ދުވާލެއްގެ މައްޗަށް އެވަރެޖްކޮށް އަންނަ ފަތުރުވެރިންގެ އަދަދު 2500 އަށް އިތުރުވެއްޖެ
މިހާރު ދުވާލެއްގެ މައްޗަށް އެވަރެޖްކޮށް 2،561 ފަތުރުވެރިން އާދޭ
ރާއްޖެއަށް އައި ފްލައިޓެއްގައި ފަތުރުވެރިންތަކެއް ފައިބައިގެން އަންނަ މަންޒަރު
ރާއްޖޭގެ ބޯޑަރުތައް އަލުން ހުޅުވާލިފަހުން، ޑިސެމްބަރު މަހު ރާއްޖެއަށް ދުވާލެއްގެ މައްޗަށް އެވަރެޖްކޮށް ޒިޔާރާތްކުރާ ފަތުރުވެރިންގެ އަދަދު 2500 އަށް އިތުރުވެއްޖެއެވެ.
ޓޫރިޒަމް މިނިސްޓްރީން ހިއްސާކުރަމުން އަންނަ ދުވަހުގެ އަދާހަމައަށް ބަލާއިރު، 18 ޑިސެމްބަރުގެ ނިޔަލަށް ދުވާލެއްގެ މައްޗަށް އަންނަ އެވަރެޖަކީ 2،561 ފަތުރުވެރިންނެވެ. މިއީ ނިމިދިޔަ ނޮވެމްބަރު މަހުގެ ދުވާލެއްގެ މައްޗަށް ޒިޔާރަތްކުރި ފަތުރުވެރިންގެ އެވަރެޖާ އަޅާކިޔާއިރު ދެ ގުނައަށް ވުރެން އިތުރު އަދަދެކެވެ. ނޮވެމްބަރު މަހު ދުވާލެއްގެ މައްޗަށް އަންނަ ފަތުރުވެރިންގެ އެވަރެޖް ހުރީ 1،192 ގައެވެ.
ޑިސެމްބަރު މަހު ރާއްޖެއަށް އަންނަ ފަތުރުވެރިންގެ އަދަދުތައް އިތުރުވުމާއެކު، ރާއްޖެއިން ވަނީ މުހިއްމު ދެ ލަނޑުދަނޑިއެއް ވެސް ހާސިލުކޮށްފައެވެ. އެއީ ބޯޑަރު އަލުން ހުޅުވާލިފަހުން ރާއްޖެއަށް ޒިޔާރަތްކުރި އެއް ލައްކަވަނަ ފަތުރުވެރިޔާ އައުމުގެ އިތުރުން، މި އަހަރަށް މުރާޖައާކުރެވުނު އަދަދު ކަމުގައިވާ ފަސް ލައްކަވަނަ ފަތުރުވެރިޔާ ވެސް ވަނީ ރާއްޖެ އައިސްފައެވެ.
މީގެ އިތުރުން، ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ ރެކޯޑްތައް މުގުރަމުން އައިސް، 4000 އަށް ވުރެ ގިނަ ފަތުރުވެރިން އައި ދުވަހެއް ވަނީ ރެކޯޑްކުރެވިފައެވެ. މިއީ ކޮވިޑުގެ އާލަމީވަބާގެ ކުރިން ރާއްޖެއަށް ދުވާލެއްގެ މައްޗަށް އެވަރެޖްކޮށް ޒިޔާރަތްކުރާ ފަތުރުވެރިންގެ އަދަދާ ގާތް އަދަދެކެވެ. ކޮވިޑުގެ ކުރިން ދުވާލެއްގެ މައްޗަށް 4000-5000 ދެމެދުގެ އަދަދަކަށް ރާއްޖެއަށް ފަތުރުވެރިން ޒިޔާރަތްކުރެއެވެ.
