ބަންގްލަދޭޝްއިން މާލެ އައި މީހެއްގެ އަތުން 7 ކިލޯގެ ކެނަބިސް އަތުލައިގަނެފި

ރާއްޖެއައި ބަންގްލަދޭޝް މީހަކު އެތެރެކުރި 7.2 ކިލޯ ގްރާމްގެ ކެނަބިސް މޯލްޑިވްސް ކަސްޓަމްސް ސާރވިސްއިން އަތުލައިގަނެފި އެވެ.

ކަސްޓަމްސްއިން ބުނީ ރާއްޖެއައި ބަންގްލަދޭޝް އުމުރުން 26 އަަހަރުގެ އެ މީހާ އެތެރެކުރި މަސްތުވާތަކެއްޗާއިއެކު އޭނާ ހައްޔަރުކޮށްފައިވަނީ މި ޖޫން މަހުގެ ފަސް ވަނަ ދުވަހު ކަމަށެވެ.

ކަސްޓަމްއިން ބުނީ އޭނާ އެތެރެކުރި މަސްތުވާތަކެތީގެ ތަހުލީލު ރިޕޯޓުން އެތަކެތި އެއީ ކެނަބިސްކަން ކަށަވަރުކުރެވިފައިވާ ކަމަށެވެ. އެތަކެތީގެ ބަރުދަނުގައި 7.2 ކިލޯގްރާމް ހުރި ކަމަށާއި އެތަކެތި އެތެރެކޮށްފައިވަނީ ޕްލާސްޓިކް ތަށިތަކެއްގެ ތެރެއަށް ލައި ފޮރުވައިގެން ކަމަށްވެސް ކަސްޓަމްސްއިން ބުނެއެވެ.

ކަސްޓަމްސްއިން ބުނީ އެ މަސްތުވާތަކެއްޗާއި އެތަކެތި އެތެރެކުރި ބަންގްލަދޭޝް މީހާ ފުލުހުންނާ ހަވާލުކޮށްފައިވާ ކަމަށެވެ.

މަސްތުވާތަކެތި ރާއްޖެ އެތެރެ ކުރުމުމުގެ އަދަބަކީ އުމުރަށް ޖަލަށްލުމާއެކު އެއް ލައްކަ ރުފިޔާއާއި އެއްމިލިޔަން ރުފިޔާއާ ދެމެދުގެ އަދަދަކުން ޖޫރިމާނާ ކުރުމެވެ.