ފައިޒަރގެ ކޮވިޑް ވެކްސިން އައު ވޭރިއަންޓަށް މަސައްކަތްކުރާނެ - ދިރާސާ

ކޮވިޑް-19 އަށް ފައިޒަރ އާއި ބައޯއެންޓެކް އިން އުފައްދާފައިވާ ވެކްސިން މަސައްކަތްކުރާނެ ކަމަށް ދިރާސާއަކުން ދައްކައިފިއެވެ.

ސައިންޓިސްޓުން ވަނީ ވައިރަސްގެ އައު ވޭރިއަންޓްގެ ވާޝަންއެއް ލެބް ގައި އުފައްދަައި، ފައިޒަރ ވެކްސިންގެ ކްލިނިކަލް ޓްރަޔަލްގައި ވެކްސިން ޖަހާފައިވާ 20 މީހުންގެ ލޭ ނަގައި މި ވޭރިއަންޓަށް ވެކްސިން މަސައްކަތްކުރޭތޯ ބަލާފައެވެ. އެގޮތުން ބެލި ބެލިމުން މި ވޭރިއަންޓަށްވެސް ވެކްސިން މަސައްކަތްކުރާ ކަމަށް ދައްކާ ކަމަށް ސައިންޓިސްޓުން ބުނެއެވެ.

ފައިޒަރ އާއި ޔުނިވަރސިޓީ އޮފ ޓެކްސަސްގެ މެޑިކަލް ބްރާންޗުން ކުރިއަށް ގެންދިޔަ މި ދިރާސާއިން އެކުންފުނީގެ ވެކްސިން ވައިރަހުގެ އައު ވޭރިއަންޓަށް މަސައްކަތްކުރާ ކަމަށް ދައްކާފައިވާ އިރު، މީގެ މަސް ދުވަސް ކުރިން ފައިޒަރ އިން ވަނީ މީގެ އެހެން ޓެސްޓުތަކެއްވެސް ހަދާފައެވެ.

އެގޮތުން ވައިރަސްގެ ތަފާތު ވޭރިއަންޓްތަކަށް ވެކްސިން ޓެސްޓުކޮށްފައިވާ ކަމަށާއި މި ހުރިހާ ވޭރިއަންޓަކަށްވެސް ވެކްސިން މަސައްކަތްކުރާ ކަމަށް ފައިޒަރ އިން ވަނީ ފާހަގަކޮށްފައެވެ.

އެމެރިކާގެ ފާމަސޫޓިކަލް ކުންފުނި ފައިޒަރ އާއި ޖަރުމަނުގެ ކުންފުންޏެއް ކަމަށްވާ ބައޯއެންޓެކް އިން އުފައްދާފައިވާ ވެކްސިންގެ އެންމެ ފަހުގެ ނަތީޖާތައް ދައްކާގޮތުން މި ވެކްސިނަކީ 95 އިންސައްތަ ކާމިޔާބު ވެކްސިނެކެވެ. މިހާރު އެމެރިކާ، ކެނެޑާ، ޔޫކޭ ފަދަ ބޮޑެތި ގައުމުތަކުގައި ފައިޒަރގެ ވެކްސިނަށް ހުއްދަދީ އާންމުންނަށް ވެކްސިން ޖެހުމުގެ ކަންތައްތައް ކުރިއަށް ގެންދާއިރު، ފައިޒަރގެ ވެކްސިނަކީ ޔޫރަޕިއަން ޔޫނިއަނުގެ ހުއްދަވެސް އެންމެ ފުރަތަމަ ލިބުނު ވެކްސިނެވެ.