ކޮވިޑްގެ ހާލަތުގައިވެސް ރައްޔިތުން ދައްކައިދިނީ އެއްބައިވަންތަކަން: އެމްއާރުއެމް
26 ޑިސެމްބަރު 2020 | ހޮނިހިރު 14:13އެއްބައިވަންތަކަމުގެ ދުވަސް ފާހަގަކުރަނީ ސުނާމީ ކާރިސާއާއި ގުޅިގެން
މޯލްޑިވްސް ރިފޯމް މޫވްމަންޓް (އެމްއާރުއެމް) ހިންގެވުމުގައި އިސްކޮށް އުޅުއްވާ ބޭފުޅުން
ކޮވިޑް-19ގެ މި ހާލަތުގައިވެސް ދިވެހި ރައްޔިތުންނަކީ އެއްބައިވަންތަ ބައެއްކަން ވަރަށް ފުރިހަމައަށް ދައްކުވައިދީފި ކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް) އިން ބުނެފިއެވެ.
ދިވެހިންގެ އެއްބައިވަންތަކަމުގެ ދުވަހާ ގުޅިގެން އެމްއާރުއެމް އިން ނެރުނު ބަޔާނެއްގައި ބުނެފައިވަނީ، މިއަދަކީ ދިވެހިންގެ އެއްބައިވަންތަކަމުގެ ދުވަސްކަމަށާއި މި ދުވަސް ފާހަގަ ކުރަނީ ރާއްޖޭގެ ފަހުގެ ތާރީޚުގައި ހިނގައިދިޔަ ވަރަށް ހިތާމަވެރި އަދި ބިރުވެރި ހާދިސާއެއް ކަމަށްވާ ސުނާމީ ކާރިސާއާ ގުޅިގެން ދިވެހި ރައްޔިތުން ދެއްކެވި އަޚުވަންތަ ކަމާއި އެއްބައިވަންތަކަން ފާހަގަ ކުރުމުގެ ގޮތުންކަމަށެވެ.
އެމްއާރުއެމްގެ ބަޔާނުގައި ބުނެފައި ވަނީ މިފަދަ ދުވަހެއް ފާހަގަ ކުރާއިރު ސުނާމީ ކާރިސާގައި ދިވެހިރައްޔިތުން ދެއްކި މަތިވެރި ޤައުމީ ރޫޙުގެ ހަނދާން އާކޮށް، އެއިން އިބްރަތް ލިބިގަންނަންޖެހޭ ކަމަށާއި އެ ދުވަހު ދިވެހި ރައްޔިތުން އިސްކޮށްފައިވަނީ ޤައުމީ މަސްލަޙަތާއި ޤައުމީ އެއްބައިވަންތަކަން ކަމަށެވެ.
ޤައުމަށް ދިމާވާ މިފަދަ ކޮންމެ ދަތި އުނދަގޫ އަދި ހިތާމަވެރި ދަނޑިވަޅެއްގައި ޤައުމީ މަސްލަހަތު އިސްކޮށް، ދިވެހި ކޮންމެ ފަރުދަކު ވެސް މަސައްކަތް ކުރުމަކީ ކޮންމެހެން ކުރަން ޖެހޭނެ ކަމެއްކަން ފާހަގަކޮށް އެމްއާރުއެމްގެ ބަޔާނުގައި ބުނެފައިވަނީ، ކޮވިޑް-19 ގެ މިހާލަތުގައިވެސް ސަރުކާރާއެކު ދިވެހި ރައްޔިތުން ދައްކުވައި ދީފައި ވަނީ ޤައުމީ އެއްބައިވަންތަކަން ކަމަށެވެ. އަދި ކޯވިޑް-19 ބަލި ޖެހޭ މީހުންގެ އަދަދު ދަށުގައި ހިފެހެއްޓިފައި މިވަނީ އެއްބައިވަންތަކާމާއެކު، ސަމާލުވެ ތިބެ ރައްކާތެރި ކަމުގެ ފިޔަވަޅުތައް ދޫކޮށްނުލާތީ ކަމަށްވެސް އެމްއާރްއެމްގެ ބަޔާނުގައިވެއެވެ.
2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީގެ ކާރިސާގައި މިދުނިޔެ ދޫކުރި ދިވެހީންނާއި ގެއްލުނު ދިވެހީންގެ ޖުމްލަ ޢަދަދު 108 އަށް އަރައެވެ.
އެމްއާރްއެމް އިން ވަނީ އެދުވަހު އެ ހިތާމަވެރި ކާރިސާގައި ވަކިވެގެން ދިޔަ އަޚުންނާއި އުޚުތުންގެ ފާފަ ފުއްސަވާ ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި މާތް ﷲ ހަޟްރަތުގައި ދުޢާ ދަންނަވައި އެ ލޮބުވެތި އަޚުންނާއި އުޚުތުންގެ އާއިލާ ތަކަށް ތަޢުޒިޔާ ދަންނަވާފައެވެ.
