ފެލިވަރުގެ މަޝްރޫޢުއާއިއެކު ދުވަސްވީ ގިނަ މައްސަލަތަކަކަށް ހައްލު ލިބިގެންދާނެ - މިނިސްޓަރ ޒަހާ
19 ޖެނުއަރީ 2021 | އަންގާރަ 10:50މަސްވެރިކަމުގެ ސިނާއަތުގައި ކުރާ މަސައްކަތަކީ ލަފާފުރާ ބަނދަރެއްގެ ތެރޭގައި ހިނގަން ޖެހޭ މަަސައްކަތްތަކެއް ކަމަށް ވިދާޅުވި
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު
ޅ. ފެލިވަރުގެ މަޝްރޫޢުއާއެކު މަސްވެރިކަމުގެ ސިނާއަތުގައި މިހާރު ދުވަސްވީ ގިނަ މައްސަލަތަކަކަށް ހައްލު ލިބިގެން ދާނެކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވަނީ ޅ. ފެލިވަރުގެ ބިންހިއްކުމާއި، ބަނދަރު ހެދުމުގެ މަސައްކަތް ހަވާލުކުރުމަށް އަންގާރަ ދުވަހު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ޕަބްލިކް ލިމިޓެޑް (އެމްޓީސީސީ)އާއި ހަވާލު ކުރުމަށް ޕްލޭނިންގ މިނިސްޓްރީގައި ބޭއްވި ރަސްމިއްޔާތެއްގައި ވާހަކަ ދައްކަވަމުންނެވެ.
މިނިސްޓަރ ވިދާޅުވީ ފެލިވަރުގެ ސްޓޯރޭޖް އިތުރު ކުރުމަށް ބޭނުންވާ ބިން ހިއްކުމުގެ މަޝްރޫއު މުހިއްމު ވަނީ މަސްވެރިކަމުގެ ސިނާއަތުގައި ކުރާ މަސައްކަތަކީ ލަފާފުރާ ބަނދަރެއްގެ ތެރޭގައި ހިނގަން ޖެހޭ މަަސައްކަތްތަކަކަށް ވާތީކަމަށެވެ.
މިިނިސްޓަރ އިތުރަށް ވިދާޅުވީ މި މަސައްކަތް ނިމެންވާއިރަށް ފެލިވަރަށް ގެންނަންޖެހޭ އެހެނިހެން އުމްރާނީ ތަރައްގީއަށް ބޭނުންވާ ފައިސާ މިހާރު ލިބިފައިވާ ކަމަށެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި 218.9 މީޓަރ ގެ ބޮޑުހިލަ ބޭރުތޮށިލުން، 264.8 މީޓަރ ބޮޑުހިލައިގެ ރިވެޓްމަންޓް ޖެހުން ހިމެނެއެވެ. އަދި 2,466 ސްކެއަރ މީޓަރ ޕޭވްމަންޓް ހެދުމާއި، 9 ބޮލަރޑް ހަރުކުރުމާއި، 95 ފެންޑަރ ހަރުކުރުމުގެ އިތުރުން 1،79,780.40 ކިއުބިކް މީޓަރ ބަނދަރު ފުންކުރުމާއި ބިން ހިއްކުން ހިމެނެއެވެ.
މި މަސައްކަތަކީ ފެލިވަރުގައި ކޯލްޑް ސްޓޯރޭޖް ކެޕޭސިޓީ އިތުރުކުރުމަށް އިންޑިއަން އެގްޒިމްގެ ލައިން އޮފް ކްރެޑިޓްގެ ތެރެއިން މަޝްރޫއެއް ކުރިއަށް ގެންދިއުމަށް ހަމަޖެހިފައިވުމާ ގުޅިގެން، މި މަސައްކަތަށް ބޭނުންވާ ބިންހިއްކުމާއި ބޮޑެތި ބޯޑު ކައިރި ކުރެވޭގޮތަށް އެއްގަމުތޮށި ޑިޒައިންކޮށް ކޮންސްޓްރަކްޓް ކުރުމަށްޓަކައި ހިންގޭ މަޝްރޫޢުއެކެވެ.
މި މަޝްރޫޢުތަކަށް ޚަރަދުކުރުމަށް ހަމަޖެހިފައިވަނީ ހަތަރު އަހަރަށް ބަހާލައިގެން ޑިފާރޑް ޕޭމަންޓް އުސޫލުން ސަރުކާރު ބަޖެޓުންނެވެ. މި ކޮންޓްރެކްޓްގައި މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ ގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާޠިމަތު ޝާނާ ފާރޫޤެވެ. މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީގެ ފަރާތުން ސޮއި ކުރެއްވީ ސީއީއޯ އާދަމް އާޒިމެވެ.
މި މަޝްރޫއުއަކީ 113.3 މިލިޔަން ރުފިޔާ ޚަރަދުކޮށްގެން ހިންގުމަށް ހަމަޖެހިފައިވާ މަޝްރޫއުއެކެވެ.
