ރާއްޖެއަށް ވެކްސިންގެ ފުރަތަމަ ޝިޕްމަންޓް ގެނެސްފި
ވެކްސިން ޖެހުމުން ދިމާވެދާނެ ސައިޑް އިފެކްޓުތަކަށް ރަނގަޅަށް ބެލޭނެ
ވެކްސިން ހިފައިގެން ރާއްޖެ އައި ފްލައިޓް
ސިރަމް އިންސްޓިޓިއުޓުން އުފައްދާފައިވާ އޮކްސްފޯރޑް އެސްޓްރަޒެނެކާގެ ކޮވިޝީލްޑް ވެކްސިން ރާއްޖެއަށް ގެނެސްފިއެވެ.
އިންޑިއާއިން ފުރައިގެން، އެއަރ އިންޑިއާގެ ފްލައިޓް، ވެކްސިން ހިފައިން ރާއްޖެ އައިސްފައިވާއިރު ފްލައިޓް ޖައްސާފައިވަނީ 02:42 ގައެވެ.
ރާއްޖޭގެ އިތުރުން، ބޫޓާނާއި، ނޭޕާލް އަދި މިޔަންމާ ފަދަ ޤައުމުތަކަށް ވެސް އިންޑިއާގެ ވެކްސިން ފޯރުކޮށްދިނުމަށް ހަމަޖެހިފައިވާކަން ވަނީ ހާމަކޮށްފައެވެ.
ރާއްޖޭގައި ބޭނުންކުރާ ވެކްސިންތައް ދުނިޔޭގެ ސިއްޙަތު ޖަމްޢިއްޔާގެ މިންގަނޑުތަކަށް ފެތޭނެ ކަމަށާއި، އަދި ރައްކާތެރިކަމުގެ މިންގަނޑުތައް ބަލައި ކަށަވަރު ކުރެވޭނެ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ހާމަކޮށްފައެވެ.
އެޗް.ޕީ.އޭ.އިން ބުނީ ރާއްޖޭގައި ބޭނުން ކުރާ ވެކްސިންތަކަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ހުއްދަ އޮންނާނެ ކަމަށާއި، ވެކްސިން ޖެހުމުން ދިމާވެދާނެ ސައިޑް އިފެކްޓުތަކަށް ރަނގަޅަށް ބެލޭނެ ކަމަށެވެ.
އެޗް.ޕީ.އޭ.އިން މީގެ ކުރިން ބުނެފައި ވަނީ ރާއްޖެއަށް ލިބޭ ވެކްސިން އެންމެ ފުރަތަމަ ފޯރުކޮށްދޭނީ ފްރޮންޓްލައިން ހެލްތް ވޯކަރުންނާއި އުމުރުން ދުވަސްވީ މީހުންނަށް ކަމަށެވެ.
އިންޑިއާއިން އުފެއްދި ވެކްސިން އެ ގައުމުގެ އެތައްހާސް ބަޔަކަށް މިހާތަނަށް ދީފައިވާއިރު، ބޭރު ގައުމަކަށް ވެކްސިން ފުރަތަމަ ފޯރުކޮށްދޭން އެ ގައުމުން ނިންމީ ދިވެހިރާއްޖެއަށާއި ބޫޓާންއަށެވެ.
