ފާއިތުވި 24 ގަޑިއިރު ކޮވިޑަށް ޕޮޒިޓިވްވީ 35 މީހުން
މާލެ ސަރަހައްދުން 34 މީހަކު އަދި އަތޮޅު ތެރެއިން އެކަކު ވަނީ ޕޮޒިޓިވްވެފައި
ކޮވިޑު ފެސިލިޓީއެއްގައި އާއިލާއަކުން ކޮވިޑް-19 އަށް ޓެސްޓުކުރަނީ
ފާއިތުވި 24 ގަޑިއިރު ތެރޭގައި ކޮވިޑް-19 އަށް 35 މީހުން ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން އާންމުކުރި ތަފާސް ހިސާބުތަކަށް ބަލާއިރު، ފާއިތުވި 24 ގަޑިއިރު ތެރޭ މާލެ ސަރަހައްދުން 34 މީހުން ކޮވިޑަށް ޕޮޒިޓިވްވެގެން ރިޕޯޓުކޮށްފައިވާއިރު، އަތޮޅު ތެރެއިން އެކަކު ވަނީ ޕޮޒިޓިވްވެފައެވެ. މި އަދަދާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 13،618ށް އަރާފައެވެ.
ވޭތުވެދިޔަ 24 ގަަޑިއިރު ތެރޭގައި ވަނީ 2،122 މީހުން ކޮވިޑް ޖެހިފައި ހުރިތޯ ބެލުމަށް ޓެސްޓުކޮށްފައެވެ.
ރާއްޖެއިން މިހާތަނަށް ވަނީ ކޮވިޑް ޖެހިގެން 48 މީހުން މަރުވެފައެވެ. ކޮވިޑް ޖެހުނު މީހުންގެ ތެރެއިން މިވަގުތު ހޮސްޕިޓަލުގައި ފަރުވާ ދެމުން ދަނީ 39 މީހުންނަށެވެ.
ފާއިތުވި 24 ގަޑިއިރު ތެރޭގައި ރާއްޖެއިން 35 މީހުން ކޮވިޑަށް ޕޮޒިޓިވްވިއިރު، މި މަހުގެ 20 ވަނަ ދުވަހު ކައިވެނި ހަފުލާއަކަށް ދިޔަ ބައެއްގެ ތެރޭގައި ކޮވިޑުގެ އަލާމާތް ހުރި މީހަކު ހުރުމުގެ ސަބަބުން އެ ހަފްލާއަށްދިޔަ 35 މީހަކުވެސް ވަނީ ކޮވިޑަށް ޕޮޒިޓިވްވެގެން ރިޕޯޓުކޮށްފައެވެ. މީގެ ތެރޭގައި ހައިރިސްކް މީހުންވެސް ހިމެނެއެވެ.
މި ހަފުލާގައި ގާތްގަނޑަކަށް 120 މީހުން ބައިވެރިވި ކަމަށް އެޗްޕީއޭއިން ވަނީ މައުލޫމާތު ދީފައެވެ.
