ފްރެންޗް ސުޕަ ކަޕުގައި މާސޭ ބަލިކޮށް، ޕީއެސްޖީގެ ކޯޗު މައުރީސިއޯ ޕޮޗެޓީނޯގެ ކޯޗިންގ ކެރިއަރުގައި ފުރަތަމަ ތަށި އުފުލާލައިފިއެވެ.

ތޯމަސް ޓުޗެލް ވަކިކޮށް މި މަހުގެ ތިންވަނަ ދުވަހު ޕީއެސްޖީގެ ކޯޗުގެ މަގާމަށް މައުރީސިއޯ ޕޮޗެޓީނޯ ހަމަޖެއްސިއިރު، މީގެ ކުރިން އެސްޕަންޔޯލް، ސައުތެމްޓަން އަދި ޓޮޓެންހަމް ހޮޓްސްޕާއަށް އިރުޝާދު ދިން ޕޮޗެޓީނޯއަށް މުބާރާތެއް ކާމިޔާބުކުރެވިފައެއް ނުވެއެވެ. އެކަމަކު ޓޮޓެންހަމާއެކު އިނގިރޭސި ލީގު ކަޕުގެ ފައިނަލާއި ޔުއެފާ ޗެމްޕިއަންސް ލީގުގެ ފައިނަލުގައި ވާދަކުރިއިރު، އެ ދެ މެޗުންވެސް ޓޮޓެންހަމް ވަނީ ބަލިވެފައެވެ.

އެކަމަކު ޕީއެސްޖީއާ ހަވާލުވިތާ ކުޑަ ދުވަސްކޮޅެއްގެ ތެރޭގައި ޕޮޗެޓީނޯ ތައްޓެއް އުފުލާލީ ފްރެންޗް ސުޕަ ކަޕުގައި ބުދަ ދުވަހުގެރޭ 2-1 ގެ ނަތީޖާއަކުން މާސޭ ބަލިކޮށްގެންނެވެ.

މި މެޗުގެ ފުރަތަމަ ހާފުގައި ޕީއެސްޖީން ލީޑު ނެގިއިރު، މެޗުގެ 39 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މައުރޯ އިކާޑީއެވެ. އަދި މެޗު ނިމެން ފަސް މިނެޓަށް ވެފައި ވަނިކޮށް އަނިޔާއިން ރަނގަޅުވެ ކުޅުމުގެ ތެރެއަށް އައި ނޭމާ ވަނީ ޕެނަލްޓީއަކުން ޕީއެސްޖީއަށް ލީޑު ފުޅާކޮށްދީފައެވެ. މިއީ އޭރިއާ ތެރެއިން ޕީއެސްޖީގެ އިކާޑީއަށް މާސޭގެ ޔޯހަން ޕެލޭ ކުރި ފައުލަކަށް ރެފުރީ ދިން ޕެނަލްޓީއެކެވެ. އެކަމަކު އޭގެ ހަތަރު މިނެޓު ފަހުން ޑިމިޓްރީ ޕަޔެޓް ވަނީ މާސޭއަށް ލަނޑެއް ޖަހާދީފައެވެ.

ޕޮޗެޓީނޯއާއެކު ޕީއެސްޖީން ފްރެންޗް ސުޕަ ކަޕް ކާމިޔާބުކުރިއިރު، މިހާތަނަށް އޭނާގެ އިރުޝާދުގެ ދަށުން ޕީއެސްޖީން ކުޅެފައިވަނީ އެންމެ ތިން މެޗެވެ. ފްރެންޗް ސުޕަ ކަޕް ހިމަނައިގެން ދެ މެޗުން ޕީއެސްޖީ މޮޅުވެފައިވާއިރު، ޕޮޗެޓީނޯގެ ފުރަތަމަ މެޗުން ފްރެންޗް ލީގުގައި ޕީއެސްޖީ ވަނީ އެއްވަރުވެފައެވެ.