އިނގިރޭސި ޕްރިމިއާ ލީގުގައި ބުރާސްފަތި ދުވަހުގެރޭ ކްރިސްޓަލް ޕެލަސްއާ އެއްވަރުވެ، އާސެނަލުން ދަމަހައްޓަމުން އައި މޮޅުވުމުގެ ސިލްސިލާއަށް ނިމުން އަތުވެއްޖެއެވެ.

އާސެނަލުގެ ދަނޑުގައި ކުޅުނު މި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. މި މެޗުގެ ކުރިން އާސެނަލުން ވަނީ އެންމެ ފަހުން ކުޅުނު ހަތަރު މެޗުންވެސް މޮޅުވެފައެވެ. އޭގެ ތެރޭގައި ޕްރިމިއާ ލީގުގެ ތިން މެޗުވެސް ހިމެނެއެވެ.

މި މެޗުގެ ފުރަތަމަ ހާފުގައި ޕެލަސްއިން ރަނގަޅު ކުޅުމެއް ދެއްކިއިރު، މި ހާފުގައި ލީޑު ނަގަން އެންމެ ހުސް ފުރުސަތެއް ލިބުނީ ޕެލަސްގެ ޖޭމްސް ޓޮމްކިންސްއަށެވެ. އެކަމަކު އޭނާ ބޮލުން ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. އަދި އޭގެ ފަހުން މި ހާފުގައި ޕެލަސްގެ ކްރިސްޓިއަން ބެންޓެކޭ ބޮލުން ފޮނުވާލި ހަމަލާއެއް އާސެނަލުގެ ގޯލްކީޕަރު ބާން ލެނޯ ވަނީ މަތަކޮށްފައެވެ. އެކަމަކު ދެވަނަ ހާފުގައި އާސެނަލުން ކުޅުން ރަނގަޅު ކުރިއިރު، އެ ޓީމުގެ ފޯވާޑް އަލެކްސަންޑަ ލަކަޒޭޓް އާއި ކެޕްޓަން ޕިއޭ-އެމެރިކް އޮބާމަޔަނަށް ވަނީ ލީޑު ނަގަން ރަނގަޅު ފުރުސަތުތަކެއް ލިބި ބޭކާރުވެފައެވެ.

މި މެޗު އެއްވަރުވުމުން ކުޅުނު 18 މެޗުން ލިބުނު 24 ޕޮއިންޓާއެކު އާސެނަލް އޮތީ ތާވަލުގެ 11 ވަނައިގައެވެ. އަދި އާސެނަލާ އެއްވަރުކުރި ޕެލަސް އޮތީ ތާވަލުގެ 13 ވަނައިގައި 18 މެޗުން 23 ޕޮއިންޓާއެކުއެވެ.