ގްރޭޓަރ މާލޭ ބަސް ޓާމިނަލްގައި ޕިކްޕޯސްޓް ސްޓޭޝަނެއް

މާލޭ އިންޑަސްޓްރިއަލް ޒޯނުގައި ހުންނަ ގްރޭޓަރ މާލެ ބަސް ސްޓޭޝަންގައި "ޕިކްޕޯސްޓް" ސްޓޭޝަނެއް ގާއިމުކޮށްފިއެވެ.

މޯލްޑިވްސް ޕޯސްޓް ލިޓެޑުން، އެކުންފުނީގެ ސެލްފް ސަރވިސް ޑެލިވަރީ ސްޓޭޝަން ކަމަށްވާ "ޕިކްޕޯސްޓް" ގެ ސްޓޭޝަނެއް ގްރޭޓަރ މާލެ ބަސްސްޓޭޝަނުގައި ގާއިމުކުރިއިރު، މިއީ މާލޭގައި ގާއިމުކުރި ހަތަރު ވަނަ "ޕިކްޕޯސްޓް" ސްޓޭޝަނެވެ.

ޕޯސްޓް އޮފީހުން ބުނެފައިވާގޮތުގައި، ޕިކްޕޯސްޓްގެ ހިދްމަތް ދެމުންދަނީ ރައްކާތެރިކަމާއި އިތުބާރާއެކު، ވީހާވެސް އަވަހަކަށް ޑެލިވަރީގެ ހިދްމަތް ފޯރުކޮށްދިނުމަށް ކަމަށެވެ. އެގޮތުން އިތުރު ޕިކްޕޯސްޓް ސްޓޭޝަންތައް މާލެ ސަރަހައްދުގައި ގާއިމު ކުރުމުގެ މަސައްކަތް ޕޯސްޓް އޮފީހުން ދަނީ ކުރަމުންނެވެ.

ގިނަ ރައްޔިތުން ޕޯސްޓްގެ ހިދްމަތް ހޯދަމުންދާއިރު، ޕިކްޕޯސްޓް ސަޓޭޝަންތައް އިތުރުވެގެން ދިއުމަކީ ޕޯސްޓް މެދުވެރިކޮށް ތަކެތި ގެންނަ ފަރާތްތަކަށް ވަރަށް ބޮޑު ލުއިފަސޭތަކެއް ލިބިގެންދާ ކަމެކެވެ.

ގްރޭޓަރ މާލޭ ޓާމިނަލްގެ އިތުރުން ދެން ޕިކްޕޯސްޓު ސްޓޭޝަންތައް ގާއިމުކޮށްފައި ހުންނަނީ ޕޯސްޓް އޮފީހުގައާއި ސަރުކާރުގެ އޮފީސްތައް ހިމެނޭ، ވެލާނާގެ އިތުރުން ހުޅުމާލޭގައެވެ.