ޑިސެމްބަރު މަހުގެ މިހާތަނަށް އައި ފަތުރުވެރިންގެ އަދަދު ފުރަތަމަ ފަސް މަސް ދުވަހު އައި ފަތުރުވެރިންނަށް ވުރެ ގިނަ

ކޮވިޑް-19 ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށް ފަހު އަލުން ހުޅުވާލިފަހުން ފުރަތަަމަ ފަސް މަސް ދުވަހު ރާއްޖެ އައި ފަތުރުވެރިންނަށްވުރެ ޑިސެމްބަރ މަހު އެކަނި ރާއްޖެ އައި ފަތުރުވެރިންގެ އަދަދު ގިނަ ކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ޖުލައި 15 ވަނަ ދުވަހު ރާއްޖޭގެ ބޯޑަރު ހުޅުވާލުމާއެކު ނޮވެމްބަރ މަހުގެ ނިޔަލަށް 76،141 ފަތުރުވެރިން ވަނީ ރާއްޖެ އައިސްފައެވެ. އެއީ ޖުލައި މަހު ރާއްޖެ އައި 1,701 ފަތުރުވެރިންނާއި، އޮގަސްޓް މަހު އައި 7,628 ފަތުރުވެރިންގެ އިތުރުން ސެޕްޓެމްބަރ މަހު ރާއްޖެ އައި 9,538 ފަތުރުވެރިންނާއި އޮކްޓޫބަރ މަހު ރާއްޖެ އައި 21,515 ފަތުރުވެރިން އަދި ނޮވެމްބަރ މަހު ރާއްޖެ އައި 35,759 ފަތުރުވެރިންނެވެ.

ޑިސެމްބަރ މަހުގެ އެއް ވަނަ ދުވަހުން 28 ވަނަ ދުވަހުގެ ނިޔަލަށް 87,024 ފަތުރުވެރިން ވަނީ ރާއްޖެ އައިސްފައެވެ. މިއީ 10،883 ފަތުރުވެރިން އިތުރު އަދަދެކެވެ.

ރާއްޖޭގެ ބޯޑަރު ހުޅުވާލިފަހުން އިންޓަނޭޝަނަލް އެއަރލައިންތަކުން ރާއްޖެއަށް ދަތުރުކުރާވަރު އިތުރުވެފައިވާއިރު، މިހާރުވެސް 25 އަށް ވުރެ ގިނަ އެއަރލައިނުން ރާއްޖެއަށް ދަތުރުކުރެއެވެ. އަދި ބަލިމަޑުކަމުގެ ސަބަބުން ރާއްޖޭގެ އާންމު މާކެޓްތަކުން ރާއްޖެއަށް އަންނަ ފަތުރުވެރިންގެ އަދަދު ދަށްވި ނަމަވެސް ރާއްޖޭގެ ފަތުރުވެރިކަމަށް އިތުރު މާކެޓްތައް ވަނީ ތައާރަފްވެފައެވެ.

ބޯޑަރު ހުޅުވާލިފަހުން ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ ގައުމަކަށް ރަޝިއާ ވެފައިވާ އިރު، އަވައްޓެރި އިންޑިއާ އިން އުޅެނީ ލިސްޓުގެ ދެވަނައިގައެވެ. މީގެ އިތުރުން އިނގިރޭސިވިލާތް، އެމެރިކާ، ޖަރުމަނުވިލާތް އަދި ޔޫއޭއީވެސް ރާއްޖެ އަށް އެންމެ ގިނަ ފަތުރުވެރިން އަންނަ 10 ގައުމުގެ ލިސްޓުގައި ހިމެނެއެވެ.

މި ލިސްޓުގައި ހިމެނޭ އަނެއް ގައުމުތަކަކީ ފްރާންސް، ޔޫކްރެއިން، ކަޒަކިސްތާން އަދި ސްޕެއިންއެވެ.

ޖުލައި 15 ގައި ބޯޑަރު ހުޅުވާލިފަހުން ރާއްޖެއަށް 163,165 ފަތުރުވެރިން އައިސްފައިވާއިރު، މިއަހަރުގެ ޖެނުއަރީ މަހުން ފެށިގެން ޑިސެމްބަރ 28ގެ ނިޔަލަށް 546,012 ފަތުރުވެރިން ވަނީ ރާއްޖެ އައިސްފައެވެ.