ރަސްމިއްޔާތުތަކާއި ހަފްލާތަކުގައި ކެއުން ހަމަނުޖައްސަން އެޗްޕީއޭއިން އަންގައިފި
ކެއިންބުއިން ހަމަޖައްސާނަމަ، ބުފޭގެ ބަދަލުގައި ވަކިން ކެވޭނެ ގޮތެއް ހަމަޖައްސަން އެދިފައިވޭ
ަބައެއް ހަފްލާތައް ބޭއްވުމަށް ބޭނުންކުރާ ސަލްޓަން ޕާކު ކޮވިޑުގެ ހާލަތާ ގުޅިގެން ބަންދުކޮށްފައި، މިހާރު ވަނީ އާއްމުންނަށް ހުޅުވާލާފައި
ރަސްމިއްޔާތުތަކާއި ހަފްލާ ބޭއްވުމުގެ ހުއްދަ ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ދީފައިވީ ނަމަވެސް، ރަސްމިއްޔާތުތަކާއި ހަފްލާތަކުގައި ކެއުން ހަމަނުޖެއްސުމަށް އެޗްޕީއޭއިން އަންގައިފިއެވެ.
އެޗްޕީއޭއިން ހޮނިހިރު ދުވަހު އާންމުކުރި ރަސްމިއްޔާތުތަކާއި ހަފްލާތަކާއި ހަރަކާތްތައް ބޭއްވުމުގައި އަމަލުކުރަންވީ އުސޫލުގައި ބުނެފައި ވަނީ ބައްދަލުވުންތަކާއި ހަފްލާތަކުގައި ކެއުމުގެ އިންތިޒާމް ހަމަނުޖެއްސުމަށް އެދޭ ކަމަށެވެ. އަދި ކައިވެނި ޕާޓީއާއި އުފަންދުވަހުގެ ހަފްލާތަކުގައި ކެއުމުގެ އިންތިޒާމް ހަމަޖައްސާއިރު ބުފޭގެ ބަދަލުގައި ވަކިން ސާފު ކުރެވޭނެ ގޮތަށް އިންތިޒާމް ހަމަޖެއްސުމަށް އެދޭ ކަމަށެވެ.
މީގެ އިތުރުން އެޗްޕީއޭގެ އުސޫލުގައި ބުނެފައިވަނީ ހަފްލާތަކާއި ބައްދަލުވުންތަކުގައި އަތާއި އަތް ޖޯޑުކޮށް ސަލާމް ނުކުރުމާއި، އިނާމާއި ސެޓްފިކެޓް ދޭނަމަ ސެނެޓައިޒާ ބޭނުންކޮށްގެން ރަނގަޅަށް އަތް ސާފު ކުރުމަށް އިލްތިމާސްކޮށްފައެވެ. އަދި މާސްކު އެޅުމާއި ގައިދުރުކުރުން އިސްކުރުމަށް ވަނީ އަންގާފައެވެ.
ކޮވިޑުގެ ކޭސްތައް އިތުރުވަމުން ދިއުމާ ގުޅިގެން މާލެ ސަރަޙައްދު ލޮކްޑައުން ކޮށްފައި އޮތުމަށްފަހު، ލޮކްޑައުންއަށް ލުއި ދިނުމާއި ގުޅިގެން ގިނަ މީހުން އެއްވާ ގޮތަށް ހަފްލާތަކާއި، ޕާޓީތަކާއި ޖަލްސާތަކާއި އަދި އެހެނިހެން އެއްވުންތައް ބާއްވަން ފެށިއެވެ. އެއާއެކު އަނެއްކާވެސް ކޮވިޑުގެ ކޭސްތައް އޭރު އިތުރުވެގެން ދިޔަ ކަމަށް އެޗްޕީއޭއިން ބުނެއެވެ. އެހެންކަމުން އެޗްޕީއޭއިން ވަނީ ލޮކްޑައުންއަށް ލުއިދިނުމަށް އެ އޭޖެންސީން އާއްމުކޮށްފައިވާ ގައިޑްލައިންތަކަށް އަމަލުކުރަން ބާރު އަޅާފައެވެ.
އެގޮތުން ކޮންމެހެން މީހުން ހާޒިރުވެގެން ބާއްވަން ޖެހޭ ބައްދަލުވުންތައް ފިޔަވައި، އޮފީސް މަސައްކަތާގުޅޭ ބައްދަލުވުންތައް އޮންލައިންކޮށް ބޭއްވުމަށާއި، 30 މީހުންނަށް ވުރެ މަދުން މީހުން ބައިވެރިވާ ބައްދަލުވުންތައް ވެސް ކޮންމެހެން ބާއްވަންޖެހޭ ހާލަތުގައި މެނުވީ ނުބޭއްވުމަށް ބާރު އަޅާފައިވެއެވެ.
އެޗްޕީއޭއިން ފިޔަވަޅުތަކަށް ދިން ލުޔާއެކު މިހާރު މާލެ ސަރަހައްދުގައި ހިންގި ކާފިއު ވަނީ އުވާލާފައެވެ. އަދި އެޗްޕީއޭގެ ގައިޑްލައިންތަކާ އެއްގޮތަށް ކުޅިވަރު މުބާރާތްތައް ބޭއްވުމުގެ ހުއްދަ ވަނީ ދީފައެވެ. އެހެންނަމަވެސް، އާންމު ހާލަތުގައި ކަންކުރާ ގޮތަށް ނުކުރުމަށާއި، އައު އާންމު ހާލަތުގައި އަމަލުކުރަން އިލްތިސާމްކޮށްފައިވާ ހުރިހާ ފިޔަވަޅަކަށް ބޯލެނބުމަށް އެޗްޕީއޭއިން ވަނީ ތަކުރާރުކޮށް އަންގާފައެވެ.
