ފްލައިން ސްކޫލްގެ މައްސަލައިގައި ޓްރާންސްޕޯޓް މިނިސްޓަރާއި ހަޔަރ އެޑިޔުކޭޝަން މިނިސްޓަރ ކޮމިޓީއަށް ހާޒިރުކުރަނީ
ކޮމިޓީ ބައްދަލުވުން އޮންނާނީ އަންގާރަ ދުވަހުގެ ހެނދުނު 11:30 ގައި
އައްޑޫ ފްލައިންގ ސްކޫލް
އޭޝިޔަން އެކެޑެމީ އޮފް އެރޮނޯޓިކްސް (އޭއޭއޭ) އަށާއި އެ އެކެޑެމީގައި ކިޔަވަމުންދާ ދަރިވަރުންނަށް ކުރިމަތިވެފައިވާ މައްސަލަތަކާއި ގުޅޭގޮތުން ރައްޔިތުންގެ މަޖިލީހުގެ ގައުމީ ތަރައްޤީ އާއި ތަރިކައިގެ ކޮމިޓީއަށް ކަމާބެހޭ ދެ ވަޒީރަކު ހާޒިރުކޮށް ކޮމިޓީ ބައްދަލުވުން ކުރިޔަށް ގެންދިޔުމަށް އެޖެންޑާކޮށްފިއެވެ.
މިމައްސަލައިގައި ސާފުކުރަން ބޭނުންވާ ކަންކަން ސާފުކުރުމަށް ބާއްވާ ކޮމިޓީ ބައްދަލުވުން އޮންނާނީ އަންގާރަ ދުވަހުގެ ހެނދުނު 11:30 ގައެވެ. ކޮމިޓީގެ މިބައްދަލުވުމަށް ދެ މިނިސްޓަރެއް ހިމެނޭ ގޮތަށް 10 ފަރާތެއް ހާޒިރުކުރުމަށް ވަނީ ހަމަޖެހިފައެވެ. އޭގެތެރޭގައި ހިމެނެނީ ހަޔަރ އެޑިޔުކޭޝަން މިނިސްޓަރ ޑރ އިބްރާހީމް ހަސަން ހިމެނޭގޮތަށް އެމިނިސްޓްރީގެ 5 ބޭފުޅުންނާއި ޓްރާންސްޕޯޓް މިނިސްޓަރ އައިޝަތު ނަހުލާ ހިމެނޭގޮތަށް އެމިނިސްޓްރީގެ ދެ ބޭފުޅުންނެވެ. އަދި މޯލްޑިވްސް ސިވިލް އޭވިއޭޝަން އޮތޯރިޓީގެ 3 ބޭފުޅުންވެސް ކޮމިޓީއަށް ހާޒިރުކުރުމަށް ވަނީ ހަމަޖެހިފައެވެ.
ހަޔަރ އެޑިޔުކޭޝަން މިނިސްޓަރ ޑރ އިބްރާހީމް ހަސަންގެ އިތުރުން ދެން އެމިނިސްޓްރީން ކޮމިޓީއަށް ހާޒިރުކުރުމަށް ހަމަޖެހިފައިވަނީ އެމިނިސްޓްރީގެ ސްޓޭޓް މިނިސްޓަރ ޚަދީޖާ އާދަމް އާއި މިނިސްޓަރގެ ނައިބު ޑރ އައިޝަތު ޝަފީނާ އާއި އެސިސްޓެންޓް ޑިރެކްޓަރ މަރިޔަމް މުހައްމަދެވެ. އަދި އެމިނިސްޓްރީގެ ލީގަލް އޮފިސަރ އަލްއުސްތާޛު އަހުމަދު ވިސާމް ވެސް ކޮމިޓީގެ ބައްދަލުވުމަށް ހާޒިރުކުރުމަށް ވަނީ ހަމަޖެހިފައެވެ.
