ކޮވިޑާއި ގުޅިގެން ފާނަ މަސްވެރިކަން ހުއްޓުނަސް ފަހި މުސްތަގުބަލެއް އެބައޮތް: ފިޝަރީޒް މިނިސްޓްރީ

ކޮވިޑް-19އާ ގުޅިގެން ފާނަ މަސްވެރިކަން ހުއްޓުމަކަށް އައި ނަމަވެސް މި މަސްވެރިކަމަކީ ބައިނަލްއަގުވާމީ ބާޒާރުގައި އެންމެ ޑިމާންޑް ހައި މަސްވެރިކަން ކަމަށް ފިޝަރީޒް މިނިސްޓްރީން ބުނެފިއެވެ.

ރާއްޖެޓީވީގެ ''މަސްވެރިންގެ ސައްލާ'' ޕްރޮގްރާމްގައި ވާހަކަދައްވަމުން ފިޝަރީޒް މިނިސްޓްރީގެ ޑިރެކްޓަރ އަހުމަދު ޝިފާޒް ވިދާޅުވީ ކޮވިޑް-19އާ ގުޅިގެން މަސްވެރިކަމުގެ ސިނާއަތަށް ބޮޑެތި ގޮންޖެހުންތައް ކުރިމަތިވި ކަމަށާއި، ފާނަ މަސްވެރިކަން އެއްކޮށް ކަހަލަ ގޮތަކަށް ހުއްޓިގެންދިޔަ ކަމަށެވެ.

ޝިފާޒު ވިދާޅުވީ ފާނަ މަސްވެރިކަމުގެ 90 އިންސައްތައަކީ އެކްސްޕޯޓުކުރާ ބާވަތެއް ކަމަށާއި، ކޮވިޑް-19އާ ގުޅިގެން ގައުމުތަކުގެ ވައިގެ ބަނދަރުތައް ބަންދުކުރުމުގެ ނަތީޖާއަކަށްވީ މަސްވެރިކަން ގާތްގަނޑަކަށް ހުއްޓުން ކަމަށެވެ.

ފާނަ މަސްވެރިކަމަކީ ވަރަށް މުހިންމު މަސްވެރިކަމެއްކަން ފާހަގަކުރައްވައި ޝިފާޒު ވިދާޅުވީ ހުރިހާ މަސްވެރިކަމަކަށްވުރެ ފާނައިގެ މަސްވެރިކަމަށް ބައިނަލްއަގުވާމީ ބާޒާރުތަކުގައި ޑިމާންޑު ބޮޑު ކަމަށާއި، ޚާއްސަ އަގުތަކެއްގައި ވިއްކާލެވޭ ކަމަށެވެ.

ފާނަ ދުނިޔޭގެ ގިނަ ގައުމުތަކުން ހުސްވެފައިވާތީ އެކަމަށް އިޝާރާތްކުރައްވާ ޝިފާޒު ވިދާޅުވީ ބައެއް ގައުމުތަކުގެ މަސްވެރިންނަށް ކަނޑުން ފާނަ ބޭނޭނެ ގޮތެއް ނެތް ކަމަށެވެ. ނަމަވެސް ރާއްޖޭގައި ފާނަ ބާނަމުންދަނީ ކަނޑުން ކަމަށާއި، ވަރަށް ފަހި މުސްތަގުބަލެއް ފާނަ މަސްވެރިކަމަށް އެބަ އޮތް ކަމަށް ޝިފާޒު ވިދާޅުވިއެވެ.