ބާސެލޯނާގެ ކެޕްޓަން ލިއޮނެލް މެސީ އާއި ރެއާލް މެޑްރިޑުގެ ކެޕްޓަން ސާޖިއޯ ރާމޯސް ހޯދުމުގެ ރޭހުގައި ފްރާންސްގެ ޗެމްޕިއަން ޕީއެސްޖީ ހިމެނޭ ކަމަށް ރިޕޯޓުތައް ބުނެފިއެވެ.

އުމުރުން 33 އަހަރުގެ މެސީ އާއި އުމުރުން 34 އަހަރުގެ ރާމޯސް، އެ ކުޅުންތެރިއެއްގެ ޓީމާއެކު ހަދާފައި އޮތް އެއްބަސްވުން މި އަހަރުގެ ހޫނު މޫސުމުގައި ހަމަވާނެއެވެ. މީގެ ކުރިން މިދިޔަ އަހަރުގެ ހޫނު މޫސުމުގައި ބާސާ ދޫކޮށްލަން މެސީ ނިންމި ނަމަވެސް، ފަހުން ވަނީ މި ސީޒަނުގައި އެ ކުލަބުގައި މަޑުކޮށްފައެވެ. އެހެންކަމުން މި ސީޒަން ނިމުމުން ހިލޭ ޓްރާންސްފާއެއްގެ ދަށުން މެސީ ކުލަބު ބަދަލުކުރާނެ ކަމަށް ރިޕޯޓުތައް ބުނެއެވެ.

އަދި ރާމޯސްގެ އެއްބަސްވުން އާކުރުމަށް ރެއާލުން ގިނަ މަސައްކަތްތަކެއް ކޮށްފައިވާއިރު، ދާދި ފަހުން އެ ކުލަބުން ހުށަހެޅި އައު އެއްބަސްވުމަށް ރާމޯސް ދެކޮޅު ހަދާފައިވާ ކަމަށްވެސް ދާދި ފަހުން ސްޕެއިނުގެ މީޑިއާތަކުން ވަނީ ރިޕޯޓުކޮށްފައެވެ. އަދި މި އަހަރުގެ ހޫނު މޫސުމުގައި އެއްބަސްވުން ހަމަވާތީ މެސީ އާއި ރާމޯސްއަށްވެސް މި މަހު އެއްވަނަ ދުވަހުން ފެށިގެން އެ ދެ ކުޅުންތެރިން އިޚުތިޔާރުކުރާ ކުލަބަކާއެކު އެއްބަސްވުމެއްގައި ސޮއިކުރުމުގެ ފުރުސަތު ލިބެއެވެ.

މީގެ ކުރިންވެސް މެސީ ޕީއެސްޖީއަށް ބަދަލުވާން އުޅޭ ކަމަށް މީޑިއާގައި ވާހަކަ ދެެކެވުނު ނަމަވެސް، އޭނާގެ ބައްޕަ ޖޯޖް މެސީ ވަނީ އެ ވާހަކަތައް ދޮގުކޮށްފައެވެ. އެކަމަކު ދާދި ފަހުން ސްޕެއިނުގެ މީޑިއާތަކުން ވަނީ މެސީގެ އިތުރުން ރާމޯސް ހޯދުމަށް ޕީއެސްޖީން މިހާރު މަސައްކަތް ކުރަމުން އަންނަ ކަމަށް ރިޕޯޓުކޮށްފައެވެ.

އަދި ދާދި ފަހުން ޕީއެސްޖީގެ ކޯޗުގެ މަގާމާ ހަވާލުވި މައުރީސިއޯ ޕޮޗެޓީނޯ ބޭއއްވި ފުރަތަމަ ނޫސްވެރިންގެ ބައްދަލުވުމުގައި ވަނީ ދުނިޔޭގެ ފުޓްބޯޅައިގެ ތަރިން އެ ކުލަބަށް އަންނަން ބޭނުން ކަމުގައިވާނަމަ އެ ފުރުސަތު އަބަދުވެސް އޮންނާނެ ކަމަށް ބުނެފައެވެ. އަދި އެ ކުޅުންތެރިންނަށް އުފަލާއެކު މަރުހަބާ ކިޔާނެ ކަމަށްވެސް ޕޮޗެޓީނޯ ވަނީ ބުނެފައެވެ.

މެސީ އާއި ރާމޯސް ހޯދުމުގެ ރޭހުގައި ޕީއެސްޖީ ހިމެނޭއިރު، އެ ދެ ކުޅުންތެރިން ހޯދުމަށް މެންޗެސްޓާ ސިޓީންވެސް އަންނަނީ މަސައްކަތް ކުރަމުންނެވެ.