީޖާ އެއްވަރުކޮށްފައެވެ.

މި މެޗުގައި ޔުނައިޓެޑުން ފަހަތުން އަރައި ލީޑު ނަގާފައިވަނީ މެޗުގެ 65 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބިކޮށްދިނީ މިޑްފީލްޑަރު ޕައުލް ޕޮގްބާއެވެ. އަދި އޭގެ ފަހުން ލަނޑު ޖެހުމަށް ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މެޗުގެ 75 ވަނަ މިނެޓުގައި ނަތީޖާ އެއްވަރުކުރަން ފުލަމްގެ މިޑްފީލްޑަރު ރުބެން ލޮފްޓަސް-ޗީކަށް ވަނީ ރަނގަޅު ފުރުސަތެއް ލިބިފައެވެ. އެކަމަކު އޭނާ ފޮނުވާލި ހަމަލާ ޔުނައިޓެޑުގެ ގޯލްކީޕަރު ޑޭވިޑް ޑެ ހެއާ ވަނީ ހުށިޔާރުކަމާއެކު ދިފާއުކޮށްފައެވެ.

މި މޮޅާއެކު ޔުނައިޓެޑް އެއްވަނައިގައި ތިން ޕޮއިންޓުގެ ލީޑު ދެމެހެއްޓިއިރު، އެ ޓީމަށް ވަނީ ކުޅުނު 19 މެޗުން 40 ޕޮއިންޓް ލިބިފައެވެ. އަދި ޔުނައިޓެޑް އަތުން ބަލިވި ފުލަމް އޮތީ ތާވަލުގެ ފުލުން ތިންވަނައިގައި 18 މެޗުން 12 ޕޮއިންޓާއެކުއެވެ.

މީގެ އިތުރުން ޕްރިމިއާ ލީގުގެ ދެވަނައަށް ސިޓީ ޖެހިލީ ބުދަ ދުވަހުގެރޭ އަމިއްލަ ދަނޑުގައި ކުޅުނު މެޗުން އެސްޓަން ވިލާ އަތުން 2-0 ގެ ނަތީޖާއަކުން މޮޅުވެގެންނެވެ. މި މެޗުގައި ސިޓީ ކޮޅަށް ލަނޑެއް ވަދެފައި ނުވާއިރު، މިއީ މި ސީޒަނުގައި ސިޓީން ހޯދި 10 ވަނަ ކްލީން ޝީޓެވެ.

ބުދަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، މި މެޗުގައި ސިޓީން ލީޑު ނަގާފައިވަނީ 79 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ބެނާޑޯ ސިލްވާއެވެ. އަދި މެޗުގެ ފަހު މިނެޓުގައި ލިބުނު ޕެނަލްޓީއަކުން މިޑްފީލްޑަރު އިލްކާއީ ގުންޑޮގާން ވަނީ ސިޓީއަށް ލީޑު ފުޅާކޮށްދީފައެވެ. މިއީ އޭރިއާ ތެރެއިން ވިލާގެ މެޓީ ކޭޝްގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ.

މި މޮޅާއެކު ތާވަލުގެ ދެވަނައަށް ސިޓީ ޖެހިލީ ކުޅުނު 18 މެޗުން ލިބުނު 38 ޕޮއިންޓާއެކުއެވެ. ތާވަލުގެ ތިންވަނައިގައި އޮތް ލެސްޓާ ސިޓީއަށްވެސް 38 ޕޮއިންޓް ލިބިފައިވާއިރު، އެ ޓީމުން ވަނީ ސިޓީއަށްވުރެ އިތުރަށް އެއް މެޗު ކުޅެފައެވެ. އަދި ބުދަ ދުވަހުގެރޭ ސިޓީ އަތުން ބަލިވި ވިލާ އޮތީ ތާވަލުގެ 11 ވަނައިގައި 16 މެޗުން 26 ޕޮއިންޓާއެކުއެވެ.