އެމްއެންޔޫއިން އެންމެ ފަހުގެ ނެވިގޭޝަން ސިމިއުލޭޓަރ އިފްތިތާޙުކޮށްފި
ކުރިން ބޭނުން ކުރަމުން އައީ ކުރީގެ ނެވިގޭޝަން ސިމިއުލޭޓަރއެއް
މިނިސްޓަރ އަސްލަމް ނެވިގޭޝަން ސިމިއުލޭޓަރ ބައްލަވާލައްވަނީ
ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އެންމެ ފަހުގެ ނެވިގޭޝަން ސިމިއުލޭޓަރ އިފްތިތާޙުކޮށްފިއެވެ.
ވިގޭޝަން ސިމިއުލޭޓަރ އިފްތިތާޙުކުރުމުގެ ރަސްމިއްޔާތު އަންގާރަ ދުވަހު ސެންޓަރ ފޯ މެރިޓައުމް ސްޓަޑީޒްގައި ބާއްވާފައިވާއިރު ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމްއެވެ.
މިނިސްޓަރ އަސްލަމް ވަނީ ނެވިގޭޝަން ސިމިއުލޭޓަރ ހުންނެވި ސަރަހައްދަށް ގޮސް އެތަން ބައްލަވާ ލައްވާފައެވެ.
ނެވިގޭޝަން ސިމިއުލޭޓަރ އަކީ ނެވިކަމުގެ ހުނަރު ލިބިގަތުމުގެ އަމަލީ ތަޖުރިބާ ދަސްކޮށްދޭ ވަސީލަތެކެވެ. އެމްއެންޔޫ އިން ބުނީ މީގެ ކުރިން ވެސް އެތާނގައި ސިމިއުލޭޓަރެއް ހުރި ކަަމަށެވެ. އެހެންނަމަވެސް އެއީ ވަރަށް ކުރީގެ ސިމިއުލޭޓަރއަކަށްވުމުން މިހާރު އެންމެ ފަހުގެ ސިމިއުލޭޓަރއެއް ގެނެސްފައިވާ ކަމަށެވެ.
ރާއްޖެއެމްވީއަށް މަޢުލޫމާތު ދެއްވަމުން ސެންޓަރ ފޯ މެރިޓައިމް ސްޓަޑީޒްގެ ހެޑް އޮފް ސެންޓަރ ކެޕްޓަން މުހައްމަދު ޒާހިރު ވިދާޅުވީ އެމްއެންޔޫގެ އަމަޒާކީ އެންމެ ފަހުގެ ވަސީލަތްތައް ބޭނުންކޮށްގެން ކުދިންނަށް ކިޔަވައިދިނުން ކަމަށެވެ. ރާއްޖޭގައި މެރިޓައިމް އިންޑަސްޓްރީ އަކީ ވަޅު ޖެހެމުން އަންނަ އިންޑަސްޓްރީއެއްކަން ފާހަގަކުރައްވާ ކެޕްޓަން ވިދާޅުވީ އެމްއެންޔޫގެ އަމާޒަކީ ޤާބިލް ކުދިން ބިނާކޮށްގެން އިންޑަސްޓްރީ އަލުން އަނބުރާ ކޮޅަށް ޖެހުން ކަމަށެވެ.
ކެޕްޓަން މުހައްމަދު ޒާހިރު އިތުރަށް ވިދާޅުވީ މިއަހަރު ވެސް ޔުނިވަރސިޓީއިން މަސައްކަތް ކުރަނީ ނޯޓަކިލް ދާއިރާއިން ޑިގްރީ ފެންވަރަށް ކުދިންނަށް ކިޔަވައިދިނުން ކަމަށެވެ.
ކެޕްޓަން މުހައްމަދު ޒާހިރު ވިދާޅުވީ މިއީ ބުރަކަމެއް ކަމަށާއި، އެހެން ނަމަވެސް މި ދާއިރާ ކުރިއެރުވޭނެ ކަމަށެވެ.
