މެދުރާއްޖެތެރޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ އައިލެންޑާސް ފުޓްސަލް ޗެލެންޖް މި އަހަރުގެ ޖުލައި މަހު ބޭއްވުމަށް ނިންމައިފިއެވެ.

މި މުބާރާތަކީ ޓީއެފްއެމް ސްޕޯޓްސް ކްލަބުން އިންތިޒާމުކޮށްގެން ކޮންމެ އަހަރަކުވެސް މ. ދިއްގަރުގައި ބާއްވަމުން އަންނަ މުބާރާތެކެވެ. މި އަހަރު މި މުބާރާތް ބާއްވަން ތާވަލުކުރިއިރު، މިދިޔަ އަހަރުގެ މުބާރާތް ބާއްވާފައެއް ނުވެއެވެ. މީގެ ކުރިން މިދިޔަ އަހަރުގެ މެއި މަހުގެ 29 ވަނަ ދުވަހުން ޖޫން މަހުގެ ފަސްވަނަ ދުވަހުގެ ނިޔަލަށް މުބާރާތް ބާއްވަން ތާވަލުކުރި ނަމަވެސް، ކޮވިޑް-19 އާ ގުޅިގެން މުބާރާތް ފަސްކުރަން ޖެހުނެވެ.

އެއާއެކު މި އަހަރުގެ މުބާރާތް ބާއްވަން ތާވަލުކުރިއިރު، މުބާރާތް ކުރިއަށްދާނީ ޖުލައި މަހުގެ އެއްވަނަ ދުވަހުން ފެށިގެން ނުވަވަނަ ދުވަހުގެ ނިޔަލަށް ކަމަށް ޓީއެފްއެމް ސްޕޯޓްސް ކުލަބުން މައުލޫމާތުދެއެވެ. އަދި މި މުބާރާތުގައި ބައިވެރިވުމުގެ ފުރުސަތު އަވަސް މުސްތަގުބަލެއްގައި ހުޅުވާލާނެ ކަމަށްވެސް އެ ކުލަބުން މައުލޫމާތުދެއެވެ.

ކޮންމެ އަހަރަކުވެސް ދިއްގަރުގައި ބާއްވާ މި މުބާރާތުގައި މ. އަތޮޅުގެ ގިނަ ރަށްތަކެއްގެ ޓީމުތައް އަންނަނީ ވާދަކުރަމުންނެވެ. އެންމެ ފަހުން މި މުބާރާތް 2019 ވަނަ އަހަރު ބޭއްވިއިރު، އެ މުބާރާތުގައި ޖުމްލަ 10 ޓީމެއް ވަނީ ވާދަކޮށްފައެވެ. އެ އަހަރުގެ މުބާރާތުގެ ޗެމްޕިއަންކަން ހޯދާފައިވަނީ ޑީސީޖޭ ސްޕޯޓްސް ކުލަބުންނެވެ. ޑީސީޖޭ މުބާރާތުގެ ޗެމްޕިއަންކަން ހޯދީ ފައިނަލް މެޗުގައި އެފްއޯޑީއާ ވާދަކޮށް 4-2 ގެ ނަތީޖާއަކުން މެޗު ކާމިޔާބުކޮށްގެންނެވެ.

މިއަހަރުގެ ޖުލައި މަހު އައިލެންޑާސް ފުޓްސަލް ޗެލެންޖް ބާއްވާއިރު، މި މުބާރާތުގެ މީޑިއާ ޕާޓްނަރަކީ ރާއްޖެޓީވީއެވެ.