ފައިމަގުގައި އުޅޭ ވަގުތު ޒަރޫރީ ބޭނުމަށް އުޅަނދު ދުއްވުމަށް ހުއްދަ ދޫކުރުން މިއަދު
31 ޑިސެމްބަރު 2020 | ބުރާސްފަތި 02:20ހުއްދަ ދޫކުރުމަށް ނިންމާފައިވަނީ މިއަދު ހެނދުނު 08:00ން 14:00ށް
މާލެސިޓީގެ މަގުމަތި
އަންނަ 2021 ވަނަ އަހަރުގެ ފުރަތަމަ ދުވަހުގެ ހަވީރު 4:00ން ރޭގަނޑު 8:00ށް މާލެއާއި ވިލިމާލޭގެ މަގުތަކުގައި ވެހިކަލް ދުއްވުން މަނާކުރަން މާލެ ސިޓީ ކައުންސިލުން ނިންމާފައިވާއިރު ފައިމަގުގައި އުޅޭ ވަގުތު ޒަރޫރީ ބޭނުމަށް އުޅަނދު ދުއްވުމަށް މިއަދު ހުއްދަ ދޫކުރާނެ ކަމަށް މާލެސިޓީ ކައުންސިލުން ބުނެފިއެވެ.
އެ ކައުންސިލުން ބުނީ ފައިމަގުގައި އުޅޭ ވަގުތު ޒަރޫރީ ބޭނުމަށް އުޅަނދު ދުއްވުމަށް ހުއްދަ ދޫކުރުމަށް ނިންމާފައިވަނީ މިއަދު ހެނދުނު 08:00ން 14:00ށް ކައުންސިލުގެ އާންމު ހިދުމަތްތަކާއި ބެހޭ ބައިން ކަމަށެވެ.
މާލެ ސިޓީ ކައުންސިލުން ބުނެފައިވަނީ، މިއަހަރަކީ ކޮވިޑް-19ގެ ސަބަބުން މާލޭ ސިޓީގެ ގިނަ ރައްޔިތުން ފުރަ ބަންދުވެ، ދަތުރުފަތުރު ކުރުން ހުއްޓިފައިވާ ހާލަތުގައި ދުވަސްތައް ހޭދަ ކުރަން ޖެހިފައިވާ އަހަރެއް ކަމަށެވެ. އަދި މިއަދާ ހަމައަށްވެސް އާންމު ހާލަތަށް ނުދެވިވާތީ މިހާލަތުގައި ތިބި ރައްޔިތުންނަށް ހިތްހަމަޖެހުމެއް ގެނެސްދިނުމަށް ކައުންސިލުން ބޭނުންވާ ކަމަށެވެ.
މިގޮތުން ކުރެވޭ މަސައްކަތުގެ ދަށުން މާލެ ސިޓީގެ މާލެ އަދި ވިލިމާލޭގައި ފައިމަގުގައި ހިނގާ ވަގުތުކޮޅެއް ހަމަޖައްސައި ދިނުމަށްޓަކައި 2021 ވަނަ އަހަރުގެ ޖެނައަރީ މަހުގެ 01 ވާ ހުކުރު ދުވަހުގެ ހަވީރު 4:00ން 8:00ށް މާލޭ ސިޓީގެ މާލެ، ވިލިމާލޭގެ މަގުތަކަކީ ފައިމަގުގައި ހިނގާއުޅޭ ވަގުތެއްގެ ގޮތުގައި ހަމަޖެއްސުމަށް ސިޓީ ކައުންސިލުން ނިންމާފައިވާ ކަމަށެވެ.
ސިޓީ ކައުންސިލުން ބުނީ، 01 ޖަނަވަރީ 2021 ވާ ހުކުރު ދުވަހުގެ ހަވީރު 4:00 ން ރޭގަނޑު 8:00 އާއި ދެމެދު އެއްގަމުގައި ދުއްވާ އިންޖީނުލީ އުޅަނދުތަކުގެ ތެރެއިން ހުއްދަ ދީފައިވާ އުޅަނދު ފިޔަވައި އެހެން އުޅަނދު މާލޭ ސިޓީގެ މާލެ އަދި ވިލިމާލޭގެ މަގުތަކުގައި ދުއްވުމަކީ މަނާކަމެއް ކަމުގައި ޢާއްމުކޮށް އަންގާ ޢިއުލާންކުރާ ކަމަށެވެ.
ސިޓީ ކައުންސިލުން ބުނީ، އެކައުންސިލްގެ މި އެންގުމާ ހިލާފުވާ ފަރާތްތަކާމެދު، އެއްގަމު ދަތުރުފަތުރުގެ ގާނޫނުގެ ދަށުން ފިޔަވަޅު އަޅާނެ ކަމަށެވެ.
