ސިވިލް ސަރވިސް ކޮމިޝަންގެ އެސްޖީއަކަށް ޑރ މަރިޔަމް ޝަހުނީޒާ
17 ޖެނުއަރީ 2021 | އާދީއްތަ 13:11މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ހޯއްދެވި
ސިވިލް ސަރވިސް ކޮމިޝަން (ސީއެސްސީ) ގެ ސެކެޓަރީ ޖެނެރަލްއަކަށް އައްޔަނު ކުރެއްވި ޑރ މަރިޔަމް ޝަހުނީޒާ ނަސީރު
ސިވިލް ސަރވިސް ކޮމިޝަން (ސީއެސްސީ) ގެ ސެކެޓަރީ ޖެނެރަލްއަކަށް ޑރ މަރިޔަމް ޝަހުނީޒާ ނަސީރު އައްޔަނު ކޮށްފިއެވެ.
އާދިއްތަ ދުވަހު ސީއެސްސީން ވަނީ އެކަން ކަށަވަރު ކޮށްދީފައެވެ.
ޑރ ޝަހުނީޒާ ޕީއެޗްޑީ ހައްދަވާފައިވަނީ އެމެރިކާގެ ވޯލްޑަން ޔުނިވަސިޓީންނެވެ. މީގެ ކުރިން އޭނާ ވަނީ އިސްލާމިކް ޔުނިވަސިޓީގެ ޑެޕިއުޓީ ވައިސް ޗާންސެލަރ ކަން ވެސް ކުރައްވާފައެވެ.
ދިއްދޫއަށް އުފަން ޝަހުނީޒާ ވަނީ މަތީ ތަޢުލީމާއި ތަމްރީނުގެ ކޯހަކުން އެންމެމަތީ ވަނަ ހޯއްދެވި ބޭފުޅުންގެ ތެރޭގައި ހިމެނިވަޑައިގެން މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމުވެސް ހޯއްދަވާފައެވެ. މި އިނާމު އޭނާ ޙާސިލު ކުރައްވާފައިވަނީ 2012 ވަނަ އަހަރުއެވެ.
އޭގެ އިތުރުން ވިމެންއިން މެނޭޖްމަންޓުގެ ފަރާތުން ދޭ ޕްރޮފެޝަނަލް ވުމަން އެންޑް ކެރިއަރ އެވޯޑްސްގެ މެރިޓް އެވޯޑުވެސް ޑރ ޝަހުނީޒާ ޙާސިލު ކުރައްވާފައިވެއެވެ.