ޓްރާންސްޕޯޓް މިނިސްޓަރ ނަހުލާގެ އިތުރުން ދެން ކޮމިޓީއަށް ހާޒިރުކުރަނީ އެމިނިސްޓްރީގެ ޑެޕިޔުޓީ މިނިސްޓަރ ޙަމަދު އަބްދުލްޢަނީ އެވެ.
ސިވިލް އޭވިއޭޝަން އޮތޯރިޓީގެ ފަރާތުން ޗީފް އެގްޒެކެޓިވް ހުސައިން ޖަލީލު އާއި ޑިރެކްޓަރ އެއާވާދިނަސް އަބްދުﷲ މުހައްމަދު އަދި ސީނިއަރ ފްލައިޓް އޮޕަރޭޝަން އޮފިސަރ ނަސްރުﷲ ޝަކީބުވެސް ކޮމިޓީ ބައްދަލުވުމަށް ހާޒިރުކުރުމަށް ވަނީ ހަމަޖެހިފައެވެ.
މިމައްސަލައިގައި ކޮމިޓީގައި ހިމެނިވަޑައިގަންނަވާ 6 މެމްބަރަކު ވަނީ ޑިސެމްބަރ މަހުގެ 27 ވަނަ ދުވަހު އައްޑޫ ސިޓީއަށް ވަޑައިގެން އައްޑޫ ސިޓީ ކައުންސިލާއި ފްލައިން ސްކޫލްގެ މެނޭޖްމަންޓާއި ގަން އިންޓަރނޭޝަނަލް އެއަރޕޯޓްގެ ބޭފުޅުންގެ އިތުރުން ފްލައިން ސްކޫލްގެ ދަރިވަރުންނާ ބައްދަލުކޮށް މަޝްވަރާކޮށްފައެވެ.
މިދިޔަ އަހަރަށް ރައްޔިތުންގެ މަޖިލީހުގެ ޖަލްސާތައް ނިންމާލުމަށްފަހު ބޭއްވި "އާސްކް ސްޕީކަރ" ޕްރޮގްރާމްގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އާންމުންގެ ފަރާތުން މީހަކު ވަނީ ފްލައިން ސްކޫލްގެ މައްސަލަ މަޖިލީހުން ބަލާނެތޯ ސުވާލުކޮށްފައެވެ. އެސުވާލަށް ޖަވާބު ދެއްވަމުން ރައީސް ނަޝީދު ވިދާޅުވެފައިވަނީ އެފަދަ މައްސަލައެއް މަޖިލީހުގެ އިދާރާއަށް ހުށަހެޅިއްޖެނަމަ ކަމާ ބެހޭ ކޮމިޓީއަކުން އެކަން ބަލާނެކަމަށެވެ. ގައުމީ ތަރައްޤީ އާއި ތަރިކައިގެ ކޮމިޓީން މިމައްސަލަ ބަލަން ފަށާފައިވަނީ އޭގެފަހުންނެވެ.
އައްޑޫ ފްލައިންގ ސްކޫލުގައި ތަމްރީނު ހޯދަމުންދާ ދަރިވަރުންގެ ކަންބޮޑުވުންތަކަށް އެކި ގޮތްގޮތުން ހައްލު ހޯދައިދިނުމަށް ހަޔަރ އެޑިޔުކޭޝަން މިނިސްޓްރީ އާއި ޓްރާންސްޕޯޓް މިނިސްޓްރީން މީގެކުރިން ވަނީ ބައްދަލުވުންތައް ބާއްވާ އެކަމަށް ހައްލު ހޯދުމަށް މަސައްކަތްކޮށްފައެވެ.
އެސްކޫލުން ދަރިވަރުން ވަކިކުރުމުގެ މައްސަލަޔާއި ކޯސް ދިގުލައިގެން ދިޔުންފަދަ އެތައް މައްސަލައެއް ދަރިވަރުން ވަނީ ފާހަގަކޮށްފައެވެ.
