ރާއްޖެއިން އިތުރު 59 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން އާންމުކޮށްފައިވާ ތަފާސްހިސާބުތައް ދައްކާގޮތުން ޖެނުއަރީ 11 ވަނަ ދުވަހުގެ 06:00 ން 12 ވަނަ ދުވަހުގެ 06:00 ށް ޕޮޒިޓިވްވި 59 މީހުންގެ ތެރެއިން 33 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. އަދި އަތޮޅުތެރޭގެ ރަށްތަކުން 20 މީހަކު ޕޮޒިޓިވްވެފައިވާއިރު، ރިސޯޓުތަކުން ޕޮޒިޓިވްވެފައިވަނީ ހަ މީހުންނެވެ. އަދި މި މުއްދަތުގެ ތެރޭގައި އެޗްޕީއޭއިން ވަނީ 2،768 ސާމްޕަލް ނަގާފައެވެ.

މީގެ އިތުރުން ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު 14،218 ށް އަރާފައިވާއިރު، ބަލިޖެހުނު މީހުންގެ ތެރެއިން 13،402 މީހުން މިހާތަނަށް ވަނީ ބަލިން ރަނގަޅުވެފައެވެ.

ބަލިޖެހުނު މީހުންގެ ތެރެއިން 49 މީހުން ނިޔާވެފައިވާއިރު، މިވަގުތު ރާއްޖެއިން ބައްޔަށް ފަރުވާ ހޯދަމުން ދަނީ 760 މީހުންނެވެ. މީގެ ތެރެއިން 53 މީހުން ފަރުވާ ހޯދަމުންދަނީ ހޮސްޕިޓަލުގައި އެޑްމިޓްކޮށްގެންނެވެ.

ކޮވިޑް-19 އާ ގުޅިގެން ރައްކާތެރިކަމުގެ ގިނަ ފިޔަވަޅުތަކެއް ސަރުކާރުން އަޅާފައިވާއިރު، ކޭސްތަކުގެ އަދަދު ދަށަށް ދިޔަ ނަމަވެސް، އާންމުކޮށްފައިވާ އުސޫލުތަކާ އެއްގޮތަށް އަމަލުތައް ބެހެއްޓުމަށް ހެލްތު އެމަޖެންސީ އޮޕަރޭޝަންސް ސެންޓަރުން ދަނީ އިލްތިމާސްކުރަމުންނެވެ.