ފުރުން މަނާ ކުރުމުން ޖިހާދުގެ ފަރާތުން މައިގަނޑު 4 އިސްތިއުނާފީ ނުކުތާއެއް
9 ޖެނުއަރީ 2021 | ހޮނިހިރު 14:31އުފުލާފައިވަނީ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ކުށުގެ ދައުވާ
ކުރީގެ ނައިބު ރައީސް އަބްދުﷲ ޖިހާދު - ޖިހާދު ވަނީ ކުރީގެ މިނިސްޓަރ އޮފް ފިނޭންސް އެންޑް ޓްރެޜަރީ ގެ މަޤާމުވެސް ފުރުއްވާފައި
ކ. ފުށިދިއްގަރު ފަޅު މައްސަލައިގައި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުވާއާ ގުޅިގެން ފުރުން މަނާކޮށްފައި އޮތް އޮތުން ޖިހާދުގެ ފަރާތުން ހައި ކޯޓުގައި އިސްތިއުނާފުކޮށް މައިގަނޑު 4 ނުކުތާއެއް އިސްތިއުނާފީ ނުކުތާގެ ގޮތުގައި ހުށައަޅައިފިއެވެ.
ޖިހާދުގެ ފަރާތުން އިސްތިއުނާފް ކުރި މައްސަލައިގެ އަޑުއެހުންތައް ނިމިދިޔަ ބުރާސްފަތި ދުވަހު ހައިކޯޓުގައި ފަށާފައިވާއިރު، ޖިހާދުގެ ފަރާތުން ހުށައެޅި ފުރަތަމަ ނުކުތާއަކީ އޭނާ ރާއްޖެއިން ބޭރަށް ފުރުން މަނާ ކޮށްފައިވަނީ ޖިނާއީ އިޖުރާއަތުގެ ޤާނޫނުގައި ކަނޑައަޅާފައިވާ އުސޫލުތަކާ ޚިލާފަށް ކަމަށެވެ.
އެގޮތުން ފިލައިގެން ދާން އުޅޭކަމަށް އެކަށީގެންވާ ހެކި ލިބިފައިވާނަމަ އޭނާގެ ޕާސްޕޯޓު ކޯޓު އަމުރެއްގެ ދަށުން ހިފެހެއްޓުމުގެ އިހުތިޔާރު ޤާނޫނު ތަންފީޒު ކުރާ އިދާރާތަކަށް ލިބިފައިވާކަން ފާހަގަކޮށް ޖިހާދުގެ ފަރާތުން އިސްތިއުނާފްގައި ފާހަގަ ކޮށްފައިވަނީ ހައިކޯޓުގައި އިސްތިއުނާފް ކޮށްފައިވާ ކޯޓު އަމުރަކީ ދައުލަތުގެ އެއްވެސް ތަންފީޒީ އިދާރާއަކުން ނެރެދިނުމަށް އެދި ހުށައަޅާފައިވާ އަމުރެއް ނޫން ކަމަށެވެ.
އޭގެ އިތުރުން، ޖިހާދު ފިއްލަވަން އުޅުއްވާ ކަމުގެ އެއްވެސް ހެއްކެއް ހުށައަޅާފައިނުވާކަން ފާހަގަކޮށް އިސްތިއުނާފުގައި ބުނެފައިވަނީ، ޖިހާދު ރާއްޖެއިން ބޭރަށް ވަޑައިގެންފިނަމަ އެނބުރި ރާއްޖެއަށް ވަޑައިނުގެންފާނެ ކަމަށް ކަނޑައަޅާފައިވަނީ އެއްވެސް ހެއްކެއްގެ މައްޗަށް ބިނާކޮށް ނޫން ކަމަށެވެ.
އަދި ފުރުމަށް ހަމަޖެހިފައިވާ ތާރީޚާއި، ދެކޮޅު ޓިކެޓުވެސް ޖިހާދުގެ ފަރާތުން ހުށައަޅާފައިވާކަން އިސްތިއުނާފުގައި ފާހަގަ ކޮށްފައިވެއެވެ.
