ބާ2000 ފަރަމަންތާ ޗެލެންޖް: އޯޕަން ވޯޓާ ފެތުމުގައި ބައިވެރިވާން ހުޅުވާލައިފި

ރާއްޖޭގައި ބާއްވާ މޫދު ކުޅިވަރުގެ އެންމެ ބޮޑު ހަރަކާތް ކަމަށްވާ "ބާ2000 ފަރަމަންތާ ޗެލެންޖް" ގެ އޯޕަން ވޯޓާ ފެތުމުގައި ބައިވެރިވާން ހުޅުވާލައިފިއެވެ.

ބާ2000 ގެ އެދުމަކަށް ފަރުމަތި އިވެންޓްސްއިން ރާވާ ހިންގާ "ބާ2000 ފަރަމަންތާ ޗެލެންޖް" ގައި އޯޕަން ވޯޓާ ފެތުމުގެ އިތުރުން ސާފިންނާއި ބޮޑީބޯޑިންގެ އިވެންޓުތައް ހިމެނެއެވެ. މީގެ ތެރެއިން އޯޕަން ވޯޓާ ފެތުމުގެ މުބާރާތް އޮންނާނީ މި އަހަރުގެ އޭޕްރީލް މަހުގެ އެއްވަނަ ދުވަހުން ފެށިގެން ތިންވަނަ ދުވަހުގެ ނިޔަލަށެވެ. ތިން ދުވަހުގެ މުއްދަތަށް ކުރިއަށްދާ މި މުބާރާތް އޮންނާނީ މާލޭ ރަސްފަންނު ބޭރުގައެވެ.

އޯޕަން ވޯޓާ ފެތުމުގައި ބައިވެރިވުމުގެ ފުރުސަތު ބުދަ ދުވަހު ހުޅުވާލިއިރު، އަންނަ ފެބްރުއަރީ މަހުގެ 20 ވަނަ ދުވަހުގެ ނިޔަލަށް މި މުބާރާތުގައި ބައިވެރިވެވޭނެއެވެ. އޯޕަން ވޯޓާ ފެތުމުގެ މުބާރާތުގައި ފަސް ކެޓެގަރީއެއް ހިމެނޭއިރު، މި ކޮންމެ ކެޓެގެރީއެއްގައި 30 ޖާގަ ވަނީ ހިމަނާފައެވެ. އޯޕަން ވޯޓާ ފެތުމުގައި ހިމެނޭ ކެޓެގަރީތަކަކީ އުމުރުން 12 އަހަރާއި 14 އަހަރާ ދެމެދު (އެއް ކިލޯމީޓަރު)، އުމުރުން 14 އަހަރާއި 16 އަހަރާ ދެމެދު (ތިން ކިލޯމީޓަރު)، އުމުރުން 14 އަހަރާއި 18 އަހަރާ ދެމެދު (ފަސް ކިލޯމީޓަރު)، 18 އަހަރުން މަތި (ފަސް ކިލޯމީޓަރު) އަދި 35 އަހަރުން މަތި (ތިން ކިލޯމީޓަރު) އެވެ. މި ކޮންމެ ކެޓެގަރީއެއްގައިވެސް އަންހެން އަދި ފިރިހެން ބައި އޮންނާނެއެވެ.

ދެން އޯޕަން ވޯޓާ ފެތުމުގެ މުބާރާތުގައި ހިމެނެނީ ޓީމު އިވެންޓް (10 ކިލޯމީޓަރު) އެވެ. އަންހެން ފިރިހެން އެއްކޮށް މި ބައި ކުރިއަށްދާއިރު، މި ބައިގައި 30 ޓީމަށް ބައިވެރިވެވޭނެ ކަމަށްވެސް މުބާރާތް އިންތިޒާމުކުރާ ފަރުމަތި އިވެންޓްސްއިން މައުލޫމާތުދެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަމުން އޯޕަން ވޯޓާ ފެތުމުގެ އިވެންޓް ޑިރެކްޓަރު އިސްމާޢީލް ފަރުހާން (ފަރޭ) ބުނީ މާލޭގައި މި މުބާރާތް ކުރިއަށްގެންދަން އެންމެ ރަނގަޅު ސަރަހައްދަކީ ރަސްފަންނު ބޭރު ކަމަށެވެ. އަދި މި މުބާރާތުގައި ފަސް ކެޓެގަރީއެއް ހިމެނޭއިރު، އެ ކެޓެގަރީތަކުގެ އިތުރުން ދެން ބާއްވާ ޓީމު އިވެންޓަކީ މުޅިން އަލަށް ރާއްޖޭގައި ބާއްވާ އިވެންޓެއް ކަމަށްވެސް ފަރޭ ބުންޏެވެ. އެގޮތުން ޓީމު އިވެންޓުގައި ފަސް ފެތުންތެރިން ފަތަން ޖެހޭއިރު، ކޮންމެ ފެތުންތެރިއަކު ދެ ކިލޯމީޓަރު ފުރިހަމަ ކުރަން ޖެހޭނެ ކަމަށާއި، ކޮންމެ ޓީމެއްގައިވެސް އަންހެން އެއް ފެތުންތެރިއަކު ހިމަނަން ޖެހޭނެ ކަމަށްވެސް ފަރޭ ވަނީ ބުނެފައެވެ.

އޯޕަން ވޯޓާ ފެތުމުގައި ބައިވެރިވުމުގެ ފުރުސަތު ހުޅުވާލިއިރު، 18 އަހަަރުން މަތީގެ ފެތުންތެރިން މުބާރާތުގައި ބައިވެރިވުމަށް 200 ރުފިޔާ ދައްކަން ޖެހެއެވެ. އަދި 18 އަހަރުން ދަށުގެ ފެތުންތެރިން 50 ރުފިޔާ ދައްކަން ޖެހޭއިރު، ޓީމު އިވެންޓުގައި ބައިވެރިވާ ޓީމުތަކުން 500 ރުފިޔާ ދައްކަން ޖެހެއެވެ.

"ބާ2000 ފަރަމަންތާ ޗެލެންޖް" ގެ ހަރަކާތްތައް ކުރިއަށްގެންދަނީ މި ކުޅިވަރުތަކާ ގުޅޭ ގައުމީ ކުޅިވަރު އެސޯސިއޭޝަންތަކުގެ އެއްބާރުލުމާ އެކީގައެވެ. މި ޗެލެންޖަކީ ރާއްޖޭގައި މޫދު ކުޅިވަރު ޕްރޮމޯޓުކޮށް، އެފަދަ އިވެންޓުތައް ތަފާތު ގޮތަކަށް ގެނެސްދިނުމަށް ގައުމީ އެސޯސިއޭޝަންތަކާއެކު ބައިނަލްއަގުވާމީ ފެންވަރެއްގައި މަސައްކަތް ކުރުމުގެ މަގުސަދުގައި ކުރިއަށްގެންދާ ހަރަކާތެކެވެ.