ސިނަމާލެ ބްރިޖުގައި ހަތަރު އުޅަނދު ޖެހިގެން އެކްސިޑެންޓެއް ހިނގައިފި
29 ޑިސެމްބަރު 2020 | އަންގާރަ 16:14އެކްސިޑެންޓުވީ ހަތަރު ކާރު ޖެހިގެން
ސިނަމާލެ ބްރިޖުގައި ހިނގައިގެން އުޅޭ އެކްސިޑެންޓުގައި ގެއްލުން ލިބުނު ކާރެއް
ސިނަމާލެ ބްރިޖުގައި ހަތަރު އުޅަނދު ޖެހިގެން ނުރައްކާތެރި އެކްސިޑެންޓެއް ހިނގައިފިއެވެ.
ފުލުހުންގެ މީޑިއާގެ ފަރާތުންވެސް ވަނީ ބްރިޖުގައި އެކްސިޑެއްޓެއް ހިނގައިގެން އުޅޭކަން ކަށަވަރުކޮށްދީފައެވެ. މި އެކްސިޑެންޓް ހިނގާފައި ވަނީ އަންގާރަ ދުވަހުގެ ރޭ އިރާކޮޅުގެ ވަގުތެއްގައެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެކްސިޑެންޓުވި ކާރު ތަކަށް ވަނީ އެކިވަރުގެ ގެއްލުންތަކެއް ލިބިފައެވެ. ނަމަވެސް މި އެކްސިޑެންޓުގައި އެއްވެސް މީހަކަށް އަނިޔާއެއް ލިބިފައިވާކަމަށް އަދި މިހާތަނަށް އެއްވެސް ފަރާތަކުން ރިޕޯޓުކޮށްފައެއް ނުވެއެވެ.
މި އެކްސިޑެންޓް ހިނގައިގެން އުޅެނީ މާލެއިން ހުޅުމާލެއަށް ދާން އޮންނަ ލޭނުގައެވެ. އެކްސިޑެންޓްގެ ސަބަބުން މަގު ބްލޮކުވެ، މާލެ ކޮޅުން ހުޅުމާލެ ދާ ފަރާތްތަކަށް ކުރިއަށް ނުދެވި މަގު އޮތީ ބްލޮކުވެފައެވެ.
އަންގާރަ ދުވަހުގެރޭ 20:30 ހާއިރު ހިނގި މި އެކްސިޑެންޓުގައި ތިން ކާރަކާއި ޕިކަޕެއްޖެހި ހިނގި މި އެކްސިޑެންޓުގައި ހަތަރު އުޅަނދަށްވެސް ވަނީ އެކިވަރުގެ ގެއްލުންތައް ވެފައެވެ. ނަމަވެސް މި އެކްސިޑެންޓުގައި އެއްވެސް މީހަކަށް ގެއްލުމެއް ނުލިބޭ ކަމަށް ފުލުހުން ވަނީ ހާމަކޮށްފައެވެ.
މީގެ އިތުރުންވެސް ބްރިޖުގައި އެހެން އެކްސިޑެންޓެއް ހިނގާފައިވާ ކަމަށް ފުލުހުން ވަނީ ވިދާޅުވެފައެވެ. އެމްބިއުލާންސަކާއި ޕިކަޕެއް ޖެހިގެން ހިނގި މި އެކްސިޑެންޓު ހިނގާފައި ވަނީ ދުއްވާފައިދިޔަ އެމްބިއުލާންސެއް ޕިކަޕުގެ ފަހަތުގައި ޖެހިގެންނެވެ.
ފުލުހުން ވިދާޅުވީ މި ދެ އެކްސިޑެންޓުގައި އެކްސިޑެންޓްވި ހުރިހާ އުޅަނދެއްވެސް ދުއްވާފައިވަނީ މި ކެޓަގަރީގެ ލައިސަންސް އޮންނަ ފަރާތްތަކެއް ކަމަށާއި މި އެކްސިޑެންޓްތައް ހިނގަން މެދުވެރި ސަބަބު ޓްރެފިކް މެނޭޖްމެންޓް ޑިޕާޓްމެންޓުން ތަހުގީގުކުރަމުން އަންނަ ކަމަށެވެ.