ދެވަނަ ނުކުތާއެއްގެ ގޮތުން ޖިހާދުގެ ވަކީލުން ބުނެފައިވަނީ، އޭނާގެ މައްޗަށް ހުށައަޅާފައިވާ ދައުވާއަކީ ޖިނާއީ އިޖުރާއަތުގެ ޤާނޫނުގައި ބުނާ ބޮޑު ކުށަކަށް ނުވާއިރު، އިސްތިއުނާފް ކޮށްފައިވާ އަމުރުގައި އެއީ ބޮޑު ކުށެއް ކަމުގައި އޮތް އޮތުންވެސް އެއީ ހުށައެޅިފައިވާ ދައުވާއާ ޚިލާފަށް ޝަރީއަތުން ކަނޑައަޅާފައިވާ ކަމެއް ކަމަށެވެ.
ތިންވަނަ ކަމެއްގެ ގޮތުން ޖިހާދުގެ ފަރާތުން ވަނީ، ކްރިމިނަލް ކޯޓުގެ މި އަމުރަކީ ޤާނޫނޫ އަސާސީގެ 41 ވަނަ މާއްދާއިން ލިބިދޭ ދަތުރުފަތުރު ކުރުމުގެ އަސާސީ ޙައްޤަށް އުނިކަން އަންނަ ފަދަ އަމުރެއްކަން ބަޔާން ކުރައްވާފައެވެ.
ކްރިމިނަލް ކޯޓުގެ އަމުރު ރިވިއު ކޮށްދިނުން އެދި ޖިހާދުގެ ފަރާތުން އެ ކޯޓަށް ހުށައެޅި ސިޓީއެއްގައި ޖިހާދު އަނބުރާ ރާއްޖެއަށް ވަޑައިގަންނަވާނެކަން ޔަޤީންކޮށްދިނުމަށް އެކަމަށް ޖާމިނުވާނެ ފަރާތެއް ކަނޑައެޅުމާއި، ޝަރީއަތުން ކަނޑައަޅާ އަދަދެއް ކޯޓުގައި ބެހެއްޓުމަށްފަހު ފުރާވަޑައިގަތުމާއި، ޚާއްސަ ޓްރެވަލް ޑޮކިއުމަންޓެއް މެދުވެރިކޮށް ދަތުރު ކުރެވޭނެ އިންތިޒާމު ހަމަޖެއްސުމަށް ހުށައަޅާފައިވެއެވެ. އެހެން ނަމަވެސް، މި އަމުރު މުރާޖައާ ކުރެވެން ނެތް ކަމަށް ކްރިމިނަލް ކޯޓުން ވަނީ ނިންމާފައެވެ.
ފަހު ނުކުތާއެއްގެ ގޮތުން ޖިހާދުގެ ފަރާތުން ހުށައަޅާފައިވާ ނުކުތާއަކީ ކްރިމިނަލް ކޯޓުގެ މި އަމުރު ނެރުމުގައި ޙަވާލާ ދީފައިވާ ހައިކޯޓުގެ ގަޟިއްޔާ ތަތްބީޤު ކޮށްފައިވަނީ ޤާނޫނީ އުސޫލުތަކާ ޚިލާފަށްކަމަށް ބަޔާންކޮށް ހުށައަޅާފައިވާ ނުކުތާއެވެ.
ފުށިދިއްގަރުފަޅު މައްސަލައިގައި ދައުލަތުން ޖިހާދުގެ މައްޗަށް އުފުލާފައި ވަނީ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރުމުގެ ކުށުގެ ދައުވާއެވެ. މި މައްސަލައަކީ އެސެޓް ރިކަވަރީ ކޮމިޝަނުން ތަޙުޤީޤުކޮށް ދައުވާ ކުރުމަށް ޕޮރޮސެކިއުޓަރ ޖެނެރަލް (ޕީޖީ) ގެ އޮފީހަށް ފޮނުވާފައިވާ މައްސަލައެކެވެ. އަދި މި މައްސަލައިގައި ދައުވާ އުފުލާފައިވަނީ ނިމިދިޔަ އަހަރުގެ އޮކްޓޯބަރު މަހުގެ 25 ވަނަ ދުވަހުއެވެ.
