ސްކޫލް ނިންމާ ކުދިން ފަތުރުވެރިކަމުގެ ދާއިރާގައި މަސައްކަތް ކުރުމަށް ޖެހިލުންވުން ނުވަތަ މަސައްކަތް ކުރުމަށް ބޭނުންނުވާ ސަބަބުތައް ދެނެގަތުމަށް ފަތުރުވެރިކަމުގެ ދާއިރާއިން ކުރެވެމުންދާ މަސައްކަތްތަކުގެ ތެރެއިން ފާހަގަ ކުރެވުނު އެއްކަމަކީ، ދާއިރާއާއި ގުޅޭ ތަމްރީނު ނެތި ކުދީން މަސައްކަތުގެ މާހައުލަށް ނުކުންނަން ޖެހުމުން އަވަހަށް ވަޒީފާ ދޫކޮށްލާފައި ދިއުން ކަމަށް އަތަމާ ފައުންޑޭޝަނުން ބުނެފިއެވެ.

އަތަމާ ފައުންޑޭޝަނުން މިހެން ބުނެފައިވާއިރު ބުރާސްފަތި ދުވަހު ވިލާ ކޮލެޖާއި އަތަމާ ފައުންޑޭޝަން އާއި ދެމެދު ޓޫރިޒަމް ދާއިރާއިން މީހުން ތަމްރީން ކުރުމާއި ބެހޭ އެއްބަސްވުމެއްގައި ވަނީ ސޮއި ކޮށްފައެވެ.

މި އެއްބަސްވުމުގައި ސޮއި ކުރެވުނީ މިކަމަށްޓަކައި ވިލާ ކޮލެޖުގައި ބޭއްވުނު ޚާއްސަ ޙަފްލާއެއްގައެވެ. މި ފަހުމުނާމާގައި އަތަމާ ފައުންޑޭޝަންގެ ފަރާތުން ސޮއި ކުރެއްވީ އަތަމާ ފައުންޑޭޝަންގެ ފައުންޑަރ އަދި ވައިސް ޗެއަރޕަރސަން އަލީ އަޙްރުޝް އިބްރާހިމް އެވެ. ވިލާ ކޮލެޖްގެ ފަރާތުން ސޮއި ކުރެއްވީ ވިލާ ކޮލެޖުގެ ރެކްޓަރ ޑރ. އަހުމަދު އަންވަރެވެ.

އަތަމާ ފައުންޑޭޝަނުން ބުނީ ޓުއަރިޒަމް އަދި ހޮސްޕިޓަލިޓީ ދާއިރާއިން މީހުން ތަމްރީނުކުރުމަކީ މިއަދު ދިވެހިރާއްޖޭގެ ތަރައްޤީ އެ ސިނާއަތަކަށް ވަރަށްބޮޑަށް ބަރޯސާވާ ފަތުރުވެރިކަން ކުރިއެރުވުމަށް ވަރަށް މުހިއްމުކަމެއް ގޮތުގައި ދެކޭ ކަމަށެވެ.

މި ތަމްރީން ޕްރޮގްރާމަކީ ފަތުރުވެރިކަމުގެ ދާއިރާއަށް ދިމާވެފައިވާ މިފަދަ މައްސަލަތަކަށް ހައްލެއް ހޯދައިދިނުމުގެ މަޤުޞަދުގައި އަތަމާ ފައުންޑޭޝަނުން ދިވެހި ޒުވާނުންނަށް އަމާޒުކޮށްގެން، އަތަމާ ފައުންޑޭޝަންގެ އިޖުތިމާޢީ ޒިންމާގެ ދަށުން ހިންގޭ ތަމްރީން ޕްރޮގްރާމްތަކެކެވެ.

އަތަމާ ފައުންޑޭޝަނުން މި ޕްރްގްރާމްތައް ހިންގުމަށް ވިލާކޮލެޖު އިޚްތިޔާރުކުރީ، ވިލާކޮލެޖަކީ ރާއްޖޭގެ މަތީ ތަޢުލީމުދޭ މަރުކަޒު ތަކުގެ ތެރެއިން އެންމެ ރަނގަޅު އަދި މިފަދަ ކަންކަން ހިންގުމުގައި އެންމެ ގާބިލު ކޮލެޖުކަމަށް ޤަބޫލުކުރެވޭތީކަމަށް އެ ފައުންޑޭޝަނުން ބުނެއެވެ.

އަތަމާ ފައުންޑޭޝަނުން ވިލާކޮލެޖާއެކު ސޮއި ކުރެވުނު އެއްބަސްވުމުގެ ދަށުން ހިންގުމަށް ހަމަޖެހިފައިވާ "ސެޓްފިކެޓް 3 އިން ހޮސްޕިޓަލިޓީ" ޕްރޮގްރާމް ދިވެހި ޒުވާނުންގެ ތެރެއިން މިދާއިރާއަށް ޝައުޤުވެރިވާ ފަރާތްތަކަށް ބައިވެރިވެވޭނެއެވެ.

4 މަސްދުވަހުގެ މުއްދަތަށް ހިންގޭ މި ކޯހުގައި ކިޔަވައިދިނުމާއި އަމަލީ ތަޖުރިބާ ކުރިއަށް ގެންދެވޭނީ ރިސޯޓުގައެވެ. ކިޔަވައިދިނުމާއި އަމަލީ ތަޖުރިބާ ހޯދުމުގެ މަސައްކަތްތައް ވިލާކޮލެޖުން ވިލަރެސް ކުރާގޮތަށް ހަމަޖެހިފައިވާ މިޕްރޮގްރާމްގެ އެންމެހާ ޚަރަދުތައް ކުރާގޮތަށް ހަމަޖެހިފާއިވަނީ އަތަމާ ފައުންޑޭޝަނުންނެވެ. މިގޮތުން ފަށާ ފުރަތަމަ ބެޗަށް ނެގުމަށް ހަމަޖެހިފަނީ 20 ދަރިވަރުންނެވެ.