ދިރާގު ދިވެހި ޕްރިމިއާ ލީގުގައި ހޯމަ ދުވަހުގެރޭ ކުޅުނު މެޗުން ޓީސީ ސްޕޯޓްސް ކުލަބުން ފަހު ވަގުތު ޔުނައިޓެޑް ވިކްޓަރީ (ޔޫވީ) އާ އެއްވަރުކޮށްފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ދެ ޓީމަށްވެސް ނުރައްކާތެރި ހަމަލާއެއް އުފެއްދިފައެއް ނުވެއެވެ. އެކަމަކު ދެވަނަ ހާފު ފަށައިގެން ޔޫވީން ވަނީ މެޗުގެ ކޮންޓްރޯލް ނަގައިފައެވެ. އެގޮތުން މެޗުގެ 59 ވަނަ މިނެޓުގައި ޔޫވީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު މަރަޓް އަދްޒިނިޔަޒޯފެވެ.

ޔޫވީގެ ލަނޑާއެކު ޓީސީން ވަނީ އެ ޓީމުގެ ކުޅުން ރަނގަޅުކޮށްފައެވެ. އެގޮތުން މެޗުގެ 83 ވަނަ މިނެޓުގައި ޓީސީގެ ފޯވާޑް މެލްކޮމް ކޮނޭލިއަސް ސްޓެވާޓަށް ވަނީ ނަތީޖާ އެއްވަރުކުރުމަށް ރަނުގެ ފުރުސަތެއް ލިބި ބޭކާރުވެފައެވެ. އެކަމަކު މެޗުގެ އިތުރު ވަގުތުގައި ޓީސީން ލަނޑު ޖަހާ ނަތީޖާ އެއްވަރުކޮށްފައެވެ. އިބްރާހިމް އަބްދުލް ވާހިދު (ވާޑު) ފޮނުވާލި ހިލޭ ޖެހުމުގެ ބޭނުން ހިފައި މި ލަނޑު އެޓީމަށް ކާމިޔާބުކޮށްދިނީ ޑިފެންޑަރު މުޙައްމަދު އަޖުފާނެވެ.

މި މެޗަށްފަހު ވާހަކަ ދައްކަމުން ޓީސީގެ ކޯޗު މުޙައްމަދު ޝާޒްލީ (ޝާޒް) ބުނީ މެޗަށް ޓީސީން ނުކުތީ ތިން ޕޮއިންޓް ހޯދުމަށް ކަމަށާއި، އެކަމަކު މެޗުން ޕޮއިންޓެއް ލިބުމުންވެސް އެކަމާ ހިތްހަމަޖެހޭ ކަމަށެވެ. އަދި މި މެޗުގައި ކުޅުންތެރިން ކުރި ހިތްވަރަށް ޝާޒްލީ ވަނީ ތާރީފުކޮށްފައެވެ.

ޔޫވީގެ ކޯޗު މުޙައްމަދު އާދަމް ބުނީ މެޗު އެއްވަރުވީ ފަހު ވަގުތުކޮޅު ދެ ޑިފެންޑަރުންނަށް އަނިޔާވުމުން ކަމަށެވެ. އަދި މެޗުން ޕޮއިންޓެއް ލިބުމުގައި ޔޫވީއަށް ނަސީބުވެސް ދެރަ ކަމަށް ބުންޏެވެ. މެޗުގެ ފަހު ވަގުތުކޮޅު ޔޫވީގެ ދެ ޑިފެންޑަރުންނަށް އަނިޔާވިއިރު، ޔޫވީގައި މި ވަގުތު އަނިޔާގެ މައްސަލަތައް ގިނަ ކަމަށްވެސް މުޙައްމަދު އާދަމް ވަނީ ބުނެފައެވެ.

ޓީސީ އާއި ޔޫވީ ބައްދަލުކުރި މެޗު އެއްވަރުވިއިރު، ޓީސީ އޮތީ ތާވަލުގެ ފަސްވަނައިގައި ކުޅުނު ހަތަރު މެޗުން ލިބުނު ފަސް ޕޮއިންޓާއެކުއެވެ. އަދި މިހާތަނަށް ލީގުގައި މެޗަކުން މޮޅުވެފައިނުވާ ޔޫވީ ތާވަލުގެ ފުލުން ދެވަނައިގައި ހަތަރު މެޗުން ދެ ޕޮއިންޓާއެކުއެވެ.