ހުޅުވާރުލުން ފެނުނު 149 ކިލޯގެ ޑްރަގް މައްސަލަ އިސްތިއުނާފް ނުކުރަން ނިންމައިފި
އަތުލި މަސްތުވާތަކެތީގެ އަގަށް 260 މިލިއަން ރުފިޔާ އަރާ
ޕްރޮސެކިއުޓަރ ޖެނެރަލް ހުސައިން ޝަމީމް- ޕީޖީ އޮފީހުން ވަނީ މި މައްސަލައިގައި ދަށު ކޯޓުން ނިންމި ނިންމުން އިސްތިއުނާފް ނުކުރުމަށް ނިންމާފައި
ގދ. ހުޅުވާރުލުން ގިނަ އަދަދެއްގެ މަސްތުވާތަކެތި ފެނުނު މައްސަލައިގައި ދަށު ކޯޓުގެ ނިންމުން އިސްތިއުނާފް ނުކުރުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
ޕީޖީ އޮފީހުން ބުނީ، މި ނިންމުމާއި ގުޅިގެން މި މައްސަލައިގައި އަޅަންޖެހޭ އިތުރު ފިޔަވަޅުތައް ޕީޖީ އޮފީހުން އަޅަމުން ގެންދާނެ ކަމަށެވެ.
އެނގިފައިވާ ގޮތުގައި މި މައްސަލަ ދަށު ކޯޓުންވެސް ބޭރުކޮށްލީ އިޖުރާއީ ގިނަ މައްސަލަތަކެއް ހުރުމުންނެވެ. އެގޮތުން މެޖިސްޓްރޭޓް ކޯޓުގެ އިހްތިސާސް ހިނގާ މި މައްސަލައިގައި ފުރަތަމަ ދައުވާ ކޮށްފައިވަނީވެސް ކްރިމިނަލް ކޯޓުގައެވެ. އަދި ދައުވާ ކުރުމުގެ މުއްދަތާ ގުޅޭ މައްސަލަތަކެއްވެސް އޭގެ ތެރޭގައި ހިމެނެއެވެ. އެގޮތުން މި މައްސަލައިގައި ދައުވާ ކުރުމަށް އޭރުގެ ޕީޖީއިން މެޖިސްޓްރޭޓް ކޯޓަށް މައްސަލަ ހުށައަޅާފައިވަނީވެސް ދައުވާ ކުރުމުގެ މުއްދަތު ހަމަވި ފަހުންނެވެ.
މި މައްސަލައިގައި 5 މީހަކަށް ކުރި ދައުވާ މެޖިސްޓްރޭޓް ކޯޓުން ބޭރު ކޮށްލާފައިވަނީ މިހިނގާ ޖެނުއަރީ މަހުގެ 10 ވަނަ ދުވަހުއެވެ.
ކަނޑު މަގުން ރާއްޖެއަށް އެތެރެކޮށް، ގދ. އަތޮޅު ފަޅުރަށެއްގައި ވަޅުލާފައިވާ 149ކިލޯގެ މަސްތުވާތަކެތި ފުލުހުން ހޯދީ 29 އޭޕްރީލް 2019ގައެވެ. އެ 149 ކިލޯގެ މަސްތުވާތަކެތީގެ މަގުމަތީ އަގު އުޅެނީ ގާތްގަނޑަކަށް 260 މިލިއަން ރުފިޔާގައި ކަމަށް ފުލުހުން ބުނެ އެވެ. އޭރު މަސްތުވާތަކެތި އަތުލައިގަތްކަން ހާމަކޮށްފައިވަނީ ފުލުހުންގެ 86 ވަނަ އަހަރީ ދުވަހާ ގުޅިގެން ގދ. ތިނަދޫ ގައި ބޭއްވި ޑިނަރ ނައިޓްގައި ޕޮލިސް ކޮމިޝަނަރު މުހައްމަދު ހަމީދުއެވެ.
