އީގަލްސް ބަލިކޮށް ގްރީން ސްޓްރީޓްސް ތިންވަނައަށް

ދިރާގު ދިވެހި ޕްރިމިއާ ލީގުގައި ހުކުރު ދުވަހުގެރޭ ފަސޭހަކަމާއެކު ކުލަބު އީގަލްސް ބަލިކޮށް ތާވަލުގެ ތިންވަނައަށް ކުލަބު ގްރީން ސްޓްރީޓްސް ޖެހިލައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު ގްރީން ސްޓްރީޓްސްއިން ކާމިޔާބުކުރީ 4-1 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މެޗުގެ 28 ވަނަ މިނެޓުގައި ގްރީން ސްޓްރީޓްސްއިން ވަނީ ލަނޑު ޖަހާ ލީޑު ނަގާފައެވެ. ހަސަން ނަޒީމް (ޗޯޓު) ގެ އެހީތެރިކަމާއެކު މި ލަނޑު އެޓީމަށް ކާމިޔާބުކޮށްދިނީ މިޑްފިލްޑަރު އަލީ ޝާމިއުއެވެ. އަދި އޭގެ މިނެޓެއް ފަހުން ބިދޭސީ ފޯވާޑް އެންޖެލް މުނޯޒްގެ ލަނޑުން ގްރީން ސްޓްރީޓްސްއިން ވަނީ ލީޑު ފުޅާކޮށްފައެވެ. އަދި ފުރަތަމަ ހާފުގެ އިތުރު ވަގުތުގައި ޒުވާން މިޑްފީލްޑަރު އަބްދުﷲ ޔާމީން ވަނީ ގްރީން ސްޓްރީޓްސްގެ ތިންވަނަ ލަނޑު ޖަހާފައެވެ.

މެޗުގެ ދެވަނަ ހާފު ފަށައިގެން އީގަލްސްއިން އެ ޓީމުގެ ކުޅުން ރަނގަޅުކުރިއިރު، އީގަލްސްއިން ވަނީ މި ހާފުގައި ގްރީން ސްޓްރީޓްސްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މެޗުގެ 57 ވަނަ މިނެޓުގައި އީގަލްސްގެ ބިދޭސީ ފޯވާޑް މުޙައްމަދު އޮސާމާ ފޮނުވާލި ނުރައްކާތެރި ހަމަލާ ގޯލުގެ ހުރަސް ދަނޑިމަތިން ބޭރަށް ދިޔައިރު، އޭގެ ތިން މިނެޓު ފަހުން އީގަލްސްއިން ވަނީ ލަނޑު ޖަހާ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ފޯވާޑް މުޙައްމަދު ނާއިމެވެ.

އެކަމަކު އޭގެ ފަހުން ގްރީން ސްޓްރީޓްސްއިން ވަނީ އެ ޓީމުގެ ކުޅުން ރަނގަޅުކޮށް، މެޗުގެ 79 ވަނަ މިނެޓުގައި އިތުރު ލަނޑެއް ކާމިޔާބުކޮށްފައެވެ. މިއީ އީގަލްސްގެ ކުޅުންތެރިއެއްގެ އަތުން ބައިކޮޅޮށް ވަން ލަނޑެކެވެ. އޭގެ ފަހުން މެޗު ނިމެން ހަތަރު މިނެޓަށް ވެފައި ވަނިކޮށް އީގަލްސްގެ ފޯވާޑް ޒައިން ޒަފަރަށް ލަނޑު ޖަހަން ރަނުގެ ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ގްރީން ސްޓްރީޓްސްގެ ޑިފެންޑަރުން ވަނީ ދިފާއުކޮށްފައެވެ.

މެޗަށްފަހު ވާހަކަދައްކަމުން އީގަލްސްގެ ކޯޗު މުޙައްމަދު ޝިޔާޒް (މޯހަން) ބުނީ، މެޗުން ބަލިވީ އީގަލްސް ކުޅުންތެރިންގެ ފަރާތުން ހެދުނު ގޯސްތަކުގެ ސަބަބުން ކަމަށާއި، އީގަލްސްގެ ޑިފެންޑަރުންގެ ފަރާތުން ފެނިގެންދިޔައީ އާދައިގެ ކުޅުމެއް ކަމަށެވެ. އަދި ލަނޑު ޖެހުމުގައި އީގަލްސް ކުޅުންތެރިންނަށް އުނދަގޫތަކެއް ހުރި ކަމަށާއި، ހާއްސަކޮށް އިތުބާރު ފޯވާޑް އަޙްމަދު ރިޒްވާން (ރިޒޭ) ނެތްތަން ޓީމުން ފެންނަ ކަމަށްވެސް ވަނީ ބުނެފައެވެ.

ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނީ މެޗުގައި އޭނާގެ ޓީމުގެ ފަރާތުން ފެނުނު ކުޅުމާ މެދު ހިތްހަމަޖެހޭ ކަމަށާއި، މެޗަށް ގްރީން ސްޓްރީޓްސްއިން ނުކުތީ ތިން ޕޮއިންޓް ހޯދުމަށް ކަމަށެވެ. އަދި ގްރީން ސްޓްރީޓްސްގެ ފޯވާޑް ލައިން ކުރިއަށް އޮތް ތަނުގައި އިތުރަށް ވަރުގަދަވެގެންދާނެ ކަމަށްވެސް ނިސްތާރު ބުންޏެވެ.

މި މޮޅާއެކު ގްރީން ސްޓްރީޓްސް ތާވަލުގެ ތިންވަނައަށް އެރީ ކުޅުނު ހަ މެޗުން އަށް ޕޮއިންޓް ހޯދައިގެންނެވެ. އަދި މެޗުން ބަލިވި އީގަލްސް އޮތީ ތާވަލުގެ ފުލުން ދެވަނައިގައި ހަ މެޗުން ހަތަރު ޕޮއިންޓާއެކުއެވެ.