އެމްއެމްޕީއާރުސީގެ ހިޔާނާތުގެ ފައިސާ ލޯންޑަރ ކުރުމުގައި ކުރީގެ ރައީސް އަބްދުﷲ ޔާމީނާއެކު ބައިވެރިވިކަމުގެ ތުހުމަތު ކުރެވޭ ސަން އިންވެސްޓްމަންޓް ޕްރައިވެޓް ލިމިޓެޑްގެ މައްޗަށްކޮށްފައިވާ ދައުވާގެ އަޑުއެހުމެއް ކްރިމިނަލް ކޯޓުގައި ތާވަލްކޮށްފިއެވެ.

އެ އަޑުއެހުން ތަވަލްކޮށްފައިވަނީ ހޯމަ ދުވަހުގެ 10:00އަށެވެ. މިމައްސަލާގައި މިމަހުގެ 20 ވަނަ ދުވަހު ބޭއްވި އަޑުއެހުމުގައި ވަނީ ސަން އިންވެސްޓްމަންޓް ކުންފުނީގެ މައްޗަށް ދައުވާ ސާބިތު ކުރުމަށް ދައުލަތުން ހެކި ހުށަހަޅައިފައެވެ.

މި މައްސަލައިގައި މި ހިނގާ ޑިސެމްބަރު ތެރޭގައި އިތުރު އަޑުއެހުންތަކެއްވެސް ބާއްވާފައިވާއިރު، ދައުލަތުން ދައުވާ އިއްވުމުން ރައްޔިތުންގެ މަޖިލީހުގެ ދ. މީދޫ ދާއިރާގެ މެމްބަރު އަހުމަދު ސިޔާމް މުހައްމަދުގެ މަސްލަހަތު އޮންނަ ސަން އިންވެސްޓްމަންޓް ކުންފުނީގެ ގާނޫނީ ވަކީލު އަލީ ޝާހު ވަނީ ދައުލަތުން އެ ކުންފުނީގެ މައްޗަށް އިއްވާފައިވާ ދައުވާއަކީ އެއްވެސް ހަގީގަތެއްގެ މައްޗަށް ބިނާކޮށް އުފުލާފައިވާ ދައުވާއަކަށް ނުވާތީ، ކަނޑައެޅިގެން ދައުވާއަށް އިންކާރުކުރާ ކަމަށް ވިދާޅުވެފައެވެ.

މިޑިސެމްބަރު މަހުގެ 20 ވަނަ ދުވަހު ބޭއްވި އިބްތިދާއީ އަޑުއެހުމަކީ، ސަން އިންވެސްޓްމަންޓުން ދައުވާއަށް އިންކާރުކުރުމާއި ގުޅިގެން ދައުވާކުރާ ދައުލަތުގެ ފަރާތުންނާއި، ދައުވާ ލިބޭ ސަން އިންވެސްޓްމަންޓް ކުންފުނީގެ ފަރާތުން ޝަރީއަތަށް ހުށަހަޅަންޖެހޭ ހުށަހެޅުންތައް ހުށަހެޅުމަށާއި ހެކި ހުށަހެޅުމަށް ބޭއްވި އަޑު އެހުމެކެވެ.

އެގޮތުން، ސަން އިންވެސްޓްމަންޓް ކުންފުނީގެ މައްޗަށް ދައުވާ ސާބިތުކުރުމަށް ދައުލަތުގެ ފަރާތުން ވަނީ ކުރީގެ ނާއިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔާތާއެކު އިތުރު ބައެއް ހިމެނޭގޮތަށް ހެކިން ހުށަހަޅާފައެވެ. އަދި ކިތާބީ ހެކިވެސް މައްސަލައިގެ ފޯމާއެކު ހުށަހަޅާފައިވާނެ ކަމަށް ދައުލަތުގެ ގާނޫނީ ވަކީލު ވިދާޅުވިއެވެ.

ދައުވާއިން ދިފާއުވުމަށް ހެކި ހުށަހެޅުމުގެ ފުރުސަތު މައްސަލަ ބައްލަވާ ކްރިމިނަލް ކޯޓުގެ އިސްގާޒީ އަހުމަދު ޝަކީލު ދެއްވުމުން ސަން އިންވެސްޓްމަންޓް ކުންފުނީގެ ގާނޫނީ ވަކީލު އަލީ ޝާހު ވިދާޅުވެފައިވަނީ، ހެކި ހުށަހެޅުމަށް ދީފައިވާ 15 ދުވަހުގެ މުއްދަތު އަދި ހަމަ ނުވާ ކަމަށާއި، އެހެންކަމުން މި އަޑުއެހުމުގައި ހެކި ހުށަހެޅުމަށް ތައްޔާރުވެފައިނުވާ ކަމަށެވެ. އަދި ވަކީލު ޝާހު ވަނީ މައްސަލަ ކުރިއަށް ގެންދަވާ ގޮތާމެދު ހިތްހަމަނުޖެހުން ފާޅުކުރައްވާފައެވެ. ނަމަވެސް ގާޒީ ވިދާޅުވެފައިވަނީ އަޑުއެހުން ކުރިއަށް ގެންދަވަނީ ގާނޫނާއި ޝަރީއަތް ކުރުމުގެ އުސޫލާއެއްގޮތަށް ކަމަށެވެ. އެހެންނަމަވެސް، ގާޒީ ވަނީ ސަން އިންވެސްޓްމަންޓް ކުންފުނީގެ ފަރާތުން ހެކި ހުށަހެޅުމަށް ފަސް ދުވަހުގެ މުއްދަތެއް ދެއްވާފައެވެ.

