ލޯންޗެއް ދިޔަވާތީ އެމްއެންޑީއެފުން ހަރަކާތްތެރިވަނީ
އެ ލޯންޗާއިއެކު ކޯސްޓްގާޑުގެ ލޯންޗު ދަތުރު ކުރަމުން ދާކަމަށް އެމްއެންޑީއެފުން ހާމަ ކޮށްފައިވޭ
7 ދިވެހިންނާއިއެކު މަހަށް ފުރި \'ބްލެކް ހެރޮން\' ލޯންޗު ކަނޑުމަތީގައި
ސ. ހިތަދޫން 7 ދިވެހިންނާއިއެކު މަހަށް ފުރި 'ބްލެކް ހެރޮން' ލޯންޗު ދިޔަވަމުން ދިއުމާއި ގުޅިގެން މޯލްޑިވްސް ނެޝެނަލް ޑީފެންސް ފޯސް (އެމްއެންޑީއެފް)ގެ ސަދަރން އޭރިއާގެ ކޯސްޓްގާޑުން ހަރަކާތްތެރިވަމުން އެބަގެންދެއެވެ.
އެމްއެންޑީއެފުން ބުނީ މި ހާދިސާގެ ރިޕޯޓު ލިބިފައިވަނީ ހޯމަ ދުވަހުގެ ހަވީރު 05:30ގައި ކަމަށެވެ. އެމްއެންޑީއެފުން ބުނީ ލޯންޗު ދިޔަވާން ފަށާފައިވަނީ ސ. ހިތަދޫ ކައިރިއަށް މަސް ބާނަން ނުކުމެ އުޅެނިކޮށް ކަމަށެެވެ.
އަދި އެ ލޯންޗު ހިތަދޫއަށް ވެއްދުމުގެ މަސައްކަތް ފުލުހުންގެ ކޯސްޓްގާޑުގެ ޓީމުން މަސައްކަތް ކުރަމުން ދާކަމަށާއި އެ ލޯންޗާއިއެކު ކޯސްޓްގާޑުގެ ލޯންޗު ދަތުރު ކުރަމުން ދާކަމަށް އެމްއެންޑީއެފުން ހާމަ ކޮށްފައިވެއެވެ.
ކަނޑުމަތީގައި ދިމާވާ އެކިއެކި ހާދިސާތަކަށް ކޯސްޓްގާޑުން ވަގުތުން ވަގުތަށް އެހީތެރިކަން ފޯރު ކޮށްދެމުން ދާއިރު ފާއިތުވި އަހަރުތަކުގެ ތެރޭގައި ކޯސްޓްގާޑުން ފާހަގަކޮށްލެވޭ ގިނަ ކުރިއެރުންތަކެއް ހޯދާފައި ވެއެވެ. އެގޮތުން ކޯސްޓްގާޑަށް މިހާތަނަށް ލިބުނު އެންމެ ބޮޑު ކުރިއެރުމަކީ އިންސާނީ ވަސީލަތާއި އެހެނިހެން ވަސީލަތްތައް އެކަށީގެންވާ ވަރަށް ހޯދުމާއި ކޯސްޓްގާޑުގެ ފްލީޓް ބޮޑުކޮށް ހިދުމަތް ފުޅާކުރުމުގައި ލިބިފައިވާ ކާމިޔާބީ ކަން އެމްއެންޑީއެފުން ފާހަގަކުރެ އެވެ.
އެމްއެންޑީއެފް އިން ބުނިގޮތުގައި ކޯސްޓްގާޑުގެ އިންސާނީ ވަސީލަތްތައް އިތުރުކުރުމަށް ރާއްޖެއާއި ރާއްޖެއިން ބޭރުން ވެސް މީހުން ތަމްރީންކޮށް ގައުމީ ފެންވަރުގެ ސަނަދުތައް ދަނީ ފޯރުކޮށްދެމުންނެވެ. މީގެ އިތުރަށް ބޭރުގެ އަސްކަރިއްޔާތަކާ ގުޅިގެން ޑައިވް ކޯސްތަކާއި ކަނޑުމަތީގެ ރައްކާތެރިކަމުގެ އެކި ކަހަލަ ތަމްރީން ޕްރޮގްރާމްތަކާއި ކޯސްތައް ވެސް ކުރިއަށްގެންދާ ކަމަށް ބުންޏެވެ.
