އަހަރުތަކެއްގެ ދިގުދެމުމަކަށްފަހު، އިނގިރޭސި ރައްޔިތުންގެ ނިންމުމާ އެއްގޮތަށް އިނގިރޭސިވިލާތް ޔޫރަޕުގެ އިއްތިހާދު (އީޔޫ)ން ވަކިވެއްޖެއެވެ.
ފާއިތުވެދިއަ އަހަރު އިނގިރޭސިވިލާތުން ޔޫރަޕުގެ އިއްތިހާދުން ރަސްމީކޮށް ވަކިވެފައި ވީ ނަމަވެސް އެއާއިއެކު 11 މަހުގެ ޓްރާންޒިޝަން މުއްދަތެއް ވަނީ ފެށިފައެވެ. އަދި މި މުއްދަތުގެ ތެރޭގައި އިނގިރޭސިވިލާތުން ތަބައުވެފައިވަނީ އީޔޫގެ ގަވައިދުތަކާއި އުސޫލުތަކަށެވެ.
އީޔޫއިން ވަކިވާން އިނގިރޭސި ރައްޔިތުން ވޯޓު ދިންތާ ތިން އަހަރު ފަހުން އިނގިރޭސިވިލާތް އީޔޫއިން ވަކިވެފައިވަނީ، 2020 ވަނަ އަހަރުގެ ފެބްރުއަރީ މަހުގެ އެއްވަނަ ދުވަހުއެވެ. މިކަމާއި އެގައުމުގެ އެއް ބަޔަކު އުފާފާޅުކޮށްފައިވާއިރު، އަނެއް ބަޔަކު ވަނީ ހިތްހަމަނުޖެހުން ފާޅުކޮށް އިހުތިޖާޖުކޮށްފައެވެ.
މީގެ އިތުރުން އީޔޫއިން ވަކިވުމުން އެ ދެ ފަރާތުން ވިޔަފާރި ކުރާނެ ގޮތުގެ އެއްބަސްވުމަކަށް އާދެވިއްޖެކަމަށް އިނގިރޭސިވިލާތުގެ ބޮޑު ވަޒީރު ބޮރިސް ޖޯންސަން ވިދާޅުވީ ފާއިތުވި ޑިސެމްބަރު މަހުގެ 25 ވަނަ ދުވަހުއެވެ.
އީޔޫއިން ވަކިވުމަކީ އިނގިރޭސިވިލާތުގެ ބޮޑުވަޒީރުގެ ބޯރިސް ޖޯންސަންގެ އިންތިހާބީ ވައުދެކެވެ. އަދި މިކަމާއި ގުޅޭގޮތުން ފޭސްބުކްގައި ކުރެއްވި ޕޯސްޓެއްގައި ބޯރިސް ވިދާޅުވީ، މިއީ ނިމުމެއް ނޫން ކަމަށާއި، މިއީ ފެށުން ކަމަށެވެ.
އިނގިރޭސިވިލާތުން އީޔޫއާ ވަކިވުމުގެ މަސައްކަތް ފަށާފައިވަނީ 2016 ވަނަ އަހަރުގައެވެ.
