އޮކްސްފޯޑް ޔުނިވަރސިޓީ އާއި އެސްޓްރަޒެނެކާ ގުޅިގެން އުފައްދާފައިވާ ކޮވިޑް-19 ވެކްސިން ބޭނުން ކުރުމުގެ ހުއްދަ އިނގިރޭސިވިލާތް (ޔޫކޭ) އިން ދީފިއެވެ.

ބޭރުގެ މީޑިއާތަކުން ރިޕޯޓް ކުރާ ގޮތުން އައު އަހަރު ފެށުމާއެކު މި ވެކްސިން ޖެހުމަށް ނިންމާފައިވާއިރު، މި ވެކްސިން ފުރަތަމަ ޖަހާނީ ބަލީގައި އެންމެ ނުރައްކާ ބޮޑު ބަލި މީހުންނަށެވެ. އެއާއެކު އެސްޓްރަޒެނިކާގެ ވެކްސިން ވެގެންގޮސްފައި މިވަނީ ކޮވިޑް-19 އަށް ފަރުވާ ދިނުމަށް އެ ޤައުމުގައި ހުއްދަ ދެވުނު ދެވަނަ ވެކްސިނަށެވެ. އެގޮތުން މީގެ ކުރިން ޔޫކޭއިން ވަނީ ފައިޒަރ އަދި ބައޯއެންޓެކްގެ ވެކްސިން ބޭނުން ކުރުމުގެ ހުއްދަވެސް ދީފައެވެ.

މިހާތަަނަށް ރަސްމީކޮށް އެސްޓްރަޒެނިކާގެ ވެކްސިން ބޭނުން ކުރުމުގެ ހުއްދަ ދިން ހަމައެކަނި ޤައުމަކީވެސް އިނގިރޭސިވިލާތެވެ. އަދި މި ވެކްސިނަށް ހުއްދަ ދިނުމުގެ ސަބަބުން އެ ޤައުމުގައި ވެކްސިން ދިނުމަށް ހިންގާ ޕްރޮގްރާމް އިތުރަށް ފުޅާވެ، ބަލި ކޮންޓްރޯލް ކުރުމަށް މަގުފަހިވެގެން ދާނެ ކަމަށް އެ ޤައުމުގެ ސަރުކާރާ ޙަވާލާދީ ބޭރުގެ މީޑިއާތަކުން ރިޕޯޓް ކުރެއެވެ.

ރިޕޯޓުތައް ބުނާގޮތުން އިނގިރޭސިވިލާތުން މިހާތަނަށް މި ވެކްސިންގެ 100 މިލިއަން ޑޯޒް ހޯދުމަށް ވަނީ ފައިސާ ދައްކާފައެވެ.

އިނގިރޭސިވިލާތުން ދާދި ފަހުން ވަނީ ކޮވިޑުގެ އައު ވޭރިއަންޓުވެސް ފެނިފައެވެ. އެއާއެކު އެ ޤައުމުގައި ކޮންޓްރޯލް ކުރެވުމެއް ނެތި ބަލި ފެތުރެމުންދާއިރު، މިހާތަނަށް އެ ޤައުމުން ދެ މިލިއަން ތިން ލައްކައަށްވުރެ ގިނަ މީހުން ޕޮޒިޓިވްވެފައިވެއެވެ. އަދި 71،000ށް ވުރެ ގިނަ މީހުން މި ވައިރަސް ޖެހިގެން މަރުވެފައިވެއެވެ.