ލާމަރުކަޒުކުރުން ދަތުރުފަތުރުގެ ނިޒާމާ އެއްވަރު: އަސްލަމް

އެންމެ އެކަށޭނަ ލާމަރުކަޒީ ނިޒާމެއް ޤާއިމުކުރެވޭނީ ފެންވަރު ރަނގަޅު ދަތުރުފަތުރުގެ ނިޒާމެއް ޤާއިމުކުރެވިގެންކަމަށް މިނިސްޓަރ އޮފް ނޭޝަނަލް ޕްލޭނިންގް، ހައުސިންގް އެންޑް އިންފްރާންސްޓްރަކްޗަރ މުހައްމަދު އަސްލަމް ވިދާޅުވެއްޖެެއެވެ. މިނިސްޓަރ މިހެން ވިދާޅުވީ، ޤައުމީ ފެރީގެ ވިއުގަ ޤާއިމުކުރުމަށް ރައްޔިތުންގެ ކުންފުނި އެމްޓީސީސީއާ ހަވާލުކުރުމަށް ބޭއްވި ސޮއިކުރުމުގެ ރަސްމިއްޔާތުގެ ތެރެއިންނެވެ.

މި ރަސްމިއްޔާތުގައި ނޫސްވެރިންނާ ވާހަކަދައްކަވަމުން، މިނިސްޓަރ އޮފް ނޭޝަނަލް ޕްލޭނިންގް، ހައުސިންގް އެންޑް އިންފްރާންސްޓްރަކްޗަރ މުހައްމަދު އަސްލަމް ވަނީ މި ނިޒާމަކީ ފުރިހަމަ ނިޒާމަކަށް ހެދުމައްޓަކައި 3 އަހަރަށް ދެމިގެންދާ މި ޕްލޭންގެ ހުރިހާ ތަފްސީލީ ޑިޒައިންތައް ނިންމާ ރައްޔިތުންނަށް ވީހާވެސް އަވަހަށް ޚިދުމަތް ދިނުމަށް އަމާޒު ހިފާފައިވާކަމަށެވެ.

Advertisement

މިނިސްޓަރ އަސްލަމް ވަނީ މި ނިޒާމަކީ މި ސަރުކާރުގެ ލާމަރުކަޒީ ނިޒާމާ ވެސް ވަރަށް ގުޅިފައިވާ ނިޒާމެއްކަމަށް ވިދާޅުވެފައެވެ. އެންމެ އެކަށޭނަ ލާމަރުކަޒީ ނިޒާމެއް ޤާއިމުކުރެވޭނީ ފެންވަރު ރަނގަޅު ދަތުރުފަތުރުގެ ނިޒާމެއް ޤާއިމުކުރެވިގެންކަމަށް މިނިސްޓަރ އަސްލަމް ވިދާޅުވިއެވެ. އެހެންކަމުން މި ނިޒާމު އިތުރަށް ހަރުދަނާކުރުމަށް ސަރުކާރުން ހާއްސަ އިސްކަމެއް ދެއްވާނެކަމަށް ވިދާޅުވިއެވެ. ރާއްޖޭގައި މިހާރު ވައިގެ ދަތުރުފަތުރުގެ ނިޒާމުގައި އުމްރާނީ ތަރައްޤީ ގެނެވިފައިވާއިރު، ކަނޑުގެ ދަތުރުފަތުރުގައި މި މަސައްކަތް ކުރަން ސަރުކާރުން އަމާޒު ހިފާފައިވާކަމަށް މިނިސްޓަރ ވިދާޅުވިއެވެ. މިނިސްޓަރ އަސްލަމް ވަނީ ސަބްސިޑައިޒްކޮށްގެން ވެސް މި ނިޒާމު މެދުކެނޑުމެއްނެތި ކުރިއަށްގެންދާނެކަމަށް ވިދާޅުވެފައެވެ.

މި ނިޒާމުގެ ސަބަބުން ރާއްޖޭގެ އެކި ކަންކޮޅުތަކުގައި ފެރީ ޓަރމިނަލްތައް ތަރައްޤީކޮށް އުމްރާނީ ތަރައްޤީ އަންނައިރު، މި ދަތުރުތަކުގައި ބޭނުންކުރުމަށް ޚާއްސަ ދޯނިފަހަރު ދިވެހި ވަޑިން ލައްވާ ބަނުމަކީ އެކަމުގެ ފައިދާ ދިވެހި އިޤްތިޞާދަށާއި ދިވެހިންނަށް ސީދާ ކުރާނެކަމަށް މިނިސްޓަރ އަސްލަމް ވިދާޅުވިއެވެ. މި ނިޒާމު ޤާއިމުކުރުމުގެ މަސައްކަތުގެ ދަށުން އެންމެ ފުރަތަމަ ޒޯން ހިމެނޭ ހއ، ހދ އަދި ށ އަތޮޅުގެ ފެރީ ނިޒާމު މިއަހަރުގެ ސެޕްޓެމްބަރ މަހާ ހަމައަށް ނިންމުމަށް ދަނީ މަސައްކަތް ކުރަމުންނެވެ.