ރަކީދޫ ބަނދަރު މަޝްރޫއު: 64 އިންސައްތަ ނިމިއްޖެ، މިހާރު ކުރިއަށްދަނީ ނެރު ފުން ކުރުން
މި މަޝްރޫޢު މޮބިލައިޒް ކުރެވިފައިވަނީ 08 ޖޫން 2020 ގައި
ވ. ރަކީދޫގެ ބަނދަރުގެ މަސައްކަތް ކުރިއަށްދަނީ - މި މަސައްކަތް ހަވާލު ކޮށްފައިވަނީ މިދިޔަ އަހަރުގެ އޮކްޓޯބަރު ތެރޭގައި
ވ. ރަކީދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 64 އިންސައްތަ ނިމިފައިވާ ކަމަށް މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
އެމްޓީސީސީން ބުނީ، މި މަޝްރޫއުގެ ދަށުން މިހާރު ކުރިއަށްދަނީ އައު ގޮނޑުދޮށް ސަރަޙައްދުގެ ނެރު ފުންކުރުމުގެ މަސައްކަތް ކަމަށެވެ. އަދި މި މަޝްރޫޢު މޮބިލައިޒް ކުރެވިފައިވަނީ 08 ޖޫން 2020 ގައި ކަމަށްވެސް އެމްޓީސީސީން މައުލޫމާތު ދެއެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި 156 މީޓަރ ބޭރު ތޮށި ހެދުމާއި، 74 މީޓަރ ރިވެޓްމަންޓް ޖެހުމާއި، 16 މީޓަރ އެއްގަމު ތޮށި ހެދުމާއި، 08 މޫރިން ބޮއެ ލުމާއި، 08 ބަނދަރު ބައްތި ހަރުކުރުމާއި، 02 ނެރުބައްތި ހަރުކުރުމާއި، ބަނދަރުގެ އެއްގަމު ތޮށީގައި 5 މީޓަރ ފުޅާމިނުގައި ޕޭވްމަންޓް ހެދުމުގެ އިތުރުން ބަނދަރާއި ނެރު ފުންކުރުން ހިމެނެއެވެ.
2019 ވަނަ އަހަރުގެ އޮކްޓޯބަރު މަހުގެ 22 ވަނަ ދުވަހު ޕްލޭނިންގ މިނިސްޓްރީން އެމްޓީސީސީއާއި ޙަވާލު ކުރި މި މަޝްރޫއަށް 18.5 މިލިއަން ރުފިޔާ ޚަރަދުވާނެ ކަމަށް ވަނީ ލަފާކޮށްފައެވެ.
ތިން ސަތޭކައެއްހާ މީހުންގެ އާބާދީއެއް އޮންނަ ވ. ރަކީދޫގައި އަރާ ފޭބުމަށް ހެދިގެންދާ ބަނދަރަކީ މިހާތަނަށް ރާއްޖޭގެ ސަރުކާރަކުން އެ ރަށުގައި ހިންގާ އެންމެ ބިޔަ އެއް މަޝްރޫއެވެ. އެކަމާ ގުޅޭގޮތުން ރަކީދޫ ކައުންސިލުގެ ރައީސް އާދަމް ސާމީ ރާއްޖެޓީވީއަށް ދެއްވި އިންޓަރވިއުއެއްގައި ވިދާޅުވީ، ރަކީދޫއަކީ ޒަމާނުއްސުރެ ތަފާތު އެކި މަސްވެރިކަމުގައި އުޅޭ އޮޑި ދޯނި ފަހަރު ގާތްކުރާ އެސަރަހައްދުގައި އޮންނަ މައި ހަބެއް ކަމަށެވެ. އެގޮތުން ދޯނި ފަހަރަށް ބޭނުންވާ ފެނާއި އެނޫންވެސް ޒަރޫރީ ބޭނުންތަކުގައި އޮޑި ދޯނިފަހަރު އެރަށުގައި ބަނދަރުކުރަމުންދާ ކަމަށް އޭނާ ވިދާޅުވިއެވެ.
ރަކީދޫ އަކީ ކިތަންމެ އާބާދީ މަދު ރަށެއް ނަމަވެސް އެރަށަކީ މިހާރު ފައްކާވަމުން އަންނަ ލޯކަލް ޓޫރިޒަމްގެ ސިނާއަތު ހަލުވި ދުވެއްޔެއްގައި ފުޅާކުރުމުގެ މަސައްކަތް ކުރަމުން އަންނަ ރަށެކެވެ. އެގޮތުން ބަނދަރުގެ މަސައްކަތް ނިމުމާއެކު ރަކީދޫގައި މި ވިޔަފާރި އިތުރަށް ފުޅާވެ، ރައްޔިތުންގެ އަތްމަތި ތަނަވަސް ވެގެންދާނެ ކަމަށް އެރަށު ރައްޔިތުން ބުނެއެވެ.
އޭނާ ވިދާޅުވީ ބަނދަރުގެ މަސައްކަތް އެއްކޮށް ނިމުމާއެކު ރަކީދޫއަށް މާލީ ގޮތުންނާއި އިޖުތިމާއީ ގޮތުން ގިނަ ކުރިއެރުންތަކެއް ލިބިގެންދާނެ ކަމަށާއި، ރަށުގެ ރައްޔިތުންނަށް އެކަމުގެ ސަބަބުން ބޮޑު ނަފާއެއް ލިބިގެންދާނެ ކަމަށެވެ.