އޭގެކުރިން ބޭއްވި އަޑުއެހުމުގައި ވަކީލު އަލީ ޝާހު ވިދާޅުވެފައި ވަނީ، މި މައްސަލާގައި ހިމެނޭ ފައިސާއަކީ ކުރީގެ ރައީސް އަބްދުﷲ ޔާމީންގެ އެންގެވުމަށް، ރިޝްވަތުގެ ގޮތުގައި ހޯދާފައިވާ ފައިސާކަން ދައުލަތުގެ އެއްވެސް އިދާރާއަކުން ކަނޑައަޅާފައި ނުވާ ކަމަށެެވެ. އަދި ޑޮލަރު މާރުކުރުމުގެ ނަމުގައި ފައިސާގެ މުއާމަލާތް ހިންގާފައިވާކަމަށް ދައުވާގައި ބުނާއިރު، އެކަން ކަނޑައަޅާނީ ފައިނޭންޝަލް އިންސްޓިޓިއުޓްތަކުން ނުވަތަ މަރުކަޒީ ބޭންކް ކަމަށްވާ އެމްއެމްއޭއިން ކަމަށެވެ.

ރައްދުގައި ދައުލަތުގެ ވަކީލު ވިދާޅުވެފައިވަނީ، ރ. ފުއްގިރި މައްސަލާގައި ދައުވާ އުފުލާފައިވާ އިތުރު ފަރާތްތައް ހިމެނޭއިރު، ރައީސް ޔާމީން ވެސް ހިމެނޭ ކަމަށެވެ. އަދި ސަން އިންވެސްޓްމަންޓް ކުންފުނީގެ މައްޗަށް އުފުލާފައިވާ މަނީ ލޯންޑަރިންގ ކުށުގެ ދައުވާއާ ގުޅިގެން، އެއީ ކޮރަޕްޝަނުގެ ގޮތުގައި ހޯދި ފައިސާކަން ކޮންމެހެން ޝަރީއަތުން ސާބިތުވެފައި އޮންނަން ނުޖެހޭ ކަމަށެވެ.

ޑޮލަރު މާރުކުރުމުގެ ހުއްދަ، މި މައްސަލާގައި ދައުވާކުރާ ސަން ކޮންސްޓްރަކްޝަން އެންޑް އިނޖިނިއަރިންގ ކުންފުންޏާއި ސަން އިންވެސްޓްމަންޓް ކުންފުންޏަށް ދޫކޮށްފައި ނުވާކަން އެމްއެމްއޭއިން ލިބިފައިވާ މައުލޫމާތުތަކުން އެނގޭ ކަމަށް ވެސް މީގެ ކުރިން ބޭއްވި އަޑުއެހުމެއްގައި ދައުލަތުގެ ވަކީލު ވެފައިވެއެވެ.

ރ. ފުއްގިިރި މައްސަލައިގައި ރައީސް ޔާމީންގެ މައްޗަށް މަނީ ލޯންޑަރިންގ ކުށުގެ ދައުވާގެ އިތުރުން ރިޝްވަތު ގަބޫލު ކުރުމުގެ ދައުވާއެއް ދައުލަތުން އުފުލާފައިވެއެވެ. މި މައްސަލާގައި ސަން އިންވެސްޓްމަންޓް ކުންފުންޏާއި ސަން ކޮންސްޓަރަކްޝަން ކުންފުނީގެ މައްޗަށް އުފުލާފައިވަނީ މަނީ ލޯންޑަރިންގ ކުށުގެ ދައުވާ އެކަންޏެވެ. ދެން މި މައްސަލާގައި ދައުވާ އުފުލާފައިވަނީ ރައީސް ޔާމީނާގާތް ގުޅުމެއް އޮންނަ ކުރިކް އަހުމަދު ރިޒާގެ މައްޗަށެވެ. އޭނާގެ މައްޗަށް އުފުލާފައި ވަނީ މަނީ ލޯންޑަރިންގ ކުށުގެ ދައުވާއަކާއި ރިޝްވަތު ހިފުމުގައި މެދުވެރިއަކަށްވުމުގެ ކުށުގެ ދައުވާއެވެ.

ރ. ފުއްގިރި ފިޔާނާތުގެ މައްސަލާގައި ދައުވާ އުފުލާފައިވާ އެފަރާތްތަކުގެ މައްޗަށް އުފުލާފައިވާ ދައުވާތަކާއި ގުޅިގެން ބޭއްވޭ އިބްތިދާއީ އަޑުއެހުންތަކަށްފަހު، ޝަރީއަތުގެ އަޑުއެހުންތައް ކުރިއަށް ގެންދަން ނިންމާފައިވަނީ ދައުވާ ލިބޭ ހުރިހާ ފަރާތެއް އެއް ހާޒިރެއްގައި ޝަރީއަތުގެ އަޑުހުންތައް ބާއްވައިގެންނެވެ.