ދެއްވަދޫ ކްލަސްޓާއިން ފެނުނު ކޮވިޑް-19 ކޭސްތަކުގެ އަދަދު 78 އަށް
21 ޖެނުއަރީ 2021 | ބުރާސްފަތި 00:42ދެއްވަދޫ ކްލަސްޓާގައި ޖުމްލަ 476 ކޮންޓެކްޓުން
ގއ. ދެއްވަދޫ
ގއ. ދެއްވަދޫއިން ފެނުނު ކޮވިޑް-19 ކްލަސްޓާއިން މިހާތަނަށް 78 ކޭސްއެއް ފެނިފައިވާ ކަމަށް އެޗްޕީއޭއިން ބުނެފިއެވެ.
ކޮވިޑް-19އާ ގުޅިގެން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވިދާޅުވީ ދެއްވަދޫ ކްލަސްޓާއިން މިހާތަނަށް 476 ކޮންޓެކްޓުން ފެނިފައިވާ ކަމަށާއި 78 މީހަކު ޕޮޒިޓިވްވެފައިވާ ކަމަށެވެ. އަދި އޭގެ ތެރެއިން ދެއްވަދޫއިން ޕޮޒިޓިވްވެފައި ވަނީ 71 މީހުން ކަމަށް ވެސް ވިދާޅުވިއެވެ.
އޭގެއިތުރަށް އެ ކަލަސްޓާއިން ހަ މީހަކު ދާންދޫން ވަނީ ޕޮޒިޓިވްވެފައެވެ. އަދި ލ. ފޮނަދޫއިން ހަތަރު މީހެއްގެ އިތުރަށް ހުޅުމާލެއިން ދެ މީހުން އަދި ގއ. ވިލިގިލިން ދެ މީހަކު ވަނީ ޕޮޒިޓިވްވެފައެވެ. އެ ކްލަސްޓާއާ ގުޅިގެން މިވަގުތު މޮނިޓަރިންގައި އޮތީ ދެއްވަދޫއާއި ދާންދޫއެވެ.
ދެއްވަދޫއިން އެންމެ ފުރަތަމަ ކޮވީޑް-19 ކޭސް ފެނިފައި ވަނީ މިދިޔަ ޑިސެމްބަރު 24ގައެވެ. އެރަށަށް ކަރަންޓީނަށް ދިޔަ އާއިލާ އަކުން ކުޑަ ކުއްޖަކު ޕޮޒިޓިވްވި އިރު އޭރު ބެލެވުނީ ބަލި ފެތުރުނީ އެއާއިލާއިން ކަމަށެވެ. ނަމަވެސް އެ އާއިލާއިން އިތުރު އެއްވެސް މީހަކު ޕޮޒިޓިވްވެފައެއް ނުވެއެވެ. އަދި ފަހުން އެޗްޕީއޭއިން ބުނިގޮތުގައި ރަށުގައި އެ ބަލި ފެތުރިފައި އޮންނަތާ ދުވަސްތަކެއް ވަނީ ވެފައެވެ.
