ހަނދާނުން ފިލުވާ ނުލުމަށް އިލްތިމާސް ކުރައްވަމުން ޓްރަމްޕް ވައިޓްހައުސްއިން ނުކުމެވަޑައިގެންފި
20 ޖެނުއަރީ 2021 | ބުދަ 14:20ވައިޓްހައުސް އިން ނުކުތުމަށްފަހު ވަޑައިގަންނަވާނީ ފްލޮރިޑާއަށް
ރަތް ދޫލައިގައި ރައީސް ޑޮނަލްޑް ޓްރަމްޕާއި އަނބިކަނބަލުން މެލާނިއާ ޓްރަމްޕް ވައިޓްހައުސްއިން ނުކުމެވަޑައިގަންނަވަނީ
އެމެރިކާގެ އިންތިޚާބީ ރައީސް ޖޯ ބައިޑެން ހުވާ ކުރެއްވުމުގެ ރަސްމިއްޔާތަށް މަޑުނުކުރައްވައި ރައީސް ޑޮނަލްޑް ޓްރަމްޕް ވައިޓްހައުސްއިން ނުކުމެވަޑައިގެންފިއެވެ.
ބުދަ ދުވަހު ޓްރަމްޕް ވައިޓްހައުސްއިން ނުކުންނަވަމުން ދެއްވި ފަހު ސްޕީޗުގައި ވަނީ އެމަނިކުފާނު މަތިން ހަނދާން ކުރެއްވުމަށް އެމެރިކާގެ ރައްޔިތުންނަށް ގޮވާލައްވާފައެވެ. ޓްރަމްޕް ވިދާޅުވީ، ވަދާއުގައި ދުރަށް ވަޑައިގަންނަވަނީ މާ ގިނަ ދުވަހަކަށް ނޫން ކަމަށެވެ.
ފަހު ސްޕީޗު ދެއްވުމަށްފަހު ޓްރަމްޕް ވަނީ މެރިން ވަން ހެލިކޮޕްޓަރަށް އަރާވަޑައިގެންފައެވެ. ރަތް ދޫލައިގައި ޓްރަމްޕް ވަޑައިގެންއިރު، 21 ބަޑީގެ ސަލާމެއްވެސް އަރުވާފައިވާ ކަމަށް އެމެރިކާގެ ނޫސްތަކުން ރިޕޯޓް ކޮށްފައިވެއެވެ.
ރިޕޯޓުތައް ބުނާގޮތުން ޓްރަމްޕް ދެން ވަޑައިގަންނަވާނީ ފްލޮރިޑާއަށެވެ. އެއާއެކު ޓްރަމްޕް ވެވަޑައިގެންފައި މިވަނީ ފަހުގެ ތާރީޚެއްގައި އެމެރިކާގެ ރައީސަކު ހުވާ ކުރައްވާ ރަސްމިއްޔާތުގައި ބައިވެރިވެވަޑައިނުގަންނަވާ ފުރަތަމަ ރައީސަށެވެ.
ސީއެންއެންގައި ރިޕޯޓު ކޮށްފައިވާ ގޮތުން ޓްރަމްޕް މި ނިންމުން ނިންމަވާފައިވަނީ ކުރީގެ ރައީސްއެއްގެ ހައިސިއްޔަތުން ވައިޓް ހައުސްއިން ނުކުންނަން ބޭނުންވެވަޑައިނުގަންނަވާތީއެވެ.
މީގެ އިތުރުން ސީއެންއެންއިން ރިޕޯޓުކޮށްފައިވާ ގޮތުގައި މި ނިންމުން ޓްރަމްޕް ނިންމެވި އަނެއް ސަބަބަކީ ވައިޓް ހައުސްއިން ނުކުމެ ވަޑައިގެން އެއަރ ފޯސް 1 ބޭނުން ކުރުމަށް ޖޯ ބައިޑަންގެ ފަރާތުން އެދުމަށް ބޭނުންވެވަޑައިނުގަންނަވާތީއެވެ.
