އެތެރޭގެ އުދުހުންތަކުގެ ޑިމާންޑް ވަރަށް ބޮޑު: މޯލްޑިވިއަން
2 ޖެނުއަރީ 2021 | ހޮނިހިރު 07:56ހުރިހާ ޑެސްޓިނޭޝަނަކަށްވެސް ޑިމާންޑް ބޮޑުކަން ފާހަގަކުރެވިފައިވޭ
މޯލްޑިވިއަނުން ރާއްޖޭގެ 15 ސަރަހައްދަކަށް ދަތުރުކުރޭ
އެތެރޭގެ އުދުހުންތަކުގެ ޑިމާންޑް ވަރަށް ބޮޑު ކަމަށް ރާއްޖޭގެ ގައުމީ އެއަރލައިން މޯލްޑިވިއަނުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން މޯލްޑިވިއަންގެ ޕަބްލިކް ރިލޭޝަންސް އެންޑް ކޮމިއުނިކޭޝަންސް މެނޭޖަރ މޫސާ ވަސީމް ވިދާޅުވީ އެތެރޭގެ އުދުހުންތަކުގެ ޑިމާންޑް ބޮޑުވެފައިވަނީ ކަރަންޓީނުގެ މުއްދަތު 10 ދުވަހަށް ބަދަލު ކުރުމާއި ގުޅިގެންނެވެ.
އެގޮތުން ހުރިހާ ޑެސްޓިނޭޝަނަކަށްވެސް ޑިމާންޑް ބޮޑުކަން ފާހަގަކުރެވިފައިވާއިރު ފްލައިޓްތައްވެސް އިތުރުކޮށްފައިވާ ކަމަށެވެ.
މޯލްޑިވިއަނުން މިހާރު ރާއްޖޭގެ 15 ޑެސްޓިނޭޝަނަކަށް ދަތުރުކުރަމުންދާއިރު ބައެއް ޑެސްޓިނޭޝަންތަކަށް ދުވާލަކަށް ދެ ފްލައިޓް ނުވަތަ ތިން ފްލައިޓް ބާއްވަމުން އަންނަ ކަމަށެވެ. އަދި ގަން އިންޓަރނޭޝަނަލް އެއަރޕޯޓަށް ދުވާލަކަށް 4 ނުވަތަ 5 ފްލައިޓްވެސް މި ދުވަސްވަރު ބާއްވަން ވަނީ ޝެޑިއުލްކޮށްފައެވެ.
ކޮވިޑް-19 އާއި ގުޅިގެން ސްކޫލުތަކުގެ ކިޔެވުން މެދުކަނޑާލާފައި އޮތުމަށްފަހު ޖެނުއަރީ 10 ގައި ސްކޫލު ހުޅުވުމަށް މަސައްކަތްކުރަމުންދާއިރު ފްލައިޓްތަކަށް ބާރު ބޮޑުވެގެންދާނެ ކަމަށް މޯލްޑިވިއަނުން ފާހަގަކުރެއެވެ. އެހެންކަމުން ފަހު ވަގުތަށް ސީޓްތައް ހޯދުމަށް މަޑުނުކޮށް ހުރިހާ ފަރާތްތަކުންވެސް ދުރާލާ ބުކިން ކޮންފޯމް ކުރުމަށް މޯލްޑިއަނުން ވަނީ އެދިފައެވެ.
ރާއްޖެއެމްވީއަށް މައުލޫމާތުދެމުން ޓާރމިނަލްސް އޮޕަރޭޝަންސްގެ ޖެނެރަލް މެނޭޖަރ އިބްރާހިމް ހަސަން ވިދާޅުވީ އައު އަހަރާއި ދިމާކޮށް ފުރަތަމަ ދެ ދުވަހު މޫވްމަންޓްތައް މަދުވި ނަމަވެސް ކުރިއަށް އޮތް ދުވަސްތަކުގައި މި އަދަދު އިތުރުވެގެންދާނެ ކަމަށެވެ.
އެގޮތުން ހުކުރު ދުވަހު އެތެރޭގެ އުދުހުންތަކުގެ ޖުމްލަ އަދަދު އުޅެނީ 28 ފްލައިޓެވެ. އެއީ މޯލްޑިވިއަނުން 24، ފްލައިމީން 2 އަދި މަންތާ އިން 2 ދަތުރެއެވެ. މީގެ ކުރިން އެންމެ ގިނަ އަދަދަކަށް އެތެރޭގެ އުދުހުންތައް ހިނގާފައިވަނީ ޑިސެމްބަރު 20ގައެވެ. އެއީ 34 މޫވްމެންޓެވެ.
ޑޮމެސްޓިކް ފްލައިޓްތަކުން 722 މީހުން މާލެ އައިސްފައިވާއިރު، 817 މީހަކު ވަނީ މާލެއިން ފުރާފައެވެ.
ހޮނިހިރު ދުވަހުގެ ތަފާސްހިސާބުތައް ދައްކާ ގޮތުން ރާއްޖެއިން 4700 އަށްވުރެ ގިނަ މީހުން ފުރާނެ ކަމަށް ލަފާކުރެވޭއިރު ރާއްޖެ އަންނާނެ ކަމަށް ލަފާކުރެވިފައިވަނީ 4000 މީހުންނެވެ.
ކޮވިޑް-19 އާއި އެކު ރާއްޖޭގެ މައި އެއަރޕޯޓަށް ފަޅުކަމެއް އައި ނަމަވެސް މިހާރު އެއަރޕޯޓްގެ ހަރަކާތްތައް ދަނީ މަޑު މަޑުން އިތުރުވަމުންނެވެ. އަދި ކުރިއަށް އޮތްތާގައި އެއަރޕޯޓަށް ކުރާ ދަތުރުތަށް އިތުރުވެގެންދާނެ ކަމަށް ކަމާބެހޭ ފަރާތްތަކުން ލަފާކުރެ އެވެ.
