މާފުށީ ޖަލަށް މީހަކު ނުވަންނަކަން ކަށަވަރު ކުރުމަށްފަހު، ޖަލު އާންމު ހާލަތަށް!
6 ޖެނުއަރީ 2021 | ބުދަ 18:49ފުލުހުންނާއި ޕްރިޒަންސް އޮފިސަރުން ގުޅިގެން ވަނީ ސާރޗް އޮޕަރޭޝަނެއް ކުރިޔަށް ގެންގޮސްފައި
ކ. މާފުށި ޖަލު، މިހާރު ވަނީ އާންމު ހާލަތަށް ގެނަސްފައި
ކ. މާފުށީ ޖަލަށް ބޭރުން ބަޔަކު ވަތް ކަމަށް ލިބުނު މައުލޫމާތާއި ގުޅިގެން ޖަލު ކުއްލި ހާލަތަށް ގެނައުމަށްފަހު، ބަޔަކު ނުވަންނަކަން ކަށަވަރު ކުރުމަށްފަހު ޖަލު އާންމު ހާލަތައް ގެނަސްފައިވާ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ މާފުށީ ޖަލު ސަރަހައްދަށް ބުދަ ދުވަހުގެރޭ ބަޔަކު ގަވައިދާ ހިލާފަށް ވަތް ކަމުގެ މައުލޫމާތު ލިބުމާއި ގުޅިގެން ޖަލު ކުއްލި ހާލަތަށް ގެނަސް، ޕްރިޒަންސް އޮފިސަރުންނާއި، ފުލުހުން ގުޅިގެން ސާރޗް އޮޕަރޭޝަނެއް ކުރިޔަށް ގެންގޮސްފައިވާ ކަމަށެވެ.
އަހުމަދު މުހައްމަދުފުޅު އިތުރަށް ބުނީ ސާރޗް އޮޕަރޭޝަނަށް ފަހު ގަވާއިދާ ހިލާފަށް އެއްވެސް ފަރާތެއް ޖަލު ސަރަހައްދަށް ވަދެފައި ނުވާ ކަމަށާއި، އަދި އެއްވެސް ގައިދީއަކު ޖަލުން ފިލާފައި ނުވާ ކަމަށެވެ. އެހެން ކަމުން މިހާރު ޖަލު ވަނީ އާންމު ހާލަތައް ގެނެވިފައިކަމަށް ވެސް އޭނާ ވިދާޅުވިއެވެ.
