ކޮވިޑް-19ގެ ބަލިމަޑުކަމުގެ ހާލަތުގައި ގައުމުތަކަށް ވެކްސިން ފޯރުކޮށްދިނުމުގައި އިންޑިއާއިން އިސްކުރާނީ އިންސާނިއްޔަތުކަން ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވެއްޖެ އެވެ.

އިންޑިއާއިން ރާއްޖެއަށް ފޯރުކޮށްދިން އެއް ލައްކަ ވެކްސިން ޑޯޒް ރާއްޖެއަށް ގެނައުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން ސަންޖޭ ސުދީރު ވިދާޅުވީ ވެކްސިން އުފައްދާ ގައުމުތަކާއި ބޮޑެތި އެކި ގައުމުތަކުން ވެކްސިން ގަނެ ނިކަމެތި ގައުމުތަކަށް ފޯރުކޮށްދިނުމުގެ ބަދަލުގައި އެ ފޮރުވުމުން ނިކަމެތި ގައުމުތައް ހާލުގައި ޖެހޭނެ ކަމަށެވެ. އޭނާ ވިދާޅުވީ އިންޑިއާއިން އެގޮތަށް ކަންތައް ނުކުރާނެ ކަމަށެވެ. މި އަނދިރި ހާލަތުގައިވެސް އިންޑިއާއިން އިންސާނިއްޔަތުކަން އިސްކުރާނެ ކަމަށާއި އަވައްޓެރި ގައުމުތައް ހާލުގައި ނުޖެހޭނެކަން ޔަގީންކުރައްވާނެ ކަމަށްވެސް ވިދާޅުވި އެވެ.

ސަފީރު ވިދާޅުވީ ރާއްޖެއަކީ އިންޑިއާގެ ހާރިޖީގުޅުންތަކުން ހާއްސަ ގުޅުމެއް އޮންނަ ގައުމެއް ކަމަށެވެ. އެގޮތުންރާއްޖެއިން ވެސް ކޮންމެ ކަމެއްގައި ވެސް އިންޑިއާ އިސްކުރާ ގޮތަށް އިންޑިއާއިން ވެސް އެ އުސޫލު ގެންގުޅޭނެ ކަމުގައި ވިދާޅުވި އެވެ.

އެގޮތުން އިންޑިއާގައި ވެކްސިން ޖަހަން ފެށި ފަހުން އެ ގައުމުން ވެކްސިން ފޯރުކޮށްދިން ފުރަތަމަ ގައުމަކީ ރާއްޖެ ކަމަށް އޭނާ ވިދާޅުވިއެވެ.

ރާއްޖޭގެ އިތުރަށް ބޫޓާން، ބަންގްލަދޭޝް، ސީޝެލްސް، މިޔަންމާ، ނޭޕާލް، ސްރީލަންކާ އަދި މޮރިޝަސްއަށް ވެސް ކުރިއަށް އޮތް ދެތިންދުވަހުގެ ތެރޭގައި ވެކްސިން ފޯރުކޮށްދޭނެ ކަމަށް ވެސް އޭނާ ވިދާޅުވި އެވެ.

އިންޑިއާއިން ފޯރުކޮށްދޭ ވެކްސިންއާ ގުޅިގެން ސަންޖޭ ސުދީރު ވިދާޅުވީ އިންޑިއާއަކީ މުޅި ދުނިޔޭގައިވެސް ފާމަސީގެ ނަމުން މަޝްހޫރު ގައުމު ކަމަށެވެ. އެގޮތުން ދުނިޔޭގެ އެކި ގައުމުތަކުގައި މިހާރުވެސް ބޭނުންކުރާ 60% ވެކްސިންއަކީ އިންޑިއާގެ އުފެއްދުންތަކެއް ކަމަށް އޭނާ ވިދާޅުވި އެވެ.

ވަކިން ހާއްސަކޮށް އެގައުމުން ރާއްޖެއަށް ގެނައި ވެކްސިން އުފެއްދި ސިރަމްއާ ގުޅޭގޮތުން ވިދާޅުވީ އެއީ މުޅި ދުނިޔޭގައި ވެސް ވެކްސިން އުފައްދާ އެންމެ ބޮޑު އިންސްޓިޓިއުޓް ކަމަށެވެ. އެގޮތުން ދުނިޔޭގެ 175 ގައުމެއްގައި 65% ކުޑަކުދިންނަށް ސިރަމް އިން އުފައްދާފައިވާ ކޮންމެވެސް އެއް ވެކްސިންއެއް ދީފައިވާނެ ކަމުގެ ޔަގީންކަން އެބައޮތް ކަމަށް ވެސް ސަފީރު ވިދާޅުވިއެވެ.