ހަ ދުވަހުގެ ހަނގުރާމައަށް 50 އަހަރު – މެދުނުކެނޑި 7 ގަޑިއިރުވަންދެން ރައީސް މައުމޫން ހިންގެވި
ޠާލިބާއިންގެ ހާލު ބެއްލެވުމަށް 14 ކިލޯމީޓަރަށް ހިންގެވި
ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމް
އިސްރާއީލާއި، އަރަބި ފަސް ޤައުމަކާ ދެމެދު 1967 ވަނަ އަހަރު ކުރެވުނު "ހަ ދުވަހުގެ ހަނގުރާމަ" އަށް 50 އަހަރު ފުރުމާ ގުޅިގެން، އެ ދުވަހުގެ ހަނދާންތައް ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމް ހިއްސާ ކުރައްވައިފިއެވެ.
ޖޫން 5, 1967 ވަނަ ދުވަހު އިސްރާއީލުން މިސްރަށް ދިން ކުއްލި ހަމަލާއާ ގުޅިގެން ފެށުނު ހަނގުރާމައަށް ހޯމަ ދުވަހު 50 އަހަރު ފުރިފައިވާއިރު، އެ ދުވަހުގެ ހަނދާން އާކުރައްވަމުން، އޭރު މިސްރުގައި ދިރިއުޅުއްވަމުން ގެންދެވި ކުރީގެ ރައީސް މައުމޫން ކުރެއްވި ޓްވީޓްތަކެއްގައި ވިދާޅުވީ، އެ ދުވަހަކީ މެދުނުކެނޑި އެމަނިކުފާނު އެންމެ ގިނަ އިރު ހިންގަވަން ޖެހިވަޑައިގަތް ދުވަސްކަމަށެވެ.
އެގޮތުން، މިސްރަށް އިސްރާއީލުން ހަމަލާ ދިނުމާ އެކު ގާހިރާގެ ދަތުރުފަތުރުގެ ނިޒާމު ހުއްޓުމަކަށް އައުމުން، ދިވެހި ޠާލިބާއިންގެ ހާލު ބެއްލެވުމަށް ހިންގަވާފައި ވަޑައިގެންނެވި ކަމަށް ރައީސް މައުމޫން ވިދާޅުވިއެވެ. އެމަނިކުފާނު ވިދާޅުވި ގޮތުގައި އެ ދަތުރުގައި ހަތް ގަޑިއިރު ވަންދެން މެދުނުކެނޑި ހިންގަވައި، 14 ކިލޯމީޓަރުގެ ރާސްތާއެއް ކަޑައްތު ކުރެއްވިއެވެ.
މަޢުލޫމާތު ލިބިފައިވާ ގޮތުގައި މި ހާދިސާ ހިނގާދިޔައީ ރައީސް މައުމޫން ދަސްވެނިވެވަޑައިގަތްތާ އަހަރެއްހާ ދުވަސް ފަހުންނެވެ. އޭރު އެމަނިކުފާނަކީ މިސްރުގައި އެވަގުތު ތިބި ކިޔަވާ ކުދިންގެ ލީޑަރެއްގެ ގޮތުގައި ބައެއް ފަރާތްތަކުން ސިފަކުރެއެވެ.
މިސްރަށް ދިން ކުއްލި ހަމަލާއަކާ އެކު އިސްރާއީލުން ފެށި "ހަ ދުވަހުގެ ހަނގުރާމަ" އިގައި އެ ޤައުމުން ކުރި ހޯދިއިރު، މި ހަނގުރާމައިގައި ބޮޑު ގެއްލުމެއް ލިބިފައި ވަނީ އަރަބި ކޯލިޝަނަށެވެ. އެގޮތުން މިސްރާއި، ސީރިއާ އާއި، އުރުދުންގެ އިތުރުން އިރާޤާއި، ލުބްނާނު ހިމެނޭ ކޯލިޝަނުން މި ހަނގުރާމައަށް ޖުމްލަ 240،000 ސިފައިން ނެރުނު އިރު، އޭގެ ތެރެއިން 23،500 އަށްވުރެ ގިނަ ސިފައިން މަރުވެ، 5400 އަށްވުރެ ގިނަ ސިފައިން އިސްރާއީލުގެ ހައްޔަރަށް ގެންދެވިފައި ވެއެވެ. އިސްރާއީލުން މި ހަނގުރާމައިގައި 100،000 ސިފައިން ބައިވެރި ކުރިއިރު، މީގެ ތެރެއިން މަރުވެފައި ވަނީ 980 އެއްހާ ސިފައިންނެވެ. އަދި 4,517 ސިފައިންނަށް އެކި ވަރުގެ ޒަޚަމްތައް ލިބުނު އިރު އަރަބި ކޯލިޝަންގެ ހައްޔަރަށް ގެންދެވިފައި ވަނީ 15 ސިފައިންނެވެ.
މި ހަނގުރާމައިގައި، އިސްރާއީލުން ވަނީ ގައްޒާ އާއި ސިނާއީގެ އިތުރުން އިރުމަތީ ގުދުސް ހިމެނޭ ގޮތަށް ވެސްޓް ބޭންކާއި، ސީރިއާގެ ގޯލާމް ހައިޓްސް ވެސް އެމީހުންގެ ބާރުގެ ދަށަށް ގެންގޮސްފައެވެ.
