މި ޑިސެމްބަރު މަހުގެ މިހާތަނަށް އިންޑިއާއިން 12،000 ފަތުރުވެރިން ރާއްޖެ އަތުވެއްޖެ
ޑިސެމްބަރު މަހުގެ އެކަކުން 20ށް އިންޑިއާއިން 12،616 ފަތުރުވެރިން ރާއްޖެއަށް ޒިޔާރާތްކޮށްފައިވޭ
ރާއްޖެއަށް ޒިޔާރާތްކުރި ފަތުވެރިންތަކެއް: އިންޑިއާއިން ގިނަ އަދަދަކަށް ފަތުރުވެރިން ޒިޔާރާތް ކުރަމުންދޭ
މި ޑިސެމްބަރު މަހުގެ މިހާތަނަށް އިންޑިއާއިން ރާއްޖެއަށް ޒިޔާރަތްކުރި ފަތުރުވެރިންގެ އަދަދު 12،000އަށް ވުރެ މައްޗަށް އަރައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ވެލާނާ އިންޓަރނޭޝަނަލް އެއަރޕޯޓުގެ، ޖެނެރަލް މެނޭޖަރ، ޓަރމިނަލް އޮޕަރޭޝަންސް އިބްރާހީމް ހުސައިން، ރާއްޖެޓީވީގެ "ފަށާއިރު" ޕްރޮގްރާމަށް މައުލޫމާތު ދެއްވަމުން ވިދާޅުވީ، މި ޑިސެމްބަރު މަހުގެ އެއްވަނަ ދުވަހުން ފެށިގެން 20ވަނަ ދުވަހުގެ ނިޔަލަށް އިންޑިއާއިން 12،616 ފަތުރުވެރިން ރާއްޖެއަށް ޒިޔާރާތްކޮށްފައިވާ ކަމަށެވެ.
އިބްރާހީމް ހުސައިން ވިދާޅުވީ، ކޮވިޑް-19 އާގުޅިގެން ރާއްޖޭގެ ބޯޑަރު ބަންދުކުރުމަށްފަހު، ޖުލައި މަހުގެ 15 ވަނަ ދުވަހު ބޯޑަރު އަލުން ހުޅުވިފަހުން، ދުވަހުން ދުވަހަށް ރާއްޖެއަށް ޒިޔާރަތްކުރާ ފަތުރުވެރިން އިތުރުވަމުންދާ ކަމަށެވެ. އެގޮތުން އެންމެގިނަ ފަތުރުވެރިން ޒިޔާރާތްކުރަމުންދަނީ، އިންޑިއާ އާއި އިނގިރޭސި ވިލާތާއި ރަޝިޔާގެ އިތުރުން ޖާމަނީ އަދި އެމެރިކާއިންނެވެ.
އިބްރާހީމް ހުސައިން ވިދާޅުވީ، އިންޑިއާއިން ކޮންމެ ދުވަހަކު 5 ނުވަތަ 6 ފްލައިޓް ރާއްޖެއާ ދެމެދު އޮޕަރޭޓް ކުރަމުންދާއިރު، އެވްރެޖްކޮށް 600ށް ވުރެ ގިނަ އިންޑިއާ ފަތުރުވެރިން ރާއްޖެއަށް ޒިޔާރަތް ކުރަމުންދާ ކަމަށެވެ.
ހޯމަ ދުވަހު ރާއްޖެއަށް ޒިޔާރާތްކުރި ފަތުރުވެރިންގެ އަދަދު އުޅެނީ 3،464ގަ އެވެ. އަދި ހޯމަ ދުވަހު 19 ޕްރައިވެޓް ޖެޓް އޮޕަރޭޓް ކޮށްފައިވާ ކަމަށްވެސް އިބްރާހީމް ހުސައިން ވިދާޅުވި އެވެ.
ބޯޑަރު އަލުން ހުޅުވާލިފަހުން 100،000ށް ވުރެ ގިނަ ފަތުރުވެރިން ރާއްޖެއަށް ޒިޔާރާތްކޮށްފައިވާއިރު، މިއަހަރުގެ މިހާތަނަށް 500،000ށް ވުރެ ގިނަ ފަތުރުވެރިން ރާއްޖެއަށް ޒިޔާރާތްކޮށްފައިވެއެވެ.
