ވީއާރް ކެފޭ: ކެއިން ބުއިމާއެކު، ވާރޗުއަލް ރިއަލިޓީ ގޭމިންގެ ޚިދުމަތް
ގޭމިންއަށް ބުކިން ހެއްދުމަށް ޚާއްސަ ޕެކޭޖުތަކެއްވެސް ހިމަނާފައިވޭ
ވީއާރް ކެފޭގައި ހުންނަ ގޭމިންގ އޭރިއާއެއް
ވާރޗުއަލް ގޭމް ކުޅެން ބޭނުންވާ މީހުންނަށް އެކަމަށް ޚާއްސަ ވަސީލަތްތަކާއެކު ގޭމިންގެ އިތުރު އިންތިޒާމުތައް ވީއާރް ކެފޭގައި ހަމަޖައްސައިފިއެވެ.
ވީއާރް ކެފޭއަކީ ރާއްޖޭގެ ފުރަތަމަ "ވާރޗުއަލް ރިއަލިޓީ" ކެފޭއެވެ. އެގޮތުން ގޭމް ކުޅެން ބޭނުންވާ މީހުންނަށް އެކަމަށް ޚާއްސަ ވަސީލަތްތަކާއެކު ގޭމިންގެ އިންތިޒާމުތައް ވީއާރް ކެފޭގައި ވަނީ ހަމަޖެހިފައިވެއެވެ. ނޮވެމްބަރު 30 ގައި ހުޅުވި މި ކެފޭގައި މިހާރު ވަނީ އައު ޚިދުމަތްތަކާއެކު، ގޭމިންއަށް ބުކިން ހެއްދުމަށް ޚާއްސަ ޕެކޭޖުތަކެއްވެސް ހިމަނާފައެވެ.
ކެއިންބުއިމުގެ ޚިދުމަތްތައްވެސް ލިބިގެންދާ މި ކެފޭގެ ޚާއްސަ ކަމަކީ ގޭމިން ސްޓޭޝަންތައްކަމަށް ކެފޭގެ އެމްބެސެޑަރ މަރިޔަމް އައްޒަ ބުނެއެވެ. "ރާއްޖެއެމްވީ" އަށް ދިން އިންޓަރވިއުއެއްގައި އައްޒަ ބުނީ، ކޮވިޑުގެ މި ޙާލަތުގައި އާއިލާއާއި ރައްޓެހިންނާއެކު ވަގުތު ހޭދަކޮށްލުމަށް މި ކެފޭ ރިކޮމެންޑް ކުރާކަމަށެވެ.
އެގޮތުން ދެ ގޭމިން އޭރިއާއެއް މި ކެފޭގައި ހުންނަކަން ފާހަގަކޮށް އައްޒަ ބުނީ، ކުރީބައިގައި ބުކްކޮށްގެން މި ކެފޭއިން ގޭމިންގ ޚިދުމަތް ހޯދޭނެކަމަށެވެ. އަދި ބުކިންގ ހައްދާ ގަޑިއިރުގެ ތެރޭގައި ގޭމިން އޭރިއާ އެ ބަޔަކަށް އެއްކޮށް ހުސްކުރާކަމަށް އައްޒަ ފާހަގަކުރިއެވެ.
"ވާރޗުއެކްސް އޮމްނީ" އަދި "ވާރޗުއެކްސް އޮކިއުލަސް" އަކީ މި ކެފޭގައި ހުންނަ ދެ ގޭމިންގ އޭރިއާއެވެ. އެގޮތުން އޮމްނީއަކީ ހެލިފެލިވެ އުޅެންޖެހޭ އެކިކަހަލަ ހަރަކާތްތަކާއި، ދުވުން ފަދަ ކަންކަން އެ ވާރޗުއަލް ގޭމްތަކުގެ ތެރޭގައި ހިމެނޭ ބާވަތެކެވެ. އަދި އޮކިއުލަސްއަކީ އެތަނެއްގައި މަޑުކޮށްގެން ހުރެ ވާރޗުއަލްކޮށް ގޭމް ކުޅެވޭނެ އޭރިއާއެއްކަން އައްޒަ ފާހަގަކުރިއެވެ. މި ކެފޭގެ ވާރޗުއަލް ގޭމްތަކުގެ އަގުތައް އުޅެނީ 75ރ. އާއި 300ރ. އާ ދެމެދުގެ އަގެއްގައެވެ.
މި ކެފޭ ފަރުމާކޮށްފައިވަނީ އިންޑޯ އަދި އައުޓްޑޯ ބޭނުން ކުރެވޭނެހެންނެވެ. އަދި ކެފޭގެ އިންޑޯ ވީއާރް ތަޖުރިބާކުރުމަށް ޚާއްސަކޮށްފައިވާއިރު، އައުޓްޑޯ ޚާއްސަކޮށްފައިވަނީ ޑައިނިންއަށެވެ. "ވީއާރް" އަކީ ވީޑިއޯ ބަލާ އާލާތެއްގެ ޒަރިއްޔާއިން ފެންނަ މަންޒަރުތަކާ ތަކެތީގައި އަތްލާ ބޭނުންކުރެވޭނެހެން ފަރުމާކުރެވިފައިވާ ޓެކްނޮލޮޖީއެކެވެ.
