ޕޮޒިޓިވްވާ ކޭސްތައް 50ން މަތީގައި ހުންނަތާ 3 ދުވަސް
18 ޖެނުއަރީ 2021 | ހޯމަ 17:47ރަށްރަށުން 8 މީހަކު، އަދި ރިސޯޓުތަކުން 26 މީހަކު ކޮވިޑަށް ޕޮޒިޓިވްވެފައިވޭ
ކޮވިޑް-19 ސާމްޕަލް ނެގުމަށް ހަރަކާތްތެރި ވަނީ
ރާއްޖެއިން އިތުރު 69 މީހަކު ކޮވިޑް-19ށް ޕޮޒިޓިވް ވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖެއިން އިތުރު 69 މީހަކު ކޮވިޑަށް ޕޮޒިޓިވް ވެފައިވާއިރު މީގެން 35 މީހުންނަކީ މާލެ ސަރައްހަދުން ޕޮޒިޓިވްވި މީހުންނެވެ.
މީގެ އިތުރުން ރަށްރަށުން 8 މީހަކު، އަދި ރިސޯޓުތަކުން 26 މީހަކު ކޮވިޑަށް ޕޮޒިޓިވްވެފައިވެއެވެ.
އެއާއެކު، ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ ޖުމުލަ އަދަދު ވަނީ 14،582ށް އަރާފައެވެ. އޭގެ އިތުރުން، މިހާތަނަށް ރާއްޖެއިން ކޮވިޑް ޖެހިގެން ރަނގަޅުވި މީހުންގެ އަދަދު ވަނީ 13،566ށް އަރާފައެވެ. އަދި މިވަގުތުގެ އެކްޓިވް ކޭސްތަކުގެ އަދަދަކީ 960އެވެ.
މީގެ އިތުރުން ފާއިތުވި 24 ގަޑިއިރު ނަގާފައިވާ 3،330 ސާމްޕަލްއާއެކު، މިހާތަނަށް ރާއްޖެއިން ކޮވިޑަށް ޓެސްޓް ކުރުމަށް ނަގާފައިވާ ސާމްޕަލްތަކުގެ ޖުމުލަ އަދަދު ވަނީ 3،67،424ށް އަރާފައެވެ.
ރާއްޖެއިން ކޮވިޑްގެ ކޭސްތައް ފެންނަމުންދާ މިންވަރު އަނެއްކާވެސް އިތުރު ވަމުންދާއިރު ރަށްރަށުންނާއި ރިސޯޓުތަކުގެ މުވައްޒަފުން ބައްޔަށް ޕޮޒިޓިވްވާ މިންވަރު ދަނީ އިތުރު ވަމުންނެވެ. މިއާއެކު އެޗްޕީއޭގެ އުސޫލުތަކާއި ގަވައިދުތަކަށް ރަނގަޅަށް އަމަލު ކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސް ކުރަމުންނެވެ.
ރާއްޖެއިން މިހާތަނަށް ކޮވިޑް ޖެހިގެން މަރުވެފައިވަނީ 49 މީހެކެވެ.
