ޑިމާންޑް އިތުރުވެ ގަތަރުން ރާއްޖެއަށް ކުރާ ދަތުރުތައް އިތުރުކޮށްފި
ގަތަރު އެއަރވޭސް އަކީ އެންމެ ފުރަތަމަ ރާއްޖެއަށް ދަތުރުތައް އަލުން ފެށި އެއް އެއަރލައިން
ގަތަރު އެއަރވޭސްގެ ފްލައިޓެއް ވެލާނާ އިންޓަނޭޝަނަލް އެއަރޕޯޓްގައި
ޕަސެންޖަރުންގެ ޑިމާންޑު އިތުރުވުމާއި ގުޅިގެން ގަތަރު އެއަރވޭސް އިން ރާއްޖެއަށް ކުރާ ދަތުރުތައް އިތުރުކޮށްފިއެވެ.
ގަތަރު އެއަރވޭސް އިން ވަނީ އެ އެއަރލައިނުން ދުވާލު ތިން ދަތުރުކުރަމުން އައި އައުން ދުވާލަކު ހަތަރު ދަތުރަށް އިތުރުކޮށްފައެވެ.
ކޮވިޑް-19 ގެ ސަބަބުން ރާއްޖޭގެ ބޯޑަރު ބަންދުކުރުމާއިއެކު ގަަތަރު އެ އަރވޭސް އިން ރާއްޖެއަށް ކުރަމުން އައި ދަތުރުތައް މެދުކަނޑާލި ނަމަވެސް ބޯޑަރު އަލުން ހުޅުވާލުމާއެކު އެންމެ ފުރަތަމަ ރާއްޖެއަށް ދަތުތައް ފެށި އެއަރލައިނަކީ ގަތަރު އެއަރވޭސްއެވެ. އަދި ޑިމާންޑު އިތުރުވާން ފެށުމާއެކު ޑިސެމްބަރ 10 ވަނަ ދުވަހުން ފެށިގެން އެއެއަރލައިނުން ވަނީ ރާއްޖެއަށް ދުވާލަކު ތިން ދަތުރުކުރުމަށް ނިންމާފައެވެ.
ގަތަރު އެއަރވޭސް އިން ވަނީ އެ އެއަރލައިނުން ރާއްޖެއަށް ކުރަމުން އަންނަ ދަތުރުތައް ދުވާލަކު ހަތަރު ފްލައިޓަށް އިތުރުކޮށް މިއީ ރާއްޖެއަށް ޒިތާރަތްކުރަން އެންމެ ރަނގަޅު ވަގުތުކަމަށް ބުނެފައެވެ.
ރާއްޖޭގެ ބޯޑަރު އަލުން ހުޅުވާލިފަހުން އެންމެ ގިނަ އަދަދެއްގެ ފަތުރުވެރިން އަންނަ އެއް މަންޒިލަކީ މެދުއިރުމަތީގެ ގައުމުތަކަށް ވާއިރު، ގަތަރު އެއަރވޭސް އިން ދަނީ ދުނިޔޭގެ 65 ސަރަހައްދަކުން ރާއްޖެއަށް ދަތުރުތައް ކުރަމުންނެވެ. އަދި އެއެއަރލައިނުން ރާއްޖެއަށް ކުރާ ދަތުރުތައް އިތުރުކުރުމާ ގުޅިގެން ކުރިއަށް އޮތްތާގައި ދުވާލެއްގެ މައްޗަށް އަންނަ ފަތުރުވެރިންގެ އަދަދު އިތުރުވެގެން ދިއުމަކީ އެކަށީގެންވާ ކަމެކެވެ.
މީގެ ކުރިން ގަތަރު އެއަރވޭސް އިން ކުރިއަށް ގެންދިޔަ ޓްވިޓަރ ޕޯލްއަކުން އެއެއަރލައިނުން ދަތުރުކުރާ ފަތުރުވެރިން އެންމެ ދާން ބޭނުންވާ މަންޒިލަކަށް ރާއްޖެ ހޮވިފައިވާއިރު، އެ ޕޯލްގައި ވޯޓްލި 73.1 އިންސައްތަ މީހުން ވަނީ އެންމެ ދާން ބޭނުންވާ މަންޒިލަކީ ރާއްޖެ ކަމަށް ބުނެފައެވެ. މިއީ ރާއްޖޭގެ ބޯޑަރު އަލުން ހުޅުވާލިތާ މަސްދުވަސް ފަހުން ކުރިއަށް ގެންގޮސްފައިވާ ޕޯލެކެވެ.
