"ހިޔާ" މަޝްރޫޢުގެ ފްލެޓުތަކުގެ ވަގުތީ ލިސްޓު އިޢުލާނުކޮށްފައިވާ ކެޓަގަރީތަކުގައި ދިރިއުޅުމުގެ ޙާލަތު ވަޒަންކުރުމުގައި ޕޮއިންޓް ދީފައިވާ ގޮތާ ގުޅޭގޮތުން ޝަކުވާ ހުށަހެޅުމަށް އިތުރު ފުރުޞަތެއް ފްލެޓުތަކުގެ މައްސަލަ ބަލާ ކޮމިޓީން ދީފިއެވެ.
ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުތަކުގެ މައްސަލަތައް ބެލުމަށް ރައީސުލްޖުމްހޫރިއްޔާ އުފެއްދެވި ފްލެޓުތަކުގެ މައްސަލަ ބަލާ ކޮމިޓީން މިއަދު ކުރިއިޢުލާނުގައި، އެކި ކެޓަގަރީތަކަށް ޕޮއިންޓް ދިނުމުގައި އަމަލުކޮށްފައިވާ އުޞޫލުތަކުގެ ތަފްޞީލު ވެސް ހިމަނާފައިވެއެވެ.
މި ގޮތުން، ފްލެޓްތަކުގެ މައްސަލަބަލާ ކޮމިޓީ އިން އިޢުލާނު ކޮށްފައިވާ "ހިޔާ" މަޝްރޫޢުގެ ދަށުން ފްލެޓަށް އެދި ހުށަހަޅާފައިވާ ފަރާތްތަކުގެ ވަގުތީ ލިސްޓުތަކަށް ޝަކުވާ ހުށަހެޅުމަށް އިތުރު ފުރުޞަތެއް ހުޅުވާފައި ވަނީ 2020 ޑިސެންބަރު 30 ވަނަ ދުވަހުން ފެށިގެން 2021 ޖަނަވަރީ 5 ވަނަ ދުވަހުގެ 15:00 ގެ ނިޔަލަށެވެ. މިއީ ޝަކުވާ ހުށަހެޅުމަށް ހުޅުވައިލެވޭ ދެވަނަ ފުރުޞަތު ކަމަށްވާތީ، މި މުއްދަތުގެ ތެރޭގައި ހުށަހެޅޭ ޝަކުވާތަކުގެ ތެރެއިން ކޮމިޓީއިން، މި ފަހަރު ރިޢާޔަތް ކުރުމަށް ހަމަޖެހިފައިވަނީ ހަމައެކަނި "ދިރިއުޅުމުގެ ޙާލަތު" ބަޔަށް ޕޮއިންޓް ދެވިފައިވާގޮތާ ގުޅޭގޮތުން ހުށަހެޅޭ ޝަކުވާތަކަށް އެކަނި ކަމުގައި އެ ކޮމިޓީއިން ވަނީ ބުނެފައެވެ. މިކަމާގުޅޭ އިތުރު މަޢުލޫމާތު ހޯއްދެއްވުމަށް 3010718 އަށް ގުޅުމަށް ވެސް އެ ކޮމިޓީން ކުރި އިޢުލާނުގައި އެދިފައެވެ.
ފްލެޓުތަކުގެ މައްސަލަބަލާ ކޮމިޓީއިން ޢާއްމުކޮށްފައިވާ އިޢުލާނުގައި، ކޮމިޓީއަށް ހުށަހެޅިފައިވާ ޝަކުވާތައް ބަލައި، ލިޔުމުން ޖަވާބުދާރީވަމުން ގެންދިއުމުގެ އިތުރުން، ދިރިއުޅުމުގެ ޙާލަތު ވަޒަން ކުރުމުގެ ބަޔަށް ޝަކުވާ ހުށަހެޅުމަށްޓަކައި އިތުރު ފުރުޞަތެއް ހުޅުވާލެވިފައިވާތީ، ކޮމިޓީއިން ދިރާސާ ކޮށްފައިވާ ކެޓަގަރީތަކުން ދާއިމީ ލިސްޓުތައް ޢާންމު ކުރުމަށް ހަމަޖެހިފައިވަނީ ހުރިހާ ޝަކުވާއެއް ބަލައި، ލިޔުމުން ޖަވާބުދީ ނިމުމުން ކަމަށް އެ ކޮމިޓީ އިން ވަނީ ހާމަކޮށްފައެވެ.
