އިރާނުގައި ބޭރު ޤައުމުތަކުގެ ވެކްސިން ޖެހުން މަނާކޮށްފި
އެމެރިކާއާއި، އިނގިރޭސިވިލާތުގެ ވެކްސިން ގެނައުންވެސް މަނާ
އިރާނުގެ ރައީސް ޙަސަން ރޫޙާނީ
އިރާނުގައި ބޭރު ޤައުމުތަކުގެ ވެކްސިން ޖެހުން މަނާކޮށްފިއެވެ.
ރޮއިޓަރސްގައި ރިޕޯޓް ކޮށްފައިވާ ގޮތުން އެހެނިހެން ޤައުމުތަކުގެ ކުންފުނިތަކުން އުފައްދާ ވެކްސިން އިރާނުގެ ރައްޔިތުންގެ ގަޔަށް ޖެހުން އެ ޤައުމުގެ ރައީސް ޙަސަން ރޫހާނީ ވަނީ މަނާ ކުރައްވާފައެވެ. މި ނިންމުން ނިންމަވާފައިވަނީ އެމެރިކާއާއި، އިނގިރޭސިވިލާތުގެ ވެކްސިން ގެނައުން މަނާ ކުރުމަށް އެ ޤައުމުގެ ސުޕްރީމް ލީޑަރ އާޔަތުﷲ ޙާމަނާއީ ނިންމަވާފައިވާ ދަނޑިވަޅެއްގައެވެ.
ހުކުރު ދުވަހު ޙާމަނާއީ ވިދާޅުވީ، އެމެރިކާއާއި އިނގިރޭސިވިލާތުގެ ވެކްސިނަށް ބަރޯސާ ނުވެވޭ ކަމަށާއި، އެ ޤައުމުތަކުން ބޭނުންވަނީ އެހެން ޤައުމުތަކަށްވެސް ބަލި ފެތުރުމަށް ކަމަށެވެ. އެހެންނަމަވެސް، އިރާނަށް އިތުބާރު ހިފޭ ޤައުމެއްގެ ވެކްސިނަކަށް ހުއްދަ ދިނުމާމެދު އިއުތިރާޒެއް ނެތް ކަމަށްވެސް ޙާމަނާއީ ވަނީ ވިދާޅުވެފައެވެ.
އެކަމާ ގުޅޭގޮތުން ރޫޙާނީ ވިދާޅުވީ، އިރާނުގެ ރައްޔިތުންނަށް ވެކްސިން ޖެހުމަށް އެދި ބޭރުގެ އެކި ކުންފުނިތަކުން ހުށައަޅަމުންދާ ކަމަށެވެ. އެހެން ނަމަވެސް، އެ ޤައުމުގެ ސިއްޙަތާބެހޭ ވުޒާރާއިންވެސް އެކަން މަނާ ކޮށްފައިވާ ކަމަށް އޭނާ ވިދާޅުވިއެވެ. އެހެން ނަމަވެސް، ހުށައަޅާފައިވަނީ ކޮން ކުންފުނިތަކެއްކަން ހާމަ ކުރައްވާފައެއް ނުވެއެވެ.
އިރާނުން ދަނީ އެ ޤައުމުގެ އަމިއްލަ ވެކްސިނެއް އުފެއްދުމުގެ މަސައްކަތް ކުރަމުންނެވެ. އެގޮތުން މިހާރު އެ ވެކްސިންގެ ހިއުމަން ޓްރަޔަލްވެސް ވަނީ ފަށާފައެވެ.
