މި މަހުގެ 20 ވަނަ ދުވަހު މާލޭގައި ކުރިއަށްދިޔަ ކައިވެނި ޕާޓީއަކުން ކޮވިޑް-19 އަށް ޕޮޒިޓިވްވީ މީހުންގެ އަދަދު އިތުރުވެ، އެ ކްލަސްޓާއިން ކޮންޓެކްޓްވީ މީހުންގެ އަދަދު 229 އަށް އަރައިފިއެވެ.

ހެލްތް އެމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ ނަޒްލާ ރަފީގު ވިދާޅުވީ، އެންމެ ފަހުން ލިބުނު ނަތީޖާތަކާއެކު ކައިވެނި ކްލަސްޓާއިން މިހާތަނަށް 67 މީހަކު ކޮވިޑަށް ޕޮޒިޓިވްވެގެން ރިޕޯޓުކޮށްފައިވާ ކަމަށެވެ.

ޑރ ނަޒްލާ ވިދާޅުވީ، މިހާތަނަށް 229 މީހުން ކައިވެނި ޕާޓީގެ ކްލަސްޓާގެ ތެރެއިން ކޮންޓެކްޓުންގެ ގޮތުގައި ދެނެގަނެވިފައިވާ ކަމަށެވެ. އަދި އޭގެ ތެރެއިން 68 މީހުންގެ ގައިން ކޮވިޑްގެ އަލާމާތްތައް ފެނިފައިވާ ކަމަށްވެސް އޭނާ ވިދާޅުވިއެވެ.

އެޗްއީއޯސީން މިހާތަނަށް މި ކްލަސްޓާއިން ފާހަގަކޮށްފައިވާ ޕޮޒިޓިވް ކޭސްތަކަށް ބަލާއިރު، މި މަހުގެ 24 ވަނަ ދުވަހު ވަނީ އެކަކު ޕޮޒިޓިވްވެފައެވެ. އަދި 25 ވަނަ ދުވަހު 12 މީހުން، 26 ވަނަ ދުވަހު 22 މީހުން، 27 ވަނަ ދުވަހު 8 އަދި 28 ވަނަ ދުވަހު 3 މީހުން ޕޮޒިޓިވްވެފައިވެއެވެ. މީގެ އިތުރުން 29 ވަނަ ދުވަހު 13 މީހުން އަދި 30 ވަނަ ދުވަހު 8 މީހަކު މިބައްޔަށް ޕޮޒިޓިވްވެފައިވާ ކަމަށް އެޗްއީއޯސީން ވަނީ ބުނެފައެވެ.

އެޗްއީއޯސީން ކުރިން ބުނެފައިވާ ގޮތުން ޕޮޒިޓިވްވި މީހުންގެ ތެރޭގައި ހައި ރިސްކު ހަތަރު މީހަކު ވެސް ހިމެނެ އެވެ. އަދި އަހަރު ނުވާ ދެ އަންހެން ކުދިންވެސް ވަނީ މި ކްލަސްޓާގެ ތެރެއިން ޕޮޒިޓިވްވެފައެވެ. އެ ޕާޓީއަށް 120 ވަރަކަށް މީހުން ދިޔައިރު، ރޯގާގެ އަލާމާތް ހުރި މީހުން ވެސް ޕާޓީއަށް ދިޔަ ކަމަށް އެޗްއީއޯސީން ވަނީ މީގެ ކުރިން ބުނެފަ އެވެ. އަދި މިހާތަނަށް ޕޮޒިޓިވްވި މީހުންގެ ތެރޭގައި ޕާޓީއަށް ދިޔަ މީހުންނާއި އެމީހުންގެ އާއިލާގެ މީހުންވެސް ހިމެނެއެވެ.

އެޗްޕީއޭ އިން މީގެ ކުރިން ވަނީ، އެ ހަފްލާއަށް ދިޔަ މީހުންގެ ތެރެއިން އެ އެޖެންސީން ނުގުޅާ މީހުން 1676 އަށް ގުޅައި، ވިހާވެސް ގިނަ މައުލޫމާތު ހިއްސާކުރުމަކީ މުހިންމު ކަމެއް ކަމަށް ބުނެފަ އެވެ. އަދި އެޗްޕީއޭ އިން އަދި ގުޅާފައި ނުވާ މީހުން ގެއިން ބޭރަށް ނުނިކުމެ، ގޭގައި އެކަހެރިވެ ތިބުމަށް ވަނީ އެދިފަ އެވެ.