އިޓާލިއަން ކަޕުގައި ކުއާޓާފައިނަލަށް ޔުވެންޓަސް އާއި އިންޓަ މިލާން ދަތުރުކޮށްފިއެވެ.
ކުއާޓާއިން މި މުބާރާތުގެ އެންމެ ކާމިޔާބު ޓީމު ކަމަށްވާ ޔުވެންޓަސް ޖާގައެއް ހޯދީ ބުދަ ދުވަހުގެރޭ ކުޅުނު މެޗުގައި ޖެނޯއާ އަތުން 3-2 ގެ ނަތީޖާއަކުން މޮޅުވެގެންނެވެ.
ޔުވެންޓަސްގެ ދަނޑުގައި ކުޅުނު މި މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ދެވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޑެޔާން ކުލުސެވްސްކީއެވެ. އަދި މެޗުގެ 23 ވަނަ މިނެޓުގައި އަލްވާރޯ މޮރާޓާ ވަނީ ޔުވެންޓަސްއަށް ލީޑު ފުޅާކޮށްދީފައެވެ. މެޗުގެ ކުރީކޮޅު ޔުވެންޓަސްއިން ދެ ލަނޑުގެ ލީޑެއް ނެގި ނަމަވެސް، މެޗުގެ 28 ވަނަ މިނެޓުގައި ލެނާޓް ޒިބޯރާ ވަނީ ލަނޑެއް ޖަހާ ޖެނޯއާއަށް ފަރަގު ކުޑަކޮށްދީފައެވެ. އަދި އެ ޓީމުން މެޗުގައި ނަތީޖާ އެއްވަރުކޮށްފައިވަނީ 74 ވަނަ މިނެޓުގައި ފިލިއްޕޯ މެލެގޯނީ ކާމިޔާބުކުރި ލަނޑުންނެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރިވެފައި އޮތުމުން، އިތުރު ވަގުތުގެ ދެ ހާފު ކުޅުނުއިރު، ފުރަތަމަ ހާފުގެ ފަހު މިނެޓުގައި ޔުވެންޓަސްއިން ވަނީ އަލުން ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޒުވާން މިޑްފީލްޑަރު ހަމްޒާ ރަފިއާއެވެ.
މީގެ އިތުރުން މި މުބާރާތުގެ ކުއާޓާއަށް އިންޓަ ދަތުރުކުރީ ބުދަ ދުވަހުގެރޭ ކުޅުނު މެޗުގައި ފިއޮރެންޓީނާ އަތުން 2-1 ގެ ނަތީޖާއަކުން މޮޅުވެގެންނެވެ.
ފިއޮރެންޓީނާގެ ދަނޑުގައި ކުޅުނު މި މެޗުގެ ފުރަތަމަ ހާފުގައި އިންޓައިން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮމެލޫ ލުކާކޫއެވެ. އެކަމަކު މެޗުގެ ދެވަނަ ހާފު ފަށައިގެން 12 ވަނަ މިނެޓުގައި ކްރިސްޓިއަން ކޯމޭ ވަނީ ފިއޮރެންޓީނާއަށް ނަތީޖާ އެއްވަރުކޮށްދީފައެވެ.
މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރިވެފައި އޮތުމުން، އިތުރު ވަގުތުގެ ދެ ހާފު ކުޅުނުއިރު، އިންޓައިން ލީޑު ނަގާފައިވަނީ ދެވަނަ ހާފުގައެވެ. އެގޮތުން މި މެޗުން އިންޓަ މޮޅުކޮށްދިން ލަނޑު އެ ޓީމަށް ކާމިޔާބުކޮށްދިނީ ފުރަތަމަ ލަނޑުވެސް ޖެހި ލުކާކޫއެވެ.
ބުދަ ދުވަހުގެރޭ ކުޅުނު މެޗުތަކުން މޮޅުވެ އިޓާލިއަން ކަޕުގެ ކުއާޓާއަށް ޔުވެންޓަސް އާއި އިންޓަ ދަތުރުކުރިއިރު، މި މުބާރާތުގެ އެންމެ ފަހުގެ ޗެމްޕިއަން ޓީމު ކަމަށްވާ ނާޕޮލީވެސް ވަނީ ބުދަ ދުވަހުގެރޭ އެމްޕޯލީ ބަލިކޮށް ކުއާޓާއިން ޖާގައެއް ކަށަވަރުކޮށްފައެވެ. މިހާތަނަށް ހަތަރު ޓީމެއް ކުއާޓާއަށް ދަތުރުކޮށްފައިވާއިރު، ކުއާޓާގައި އިންޓަ ބައްދަލުކުރަން ޖެހޭނީ ވާދަވެރި އޭސީ މިލާނާއެވެ.
